မတ်မလီု၊ သိပ်တမ်ပါ ၆
ပ္ဍဲကဵုတွဵုရးမန် ကဝ်မယှေန်ပၞာန် ကၠောန်အာပေါဲရုဲမာဲဏံဂှ်တှ်ေ ပွမပလာတ်ပထုဲတံ ညံၚ်ဟွံဂွံက္တဵုဒှ်အာ သွက်ဂွံဒစးဒုၚ်စဵုဒၞာလဝ် သ္ကိုပ်ဝန်ဇၞော်တွဵုရးမန် ကဝ်မယှေန်ပၞာန်ခါန်ကၞက် ဥူအံၚ်ကျဳတိၚ် ကဵုဏာလဝ် စၞောန်ပၟိၚ်နွံရ။
ပ္ဍဲသိပ်တမ်ပါ ၄ ဒၞာဲရုၚ်အလဵုအသဳတွဵုရးမန် ဍုၚ်မတ်မလီု ပေါဲဆဵုဂဗ ဂကောံအလဵုအသဳတွဵုရးမန် ကေုာံ သၞာဲဒါ၊ ညးတာလျိုၚ် ညးယိုက်ဝန်အလဵုအသဳ ဌာနအဆံၚ်တွဵုရးတံဂှ် ကဵုလဝ်စၞောန်ပၟိၚ် မဒှ်ရ။
ပ္ဍဲပေါဲရုဲမာဲ ညးဍုၚ်ကွာန်တံသီုဖအိုတ် ဗွဲမသၠးပွး ဂီုဂီုကၠီုကၠီု ညံၚ်သ္ဂောံကဵုအာမာဲမာန်ဂှ် ပရေၚ်ပလာတ်ပထုဲ ညံၚ်ဟွံဂွံဒှ်အာ သွက်ဂွံဒစးဒုၚ် စဵုဒၞာလဝ်ကီု တာလျိုၚ်ပရေၚ်ကမၠောန်တံဂှ်လေဝ် ညံၚ်ဂွံအံၚ်ဇၞးအာ ဗီုပြၚ်သၞောတ်စှ်ေစှ်ေ ပွမကေတ်လျိုၚ် ပွမဒုၚ်လျိုၚ်ပေၚ်ၚ် ညံၚ်သ္ဂောံထမံက်အာရုပ်ရဴဂှ် ဥူအံၚ်ကျဳတိၚ် ကဵုလဝ်စၞောန်ရ။
ပ္ဍဲကဵုပေါဲရုဲမာဲ ပွမပလာတ်ပထုဲတံ ညံၚ်ဟွံဂွံက္တဵုဒှ် ညံၚ်ဂွံဒစးဒုၚ်စဵုဒၞာလဝ် ဟီုလဝ်ကီုလေဝ် ညးဍုၚ်ကွာန်တံဂှ်တှ်ေ ပေါဲရုဲမာဲဂှ် စိုတ်ဟွံလုပ်စဂှ်ကီု ပရေၚ်ကၠောန်ပေါဲဆဵုဂဗ ဌာနဆေၚ်စပ်တံဂှ် ကရေပ်ထရတ်တုဲ သွက်ဂွံကဵုစုတ်မာဲ အတေၚ် ဒှ်မာန်ရောၚ် သၠာဲဒါ CDM မွဲတၠ ဟီုဏာလညာတ်ညးရ။
“နကဵုလညာတ်ပိုဲတှ်ေ ပေါဲရုဲမာဲညံၚ်ဂွံဒှ် ဍေံတံကၠောန်အာတွဵုရ၊ အကာဲအရာလ္တူတုဲ ဂွံအာမွဲဗွိုၚ်ဍောတ်လေဝ် ကၠောန်အာဏောၚ်၊ ဆဂး ဗီုလဵုဂွံဟီုရော ညးဍုၚ်ကွာန်တံဂှ် ဗီုလဵုမှ စိုတ်ဟွံလုပ်စပုဟ်၊ ညိလေဝ် စိုတ်ဟွံလုပ်စပုဟ်၊ ဂလာန်ပတေဟ်ဟီုဂှ် နွံမံၚ်သုည၊ ဆဂး သၞာဲဒါ ညးယိုက်ဝန်တံဂှ်တှ်ေ ကဵုစုတ်မာဲအတေၚ် သဘဴဗီုဏံနွံမံၚ်” သာ်ဝွံ သ္ဂးရ။
ကော်ဆဵုဂဗ ဌာနဆေၚ်စပ်တံဟီုဂှ် ပ္ဍဲကဵုပေါဲရုဲမာဲဏံ သၞာဲဒါရဲယိုက်ဝန်တံ သၟးဟွံသေၚ် စနူကဵုကၟိန်သ္ၚိဌာန်ညးတံဖအိုတ် ဟွံကဵုဟွံဂွံ ညံၚ်ဂွံကဵုမာဲ ဗီုပြၚ်စန်ဒက်အာဒှ်တုဲ ပေါဲရုဲမာဲညးဍုၚ်ကွာန်တံ ဗီုပြၚ်စိုတ်လုပ်စမံၚ် သွက်ဂွံတြးအာဝါဒ နူကဵုလၟုဟ် ဒစးဒုၚ်ကဵုပလေဝ်စလေဝ်ဒှ်မာန် သာ်ဝွံ ညးဆက်ဟီုရ။
ပ္ဍဲတွဵုရး သွက်ဂွံကၠောန်အာပေါဲရုဲမာဲဂှ် ကဝ်မယှေန်ပၞာန် ဟပဵုပတိုန်လဝ် ပရေၚ်ဂီုကၠီု ဇၟာပ်ပ်ဒေသတံကီု သၠုၚ်လဝ်ပရေၚ်ဂီုကၠီု ပ္ဍဲဇၟာပ်ရုၚ်သ္ကို ပ်အုပ်ဓုပ်တံကီု ဒၞာဲပၞော်လုပ်တိတ်ဍုၚ်တံ မာတ်ဆိုအ်ဂၠိုက်ဂၠာဲစၟဳစၟတ်မံၚ်တံ သၠုၚ်အသိၚ်တုဲကၠောန်မံၚ်ရောၚ် ညးဒေသတံ ဟီုရ။
ကဝ်မယှေန်ပၞာန်ဝွံ စိုပ်ဒဳဇြမ်ပါ ၂၈ မ္ဂး နဒဒှ် ပေါဲရုဲမာဲသ္ကုတ် ၁ ပ္ဍဲကဵုတွဵုရးမန် ဒၞာဲပွိုၚ်ဍုၚ်ကျာ်ထဝ်၊ သဓီု၊ မတ်မလီု၊ ၜါသွာၚ်ကဵု ကျာ်မြဟ်တံ သွက်ဂွံကၠောန်ပေါဲရုဲမာဲဂှ် စဳဇန်လဝ်ရ။
ပ္ဍဲတွဵုရးမန် ကဝ်မယှေန်ပၞာန် ကၠောန်အာပေါဲရုဲမာဲဏံဂှ်တှ်ေ မဒှ်ဗော်ရဲပၞာန်တံ ကဵုလဝ်အထံက်ပၚ် လပါ်လက်ကြဴ မပ္တံကဵု ဗော်ပျဳခိုၚ်ဖျို၊ ဗော်ညဳသၟဟ်မန် သီုဖအိုတ် ဗော်ပရေၚ်ဍုၚ်ကွာန် ၁၁ ဗော်တံ လုပ်ပြိုၚ်အာရောၚ် ဂွံတီလဝ်ရ။
ပရိုၚ်-သြင်လောန်တိုၚ်မ်
Photo – MOI