အစ္စလာမ်မာဘက်၊ သိပ်တမ်ပါ ၇
ပ္ဍဲလၟေၚ်တရဴ သ္ကိုပ်ဝန်ဇၞော် ယှဳဗါတ်သ် ယှာရေတ်ဖ် အာလဝ်ပေကျေန်ဂှ် ကြုက်ကဵု ပါကေတ်သတာန် ချုက်လိက်ပရေၚ်ဓလိုက်တမ်ရိုဟ်တၟိ သွက်ၚုဟ်မးဒဝ်ဠာ ၈ ဒသမ ၅ ဗဳလဳယာန် မဳဒဳယာ ပါကေတ်သတာန်တံ ချူလဝ်ရ။
ပ္ဍဲသိပ်တမ်ပါ ၄ ချုက်လဝ်လိက်ကသုက် လက်ကရဴအိုတ် အပ္ဍဲကဵု ၝောံဍုၚ်ဇၞော်ပေကျေန် ဍုၚ်ကြုက်ဝွံ လိက်ကသုက်ပရေၚ်ဓရ်ကၠိုဟ်ခၠၚ် သွက်ဒဝ်ဠာ ၇ ဗဳလဳယာန် မပ္တံကဵု ပရေၚ်တဵုလွဳ၊ ဓါတ်လလဳကလေၚ်ပေၚ်ကေတ်တ်၊ ကွဳစက်ဓါတ်လလဳ၊ ပရေၚ်ထတ်ယုက်၊ ပသဲဍာၚ်ကဵု ပ္ဍဲကဏ္ဍတၞဟ်ဟ် သွက်ဒဝ်လာ ၁ ဒသမ ၅ ပရေၚ်ပံၚ်တောဲ ကၠောန်အာတံ ပါလုပ်ရ။
ပ္ဍဲကဵုပေါဲသဳကၠဳ ဂကောံပံၚ်တောဲရေၚ်တၠုၚ်ယှာန်ဟိုၚ် လၟေၚ်သၞာံတုဲဒှ်အာတုဲ သ္ကိုပ်ဝန်ဇၞော်ပါကေတ်သတာန်ကဵု က္ဍိုပ်သ္ကိုပ်ကြုက်တံ ဗွဲတၞဟ်ခြာ ဆဵုဂဗသဳကၠဳအာတုဲ ဂွံတၚ်တုပ်စိုတ် ထပက်စၟတ်တဲညးသ္ကံရ။
ပ္ဍဲသဘၚ်သဳကၠဳဝွံ သ္ကိုပ်ဝန်ဇၞော် ယှဳဗါတ်သ် ယှာရေတ်ဖ် သောၚ်ကလး ဆက်မိတ်ကဵု စင်္ကြံပရေၚ်ပိုန်ဒြပ် ကြုက်ကဵု ပါကေတ်သတာန် ထပ်မွဲသ္ကုတ်ပၠန်တုဲ သွက်ကိုန်အစဳဇန်တံ ဂွံစိုပ်ဒတုဲပြဟ်ဟ် ပရေၚ်ဆိုအ်မာတ် ဗီုပြၚ်ဗျူရိုကရေက်တံဂှ် သောၚ်းသ္အးကဵုရောၚ် စွံလဝ်ကတိရ။
သွက်ပရေၚ်ဂီုကၠီု သၟာကမၠောန်ကြုက်တံဂှ် နကဵုအသဳဇကု ထပ်သၠုၚ်ကဵုအာရောၚ် နူကဵုသ္ကိုပ်ဝန်ဇၞော် ယှဳဗါတ်သ် ကဵုကတိပါၚ်ကဵု သၟာပိုန်ဒြပ် ကြုက်တံရ။
စင်္ကြံပရေၚ်ပိုန်ဒြပ် ကြုက်ကဵု ပါကေတ်သတာန်ဝွံ နူကဵုဒေသယှာန်ကျေန် ပလိုတ်ဍုၚ်ကြုက်ဂှ် ချိက်အာကဵု သၞေဟ်ၜၚ် ဂဝါဒါ သၞေဟ်ၜဳအာရေဗျ နွံပ္ဍဲပါကေတ်သတာန်တုဲ သၞောတ်ဂၠံၚ်ကွဳစက် ကဵု ကွဳပၟတ်တံ ညံၚ်ဂွံတဴတက်အာ ဒက်ပ္တန်အာရောၚ် ဂးရ။
ပရေၚ်ဏံဝွံ ကၠောန်ဗ္ဒျ်ဖန်ပတိုန် သ္ဇိုၚ်စမြိုၚ်ဒၞာဲ အလုံဂၠးကဝ်တုဲ သွက်ဂွံသၠုၚ်ပတိုန်အာ ပရေၚ်ပိုန်ဒြပ် ဒှ်မံၚ်သ္ကုတ်ကိုန်အစဳဇန် ဒေသမွဲဗၞဳအဝန် ဂၠံၚ်ဍာန်မွဲတၞုၚ်ရ။
စပ်ကဵုကိုန်အစဳဇန်တံဏံတုဲ ပေါဲကဵုဍုၚ်ပါကေတ်သတာန်ဂှ် သၟာကမၠောန်ကြုက်တံ လၟိဟ်ကဵုလ္ၚီဗွဲမဂၠိုၚ် ကၠောန်မံၚ်ကမၠောန်ဒၞာဲတံဂှ်ရ။
အပ္ဍဲဏံ လ္ၚဵုတံဂှ် ရဲပါ်တိတ် ဗာလံက်ချ် ကေုာံ ရဲဆီပရီု ပါကေတ်သတာန် တာလဳဗါန်တံ စွံပွန်ဗတိုက်မံၚ်နွံတုဲ နကဵုဇြဟတ်ခိုၚ်ၚ် ညံၚ်ဂွံစဵုဒၞာကဵုအာ လပါ်ကြုက်တံ အလန်ဂၠိုၚ်ကဵုဝါ ဗတိုက်ဖအောဝ်လဝ်ရ။
Ref:AP