ရေဝ်၊ သိပ်တမ်ပါ ၇
နကဵု ဗော်ဍုၚ်မန်တၟိ AD/ ဒပ်မန်ရာမညဝွံ ပေါဲရုဲမာဲအလီ ကဝ်မယှေန်ပၞာန်ဏံဂှ် နဲကဲစုၚ်ၚ် ဒစဵုဒစး ဟတိုက်ဟရိုဟ်အာရောၚ် မဒှ်တုဲ အပ္ဍဲကဵု ဒေသထိၚ်ချုက်လဝ်ကဵု ဒေသချဳဒရာၚ်မံၚ်တံ ကၠောန်အာပေါဲရုဲမာဲဂှ် ညိလေဝ်ဟွံဒုၚ်တဲပုဟ် လလောၚ်တြး ကဵုဏာသမ္တီရ။
လ္တူပေါဲရုဲမာဲ ကဝ်မယှေန်ပၞာန် ကၠောန်အာဏံဂှ် နူကဵု ဂကောံက္ဍိုက်က္ဍိုပ် ပရေၚ်ဍုၚ်ကွာန်၊ ပရေၚ်ပၞာန် ဗော်ဍုၚ်မန်တၟိ AD/ ဒပ်မန်ရာမည ပ္ဍဲကဵုသိပ်တမ်ပါ ၅ ပတိတ်ဏာလိက်လလောၚ်တြး သဘဴလစွံစိုတ်ရ။
ဒပ်ပၞာန်သီလဝ်အဝဵု နူကဵုသၞာံ ၂၀၂၁ တေံဂှ် နဒဒှ် ကဝ်မယှေန်ပၞာန် အပ္ဍဲကဵုသၞာံဏံ ဂိတုဂျူလိုၚ် ၃၁ ဂှ် ပြံၚ်သၠာဲဒက်ပတန်လဝ်တုဲ စိုပ်ဒဳဇြမ်ပါ ၂၈ မ္ဂး ကၠောန်အာပေါဲရုဲမာဲရောၚ် လလောၚ်တြးလဝ်ရ။
နကဵုပရေၚ်ဍုၚ်ကွာန်ကီု သီုကဵုပရေၚ်ပၞာန် ဗတိုက်သရိုဟ်အာ ပေါဲရုဲမာဲ မဒှ်တုဲ လ္တူဗော်လုပ်ပြိုၚ်အာတံဂှ် နဒဒှ်ဂကောံ ညးဆက်ဇမၠိၚ်အယုက် တၠအဝဵုပၞာန် ခုတ်စၟတ်သမ္တီအာရောၚ် ညးအခေါၚ်ဟီုဂးနွံ ဗော်ဍုၚ်မန်တၟိ AD/ ဒပ်မန်ရာမည နာဲဂံၚ်သ္ကာ ဟီုရ။
“ပေါဲရုဲမာဲဏံ နကဵုပရေၚ်ဍုၚ်ကွာန်ကီု ပရေၚ်ပၞာန်ကီု နဲကဲစုၚ်ၚ် ပိုဲတံ ဗတိုက်သရိုဟ်အာဏောၚ်။ ဗွဲတၟေၚ် ပ္ဍဲကဵုတွဵုရးမန် ဒၞာဲဒေသပိုဲထိၚ်ချုက်လဝ်တံကီု သီုကဵုဒၞာဲဒေသ ချဳဒရာၚ်မံၚ်ဂှ်ကီု ပရေၚ်ဏံ ညိလေဝ် ပိုဲဒုၚ်တဲဟွံမာန်ပုဟ်။ တုဲပၠန် ဗော်ပရေၚ်ဍုၚ်ကွာန်တံကီု ပူဂဵုလုပ်ပြိုၚ် ပေါဲရုဲမာဲတံကီု နဒဒှ်ဂကောံ၊ ပူဂဵု ကလေၚ်ပၠုပ်လမျီု သၞောဝ် ၂၀၀၈ ကဵု ညးဆက်ဟလိၚ်အယုက်တၠအဝဵုပၞာန်ဏောၚ် ပိုဲခုတ်စၟတ်အာ” သာ်ဝွံသ္ဂးရ။
ပေါဲရုဲမာဲ ကဝ်မယှေန်ပၞာန် ကၠောန်အာဏံဂှ် အခိၚ်ဍေံတံ ဆဵုဂဗမံၚ် ပရေၚ်ကြေပ်ဂြတ် ပရေၚ်ဍုၚ်ကွာန်၊ ပရေၚ်ပၞာန် နာနာသာ်တံဂှ် သွက်ဂွံ ဂါံၜက်အာမာန် ကေုာံ သွက်သ္ဂောံဂွံ ပရေၚ်သ္ပစၟတ်သမ္တီ ဍုၚ်ဂၠးကဝ်တံတုဲ ကၠောန်အာပေါဲရုဲမာဲအလီရောၚ် ပ္ဍဲကဵု လိက်လလောၚ်တြးဂှ် ချူလဝ်ရ။
