ရေဝ်၊ သိပ်တမ်ပါ ၆
ဌာနပရေၚ်စဵုဒၞာ ကံၚ်သဳဖိတ်ဒရေဝ်ဍုၚ်မန် DoD ကဵု ဂကောံဇြဟတ်ပၠန်ဂတး မဟာမိတ်ညးဍုၚ်ကွာန် PRA- Magway တံ နကဵုပရေၚ်ဍုၚ်ကွာန် ပံၚ်တောဲအာတုဲ သီုကဵုပရေၚ်ပၞာန်ပၠန် မွဲလ္ပာ်ကဵုမွဲလ္ပာ် သွက်ဂွံရီုဗၚ် ဒတူလိုၚ်မာန် တုပ်စိုတ်ညးသ္ကံရောၚ် ပ္ဍဲသိပ်တမ်ပါ ၃ ဂှ် ပံၚ်တောဲ ပတိတ်လိက် လလောၚ်တြးရ။
တုဲကၠုၚ်ဂိတုအဝ်ဂတ် ၃၀ တေံ သ္ကိုပ်ဌာနပရေၚ်စဵုဒၞာ MSFC ကဵု ဂကောံညးစၞးကေုာံ ဂကောံ PRA-Magway ဥက္ကဌ သ္ဂံၚ်နေမန် သ္ကိုပ်သ္က ကမ္မတဳဗဟဵုတံဂှ် နူကဵု Online ကၠောန်လဝ်ပရေၚ်ဆဵုဂဗ အလန်ပထမ ရ။
သွက်ဂွံဒစဵုဒစးအာ ပေါဲရုဲမာဲ ကဝ်မယှေန်ပၞာန် ကၠောန်အာ ပ္ဍဲ ၂၀၂၅ ဂှ်ကီု ကံၚ်သဳဖိတ်ဒရေဝ်ဍုၚ်မန်ကဵု PRA – Magway တံ နကဵုပရေၚ်ဍုၚ်ကွာန် ပံၚ်တောဲအာတုဲ မွဲလပါ်ကဵုမွဲလပါ် နကဵုပရေၚ်ဍုၚ်ကွာန် ပရေၚ်ပၞာန်တံ သွက်ဂွံရီုဗၚ်ဒတူလိုၚ်အာမာန် တုပ်လဝ်စိုတ်ညးသ္ကံရ။
အလုံသီုဖအိုတ် တဝ်စၞေဟ်အာမွဲကရောံမာန်မှ ပတုဲအာ ပေါဲဗတိုက် သၞောတ်တၠအဝဵုပၞာန်မာန်ရောၚ်ဒှ်တုဲ နကဵုပရေၚ်ပၞာန် သီုကဵုပရေၚ်ဍုၚ်ကွာန် ပံၚ်တောဲရေၚ်တၠုၚ်အာရောၚ် သ္ကိုပ်ဌာနပရေၚ်စဵုဒၞာ MSFC တလနာဲ ဟီုကဵုဌာန်ပရိုၚ် သြၚ်လောန်တိုၚ်မ်ရ။
“ပိုဲတံ ဂကောံပၠန်ဂတးရပ်လွဟ် က္တဵုဒှ်ကၠုၚ်လဝ် ပ္ဍဲကဵုပၠန်ဂတးကညၚ်ဏံကီု နကဵုပရေၚ်ဍုၚ်ကွာန် ဂကောံချဳဒရာၚ်မံၚ်တံကီု သီုဖအိုတ်ပံၚ်ပစပ်ကၠောန်အာမွဲစွံတုပ်ပ်တုဲ တဝ်စၞေဟ်အာမွဲကရောံမာန်မှ ပေါဲဗတိုက်သၞောတ်တၠအဝဵုပၞာန်ဏံ တုဲဒှ်အိုတ်အာပြဟ်ဟ်ဏောၚ်။ ဟိုတ်ဂှ်ရ နကဵုပရေၚ်ဍုၚ်ကွာန် ပရေၚ်ပၞာန် ပိုဲတံပံၚ်တောဲရေၚ်တၠုၚ်အာမွဲစွံရောၚ် အဲမိက်ဂွံသ္ဂးရ” သာ်ဝွံ ညးဟီုရ။
