မတ်မလီု၊ သိပ်တမ်ပါ ၇
လ္တူပေါဲရုဲမာဲအလီ ကဝ်မယှေန်ပၞာန်ကၠောန်အာဏံ လ္ပစွံလဝ်တၚ်စၟဳစ ညံၚ်ဂွံဆက်တဝ်စၞေဟ်အာ နူကဵုသမဂ္ဂကွးဘာတက္ကသဵု မတ်မလီုတံ ဗတိုက်ဖအောဝ်ဏာ ညးဍုၚ်ကွာန်တံ ပ္ဍဲသိပ်တမ်ပါ ၅ ဂှ်ရ။
ပေါဲရုဲမာဲ ကဝ်မယှေန်ပၞာန် ကၠောန်အာဏံဝွံ အခိၚ်ဍေံတံစိုပ်မံၚ် ပရေၚ်ကြေပ်ဂြတ်နာနာသာ်တံဂှ် သွက်ဂွံဂၠာဲအာ ပၞော်တိတ်ပရေၚ်ကွာန် သက်သက်ရဒှ်တုဲ လ္တူကွးဘာညးဍုၚ်ကွာန်တံဂှ် စေတနာနွံမံၚ်ကဵု သွက်ပရေၚ်အပြံၚ်သၠာဲ ဖိတ်ဒရေဝ်ဒဳမဝ်ကရေသဳ ဟွံသေၚ်ရောၚ် သ္ဂးရ။
ပေါဲရုဲမာဲဝွံ ပူဂဵုဂကောံပၞာန် ဓဇက်ဖျေံသၟဝ်တံ၊ ရဲဝါဒ ဗက်ဍာ်သာ၊ ဗော်ဟၟဲပၟိက်ကဵု ဖိတ်ဒရေဝ်ဒဳမဝ်ကရေသဳကေုာံ ပရေၚ်ဗၠးၜးညးဍုၚ်ကွာန်တံ မိက်ဂွံပတိတ်စ ပရဲပရေၚ်ဍုၚ်ကွာန်တံရ ဒှ်မံၚ်ရောၚ် ပ္ဍဲလိက်လလောၚ်တြးဂှ် ချူလဝ်ရ။
အပ္ဍဲကဵု အရာပြိုၚ်ပကာန် ပရေၚ်ပၞာန်ကဵု ပရေၚ်ဍုၚ်ကွာန်တံ ဒှ်မံၚ်ဏံ ကၠောန်ကဵုပေါဲရုဲမာဲဟီုဂှ် သွက်ပၞော်တိတ်ဍေံတံဟေၚ် ဒှ်တုဲ ပေါဲရုဲမာဲဝွံ သဘဴပရေၚ်အာတ်မိက်အခေါၚ် သွက်ဂွံဍဵုဍိုက်ညးဍုၚ်ကွာန်၊ ပွမထိၚ်ချုက်သၟးဟွံက အခေါၚ်ပျဲပျာံဟၟဲကဵုဗဗွဲဓရ်တံ ဒှ်မံၚ်ရောၚ် ဥက္ကဌ သမဂ္ဂကွးဘာဂမၠိုၚ် တက္ကသိုလ်မတ်မလီု မာံတာန်သေန်ဥူ ဟီုရ။
“နကဵု ပရေၚ်ပၞာန်ဒှ်ဒှ် ပရေၚ်ဍုၚ်ကွာန်ဒှ်ဒှ် တၚ်ဍေံဇြဟတ်ခိုဟ် တၚ်ဇကုဇြဟတ်ခိုဟ် အပ္ဍဲပြိုၚ်ကၠောန်မံၚ်ဏံ သွက်ပၞော်တိတ်ဍေံတံ၊ သွက်ပၞော်တိတ်ညးဍုၚ်ကွာန်ဟွံသေၚ်ပုဟ် ဒှ်မံၚ်ဓနက်ဏောၚ်။ ပရေၚ်ဟွံလုပ်ဗဗွဲသၞောဝ်ဂှ် သဘဴဗီုပြၚ်လုပ်သၞောဝ် မိက်ဂွံဒှ်ဗွဲမလောန်တုဲ နကဵုပၞော်တိတ်မွဲ ကၠောန်အာ။ သောၚ်ဂှ်တှ်ေ အခေါၚ်ဍဵုဍိုက်ညးဍုၚ်ကွာန် ဗွဲမသၠးပွး၊ အခေါၚ်ထိၚ်ကြာပ် ဗွဲမဗၠးၜး၊ အခေါၚ် ပျဲပျာံဟၟဲကဵုဗဗွဲဓရ် ဂွံအာဗၠးဗၠးၜးၜးတံ သဘဴဍေံတံ အာတ်မိက်မံၚ်” သာ်ဝွံ သ္ဂးရ။
တုဲပၠန် ပေါဲရုဲမာကဝ်မယှေန်ပၞာန် ကၠောန်အာဏံဂှ် သွက်ပၞော်တိတ်ဍေံတံသၟး ဟွံကဏီ သွက်ညးဗက်လက်ကရဴ ဗော်ဍေံတံထံက်ဂလာန် ဍဵုဍိုက်ညးဍုၚ်ကွာန်တုဲ ညံၚ်ဍေံတံ ဂွံခိုဟ်စအာရဒှ်မံၚ်တုဲ ညးဍုၚ်ကွာန်သီုဖအိုတ် ညးဂွံဒစဵုဒစးအာ ပၟိက်ဇၞော်ကွေံ ညးဆက်ဟီုရ။
ကဝ်မယှေန်ပၞာန် ကၠောန်အာ ပ္ဍဲပေါဲရုဲမာဲအလီဏံ လ္တူပူဂဵု ကေုာံ ဗော်ပရေၚ်ဍုၚ်ကွာန် ပတိတ်ပရဲပရေၚ်ဍုၚ်ကွာန်တုဲ လုပ်ပြိုၚ်မံၚ်တံဂှ် နဒဒှ် သၞညးဍုၚ်ကွာန် ညးကလိဒုဟ်ဒဏ်ပၠန်ဂတး ခုတ်စၟတ်လဝ်ရောၚ် သ္ဂးရ။
လ္တူပေါဲရုဲမာဏံ နကဵုညးဍုၚ်ကွာန်တံ ညိလေဝ် လ္ပစွံလဝ် တၚ်စၟဳစတုဲ နူကဵု ဒးဆဵုဗဂမံၚ်ကဵု ပရေၚ်ကြေပ်ဂြတ်ခက်ခုဲနာနာတံ ညံၚ်ဂွံဗၠးၜးမာန် ပါဲနူပၠန်ဂတးဂှ် ဂၠံၚ်တၞဟ်ဟၟဲပုဟ် ဗတိုက်ဖအောဝ်လဝ်ရ။
ပေါဲရုဲမာဲ ကဝ်မယှေန်ပၞာန်သီအဝဵုဏံ ပ္ဍဲကဵုတွဵုရးမန်ဂှ် ဗော်ပျဳခိုၚ်ဖျိုဝ်၊ ဗော်(ပြည်သူ့ပါတီ၊ ပြည်သူ့ ရှေ့ဆောင်ပါတီ) ၊ ဗော်ညးဗြဴ (မန်)၊ ဗော်ညဳသၟဟ်မန် သီုဖအိုတ် ဗော်ပရေၚ်ဍုၚ်ကွာန် ၁၁ ဗော်တံ လုပ်ပြိုၚ်အာရောၚ် ဂွံတီလဝ်ရ။
ပရိုၚ်-သြၚ်လောန်တိုၚ်မ်
Photo – Social Media