ဍာ်ဗု၊ သိပ်တမ်ပါ ၈
ဟိုတ်နူပေါဲဗတိုက်ၜါလပါ်ဒှ်မံၚ်ဂှ်တုဲ ဂၠံၚ်ကွဳစက် ရေဝ်-ထဝါဲမာတ်လဝ် ပွိုၚ် ၁၀ တ္ၚဲပြၚ်ဂှ် ကလေၚ်ပံက်ကဵုဏာယျ ညးတာလျိုၚ်လဝေၚ်ပၞာန် နဲကဲဗျူဟာ ၃၃ ဒပ်ပၞာန်စဵုဒၞာညးဍုၚ်ကွာန် PDF ဟီုလဴကဵု ဌာန်ပရိုၚ်သြၚ်လောန်တိုၚ်မ်ရ။
စနူကဵုအဝ်ဂတ် ၂၆ ပ္ဍဲကွာန် သ္ကုတ်ဂၠံၚ် ရေဝ်-ထဝါဲ ပွိုၚ်ဍုၚ်ဍာ်ဗု ကရောၚ်ပၞာန် ဒပ်ကဝ်မယှေန်ပၞာန် ထပက်ကၠုၚ်တုဲ ပေါဲဗတိုက်ၜါလပါ် ဒှ်အာဂှ်ရ ဒပ်ပံၚ်တောဲပၠန်ဂတးတံ ဗွဲယာယဳမာတ်ထောံလဝ် ဟွံကဵုအခေါၚ် စကာသုၚ်စောဲဂၠံၚ်ဏံရ။
ဆဂး ဟိုတ်နူ ညးဍုၚ်ကွာန်တံ ဒှ်ပရေၚ်အခက်အခုဲတုဲ စနူသိပ်တမ်ပါ ၆ အခိၚ်ဒေါဝ်တ္ၚဲဂှ် ကလေၚ်ပံက်အာကဵု သ္ကုတ်ဂၠံၚ် ရေဝ်-ထဝါဲရဂှ် ညးတာလျိုၚ်လဝေၚ်ပၞာန် နဲကဲဗျူဟာ ၃၃ သဝ်ဒါကို ဟီုရ။
အပ္ဍဲကာလ မာတ်လဝ်ဂၠံၚ်ဏံ ဒၟာနူအခက်အခုဲညးဍုၚ်ကွာန်တံ က္တဵုဒှ်အာဂှ် စိုတ်ဟွံမိပ်ဒှ်အာကီု ဟိုတ်နူအကာဲအရာ ပရေၚ်ပၞာန်တုဲ ပါဲဟွံဗၠး ဒးဖန်ဖက်အာဂှ်ရ နကဵုညးဍုၚ်ကွာန်တံ စွံကဵုဓရ်ကၠုၚ်ခၠၚ်ညိ အာတ်မိက်လဝ်ရ။
သ္ကုတ်ဂၠံၚ်ရေဝ်-ထဝါဲ ကလေၚ်ပံက်အာတုဲ ပ္ဍဲသိပ်တမ်ပါ ၆ အခိၚ်ဒေါဝ်တ္ၚဲဂှ် အကြာဒပ်ကဝ်မယှေန်ပၞာန်ကဵု ဒပ်ဂကောံပၠန်ဂတးတံ ပေါဲဗတိုက်ဆက်ဒှ်အာ ဗဒါဲကရပ် ကွာန်သာယာမန်ကီုလေဝ် ပရေၚ်ချိုတ်ဂျိုၚ် ဒးဘဲဝပ်တံဂှ် ဟွံဂွံတီဏီ။
ပ္ဍဲကာလ ဂၠံၚ်ကွဳစက် ရေဝ်-ထဝါဲမာတ်လဝ်ဂှ် ကွဳစက်ဖ္ဍိုက်ကပေါတ်ဗၞိက်တံကီု သီုကဵုကွဳစက်အာတရဴ ၅၀၀ မပြၚ် မာတ်ဆိုအ်အာတုဲ ခၞေဝ်ကေဝ်၊ ၚုဲကနာနာကဵု ကဴဗွဲမဂၠိုၚ် ကပေါတ်အုဲအေၚ်လောဲ စွံဟွံဒုၚ်တံ လီုလာ်အိုတ်တုဲ ဒးကၠဟ်ထောံလဝ် နွံရ။
ပရိုၚ်-သြၚ်လောန်တိုၚ်မ်
Photo – CJ