ဌာနပရေၚ်စဵုဒၞာ ကံၚ်သဳဖိတ်ဒရေဝ်ဍုၚ်မန် MSFC ဝွံ လ္တူသၞဘုံတုပ် ဂကောံပၠန်ဂတးသီုဖအိုတ်တံဂှ် ဒက်အာမဟာမိတ်မာန်၊ ပံၚ်တောဲကၠောန်အာ မွဲစွံမာန်တုဲ ညးအပ္ဍဲတွဵုရးတံကီု ဂကောံနူကဵုမ္ၚးတံကီု ဆက်စၠောံကၠုၚ် နွံမံၚ်ရောၚ် ညးသ္ဂးရ။
စပ်ကဵုကိစ္စ ဒစဵုဒစးအာ ပေါဲရုဲမာဲ ကဝ်မယှေန်ပၞာန် ကၠောန်အာဏံတုဲ ဒၞာဲတိဍာ်ဒေသ ဂကောံၜါလပါ်ချဳဒရာၚ်ဇြဟတ်ခိုဟ် အုပ်ဓလီုလဝ်တံ ညံၚ်ဟွံဂွံထမံက်အာရုပ်ရဴမာန်ဂှ် ၜိုတ်သ္ပမာန် တာဒၞာအာရောၚ် တလနာဲ သ္ဂးရ။
ပေါဲရုဲမာဲ ကဝ်မယှေန်ပၞာန်သ္ကိုပ်သ္က နကဵုသ္ကုတ် ၁ ဝွံ ပ္ဍဲကဵုဒဳဇြမ်ပါ ၂၈ အလုံမွဲဍုၚ် ၁၀၂ ပွိုၚ်ဍုၚ် သွက်ဂွံစကၠောန်ဗ္ဒျ်အာဂှ် ကဝ်မယှေန် ပေါဲရုဲမာဲကၟိန်ဍုၚ် ကဵုလဝ်သမ္တီနွံရ။
ပ္ဍဲကဵုသ္ကုတ် ၁ တွဵုရးမန်ဂှ်တှ်ေ ပွိုၚ်ဍုၚ်ကျာ်ထဝ်၊ ကျာ်မြဟ်၊ ၜါသွာၚ်၊ မတ်မလီုကဵု သဓီုတံပါလုပ်တုဲ အပ္ဍဲကဵု ရးမဂွေဂှ်တှ်ေ ပွိုၚ်ဍုၚ် (ချောက်၊ ရေနံချောင်း၊ ပခုက္ကူ၊ တောင်တွင်းကြီး၊ မကွေး၊ ပွင့်ဖြူ)တံ ပ္ဍဲကဵု ၉ ပွိုၚ်ဍုၚ် စုတ်လဝ်နွံရ။
ပ္ဍဲအကာဲအရာ နကဵုဗီုပြၚ်တိဍာ်ပထဝဳ သ္ၚောဲခြာမံၚ်ညးသ္ကံဏံ ဌာနပရေၚ်စဵုဒၞာ MSFC ကေုာံ PRA – Magway တံ ပွမဆဵုဂဗလဝ် အလန်ပထမဏံဂှ် သွက်ပရေၚ်ပၠန်ဂတး ဒှ်မံၚ်ဂုဏ်ဖဵုရောၚ် တလနာဲ ဟီုလဴဏာဗီုဏံရ။
“မၞိဟ်ညးကဵုညး ဂြိုပ်ညးကဵုညး ဗီုညးကဵုညး အကာဲအရာ ပိုဲတံပၠန်ဂတးမံၚ်ဂှ်တှ်ေ သ္ၚောဲခြာမံၚ်ကဵု တိုၚ်ပ္ကဴရန်တၟံပိုဲဏောၚ်။ ဟိုတ်ဂှ်ရ တိုၚ်ပ္ကဴပိုဲရန်တၟံလဝ် ညံၚ်ဂွံစိုပ်အာပြဟ်ဟ်မာန်ဂှ် ဂကောံပၠန်ဂတးရပ်လွဟ် နွံမံၚ်အပ္ဍဲဍုၚ်ဏံ သီုဖအိုတ် နကဵုပရေၚ်ဍုၚ်ကွာန် ဂကောံပၠန်ဂတးမံၚ်အိုဿီုတံ ပံၚ်ပစပ်အာတုဲ လုပ်အာပေါဲဗတိုက်မှ ကၟိန်ဍုၚ်ဖိတ်ဒရေဝ် ပိုဲမိက်ဂွံအာဂှ် စိုပ်အာဏောၚ်ဒှ်တုဲ ဗီုလၟုဟ်ဏံ ဆက်စၠောံပံၚ်တောဲတုဲ ဆဵုဂဗသဳကၠဳညးသ္ကံ” သာ်ဝွံ သ္ဂးရ။