ပေါဲရုဲမာဲဏံဂှ် ဒှ်သွက်ဂွံကလေၚ်ဟပၠုဟ်လမျီုကဵု သ္ဇိုၚ်သၞောဝ် ပရေၚ်အုပ်ဓုပ်ဍုၚ် ၂၀၀၈ ကေုာံ သၠောတ်တၠအဝဵုပၞာန် ညံၚ်ဂွံလုပ်ဗဗွဲဓရ် သွက်ဂွံဇမၠိၚ်အယုက် ဍိက်ပၞာန်ရဒှ်တုဲ ပရေၚ်ပဋိပက္ခအပ္ဍဲဍုၚ် ပဵုတုဲ ဘိုအ်ဂွံသ္ကာတ်မြဟ်တိုန်ရနွံမံၚ် ဒပ်မန်ရာမည ထံက်ထ္ၜးလဝ်ရ။
တုဲပၠန် ကုဗော်ပရေၚ်ဍုၚ်ကွာန်၊ ပူဂဵု မလုပ်ပြိုၚ်အာ အပ္ဍဲကဵုပေါဲရုဲမာဲဏံဂှ် စၟတ်သမ္တီဏာ နဒဒှ်ဂကောံ၊ ပူဂဵု ညးကလေၚ်ပၠုပ်လမျီု သ္ဇိုၚ်သၞောဝ် ပရေၚ်အုပ်ဓုပ် ၂၀၀၈ ကေုာံ ညးဆက်ဇမၠိၚ်အယုက် တၠအဝဵုပၞာန်ရောၚ် ကဵုလဝ်သမ္တီနွံရ။
အတိုၚ်စၟတ်လဝ်ဏံ နကဵုဒပ်မန်ရာမည ဗီုလဵုကေတ်အာအရေဝ် ထမံက်အာရုပ်ရဴနွံရော နကဵုဌာန်ပရိုၚ်သြၚ်လောန်တိုၚ်မ် သၟာန်ဏာဂှ် ဗွဲမကၠးဖ္ဍး ဗဗွဲသၞောဝ် လးထ္ၜးဏာလဝ် နာဲဂံၚ်သ္ကာ သ္ဂးရ။
နကဵုညးဍုၚ်ကွာန်မန်တံပၠန်လေဝ် သွက်ဂွံဇမၠိၚ်အာယုက်ဍိက် ညံၚ်ဟွံဂွံပါလုပ်အာ ပ္ဍဲကဵုပေါဲရုဲမာဲအလီ ကဝ်မယှေန်ပၞာန်ဏံတုဲ နနဲစုၚ်ၚ် ညံၚ်သ္ဂောံဒစဵုဒစးအာ ပေါဲရုဲမာဲဂှ် ဒပ်မန်ရာမည ဗတိုက်ဖအောဝ်လဝ်ရ။
မွဲလပါ်ပၠန် နကဵုဗော်ပရေၚ်ဍုၚ်ကွာန်တံဂှ်လေဝ် လ္တူပေါဲရုဲမာဲအလီဏံ လ္ပစၟဳမၚ်စမံၚ်တုဲ မွဲကရောံကု ညးဍုၚ်ကွာန်မန်တံဂှ် ဘိုၚ်ဒစဵုဒစး ဗတိုက်သရိုဟ်အာညိ ဗတိုက်ဖအောဝ်လဝ် ပ္ဍဲလိက်လလောၚ်တြးရ။
နကဵု ဗော်ဍုၚ်မန်တၟိ AD/ ဒပ်မန်ရာမညဂှ် ပ္ဍဲတွဵုရးမန် ပွိုၚ်ဍုၚ်ကျာ်မြဟ်၊ မုဟ်ဍုၚ်၊ ဇြပ်ဗုကဵု ရေဝ်တံကီု ပ္ဍဲရးတနၚ်သဳ ပွိုၚ်ဍုၚ်ဍာ်ဗု၊ တွဵုရးကရေၚ် ပွိုၚ်ဍုၚ်လှာဒကှ်ကဵု ကအ်ကြိက်တံ ချဳဒရာၚ်မံၚ် ပရေၚ်ပၞာန်ရ။
ပရိုၚ်-သြၚ်လောန်တိုၚ်မ်
Photo – NMSP-AD