ဗြဝတဳ၊ သိပ်တမ်ပါ ၈
ပ္ဍဲကဵုတွဵုရးကရေၚ် ပွိုၚ်ဍုၚ်ဗြဝတဳ ဒၞာဲဒပ်ပၠန်ဂတးတံ သီဂွံလဝ် ဒေသတေန်ဂါန်ညဳနံၚ်ဂှ် နကဵုဇြဟတ်ပၞာန်တိုက်ကဵု ပၞာန်ကျာ ကဝ်မယှေန်ပၞာန် ပြေၚ်ဇန်ထပက်ပၞာန် ဍိုက်ကဵုဇြဟတ်တုဲ ကလေၚ်ထိၚ်ချုက်ဂွံလဝ်ယျ တမ်ရိုဟ်ပရိုၚ်ဒေသတံ ဟီုကဵုသြၚ်လောန်တိုၚ်ရ။
သွက်ဂွံကလေၚ်သီကေတ် ဂၠံၚ်ဇၞော်အာယှကဵု တေန်ဂါန်ညဳနံၚ်မာန်ဂှ် ဒပ်ကဝ်မယှေန်ပၞာန် ထပက်ကၠုၚ် အတိုၚ်ဂၠံၚ်ဇၞော်အာယှ ကအ်ကြိက်-ဗြဝတဳကီု နူကဵုဒပ်မၚ်ဍုၚ် ဗြဝတဳ ခလရ ၂၇၅ ဂှ်လေဝ် စနူသိပ်တမ်ပါ ၁ ထပက်ကၠုၚ်ပၞာန်တုဲ ပ္ဍဲကဵု ကွာန်ကွေန်ကလေဝ် ပွိုၚ်ဍုၚ်ဗြဝတဳဂှ် ပေါဲဗတိုက်သ္ကာတ်မြဟ် ဒှ်ကၠုၚ်လဝ်ရ။
တုဲပၠန် ကရောၚ်ပၞာန် အံၚ်ဇေယျ ဒပ်ကဝ်မယှေန်ပၞာန် နကဵုဇြဟတ်ဗွဲမဂၠိုၚ် စကာလွဟ်ဇၞော် သီုကဵုဒရုၚ် ပၞာန်ကျာအရီုဗၚ်တံတုဲ ထပက်ကၠုၚ်ပၞာန် ပ္ဍဲကွာန်ကွေန်ကလေဝ် ပွိုၚ်ဍုၚ်ဗြဝတဳဂှ် ပ္ဍဲကဵု သိပ်တမ်ပါ ၅ အခိၚ်နူဂယးပြဟ် လုပ်ကေတ်ဒၞာဲ ဖျေံလဝ်ဒပ်ရ။
ဒပ်ကဝ်မယှေန်ပၞာန်ဝွံ နူကဵုကွာန်ကွေန်ကလေဝ် ပွိုၚ်ဍုၚ်ဗြဝတဳဂှ်မွဲအဆံၚ် လပါ် တေန်ဂါန်ညဳနံၚ်တေံ ဗွဲမသ္ကာတ်မြဟ် ပြေၚ်ဇန်ထပက်ပၞာန် ဟိုတ်နူဗတိုက်ကၠုၚ်ဂှ်ရ ဒပ်ပံၚ်တောဲပၠန်ဂတးတံ ဒးကလေၚ်ဆုတ်ကၠုၚ် ဗွဲယာယဳရ။
စိုပ်သိပ်တမ်ပါ ၆ အခိၚ်နူဂယးဂှ် ဒပ်ကဝ်မယှေန်ပၞာန် ကလေၚ်ထိၚ်ချုက်ဂွံအာ တေန်ဂါန်ညဳနံၚ်မာန်တုဲ နူကဵု တေန်ဂါန်ညဳနံၚ် မွဲအဆံၚ် စိုပ်ကၠုၚ်အပ္ဍဲတမ်ဒပ် ခလရ ၂၇၅ ဍုၚ်ဗြဝတဳရ။
နူကဵု ဂၠံၚ်ဇၞော်အာယှမွဲအဆံၚ် အတိုၚ်ဂၠံၚ်ဂြိုပ် ထပက်စှ်ေအာ လပါ်ကွာန် ကွေန်ကလေဝ် ပွိုၚ်ဍုၚ်ဗြဝတဳဂှ်တှ်ေ နကဵုအရီုဗၚ် ဒပ်မၚ်ပယျဵုကရေၚ် BGF တုဲ စိုပ်ကၠုၚ်လဝ်ရောၚ် ဟီုဂးစမံၚ်နွံရ။
နူကဵု ပွိုၚ်ဍုၚ်ဗြဝတဳ ဒေသတေန်ဂါန်ညဳနံၚ်ဂှ် ဒပ်ပၠန်ဂတးတံ ဒးဆုတ်အာလဝ်ကီုလေဝ် လပါ်ဂၠံၚ်ဇၞော်အာယှကဵု ဒဵုဒဝ်နဂၠံၚ်တြေံတံကီု သီုကဵုသ္ကုတ်ဂၠံၚ် ကြုၚ်ဒဵု-နဗူတေံဂှ် အကြာဒပ်ၜါလပါ် ပေါဲဗတိုက်ဆက်ဒှ်မံၚ်ဖိုအ်ရောၚ် ရိုဟ်ကၞက်ပရိုၚ်ညးဒေသတံ သ္ဂးရ။
ပ္ဍဲကၞောတ်သၞာံအိုတ် ကၠာဟွံစိုပ်ပေါဲရုဲမာဲဏံ အပ္ဍဲတွဵုရးကရေၚ်ဂှ် ဒပ်ကဝ်မယှေန်ပၞာန် သၠုၚ်ပတိုန်လဝ် အသိၚ်ထပက်ပၞာန် ဍိုက်ဗတိုက်ကၠုၚ်တုဲ လ္တူဗော်သွးကောန်ဂကူကရေၚ် KNU ဂှ် နဒဒှ် ဂကောံဟွံလုပ်ဗဗွဲဓရ် ကေုာံ ဂကောံပကီုပရာတ် လလောၚ်တြးဏာလဝ်ရ။
ပရိုၚ်-သြၚ်လောန်တိုၚ်မ်
Photo – CJ