စနူ ၂၀၂၁ အခိၚ်ပၞာန်စသီအဝဵုတေံဂှ်တုဲ ဒဵုကဵု သၞာံ ၂၀၂၅ ဂိတုအဝ်ဂတ်ဏံ အကာအရာပရေၚ်ဍုၚ်ကွာန် ပရေၚ်ပၞာန် မက္တဵုဒှ်ကၠုၚ်မံၚ် အပ္ဍဲကဵုဍုၚ်ဗမာ ဏံကီု ကဝ်မယှေန်ပၞာန် နဲကဲစုၚ် ကဵုမံၚ်ဒဒိုက်ကဵုညးဍုၚ်ကွာန်တံကီု သွက်ဂွံဗတိုက်သရိုဟ်ဏာဂှ် သဳကၠဳလဝ်ညးသ္ကံရ။
တုဲပၠန် တၠအဝဵုအိုဿီု ဒဵုကဵုရိုဟ်ကၞက်ပိုတ်ကၠက်အာ မွဲကရောံမွဲစွံ ပံၚ်တောဲဗတိုက်တုဲ ညံၚ်ဂွံဒက်ပတန် ကၟိန်ဍုၚ်ဖိတ်ဒရေဝ်တေံမာန် လုပ်အာပေါဲဗတိုက် မွဲကရောံဂှ်လေဝ် သဳကၠဳလဝ်ညးသ္ကံရောၚ် ပ္ဍဲကဵုလိက်လလောၚ်တြး ပံၚ်တောဲဂှ် ချူလဝ်ရ။
သၟဝ်တဲပွမကောပ်ကာဲ ဌာနပရေၚ်စဵုဒၞာ MSFC ဂှ် ဒပ်ပၠန်ဂတးဍုၚ်မန် MSRF နွံမံၚ်တုဲ ပ္ဍဲတွဵုရးမန် ပွိုၚ်ဍုၚ်မုဟ်ဍုၚ်၊ ဇြပ်ဗုကဵု ရေဝ်ဟွံက ပ္ဍဲရးတနၚ်သဳ ဍာ်ဗု၊ ကလိၚ်အံၚ် ဒဵုကဵု တယိတ်ချံၚ် ပါ်တြးလဝ်ဒပ်တုဲ ချဳဒရာၚ်မံၚ် ပရေၚ်ပၞာန်ရ။
တုဲပၠန် နကဵုပရေၚ်ဍုၚ်ကွာန် ပရေၚ်ပၞာန် သွက်ဂွံပံၚ်တောဲရေၚ်တၠုၚ်အာ အပ္ဍဲကဵု ကံၚ်သဳဖိတ်ဒရေဝ်ဂှ် နကဵုဂကောံမွဲ ဒပ်စဵုဒၞာညးဍုၚ်ကွာန်ရေဝ် YPDF လေဝ် ပါလုပ်မံၚ်ကီုရ။
PRA – Magway ဂှ်တှ်ေ ချဳဒရာၚ်မံၚ်ပရေၚ်ပၞာန် ပ္ဍဲကဵုဒေသ မွဲဒမြိပ်ပၞောန်ပယျဵု ရခေၚ်-မဂွေတံတုဲ ရုၚ်စက်ကပေါတ်ပၞာန် ကပစ ကဝ်မယှေန်ပၞာန်တံဂှ်လေဝ် ပတဝ်က္ဍိုပ်ဗတိုက်မံၚ်တုဲ ကုဒပ်ပၞာန်အာရက္ခ AA ကီု သီုကဵု ဒပ်ရပ်လွဟ်တၞဟ်ဟ်တံလေဝ် နကဵုမဟာမိတ်ပရေၚ်ပၞာန် ဒက်ပတန်လဝ်ရ။
ပရိုၚ်-သြင်လောန်တိုၚ်မ်
Photo – MSFC