ဗြဝတဳ၊ သိပ်တမ်ပါ ၉
ပ္ဍဲတွဵုရးကရေၚ် လပါ်သၠုၚ်ကျာဍုၚ်ဗြဝတဳ ဒၞာဲကရပ် ဍုၚ်လေဝ်ကေကဝ် မွဲဒမြိပ်ဂှ် နကဵုဒရုၚ်၊ လွဟ်ဇၞော်ကဵု ၜၚ်ကျာဖျေံဗုၚ်တံ ဒပ်ကဝ်မယှေန်ပၞာန် ဆက်ပန်ဗတိုက်မံၚ်တုဲ နူကဵုဗလးတိပၠန် ဘိုအ်ဂွံထပက် ကရောၚ်ပၞာန် ပလေဝ်ပလေတ်စလဝ်နွံမံၚ် နူကဵုတမ်ရိုဟ်ကၞက်ပရိုၚ်ဒေသတံ ဟီုလဴကဵုဌာန်ပရိုၚ် သြၚ်လောန်တိုၚ်မ်ရ။
ပ္ဍဲသိပ်တမ်ပါ ၆ ဂှ် ဒပ်ကဝ်မယှေန်ပၞာန် ကလေၚ်သီဂွံဏာ ဂၠံၚ်ဇၞော် ဗြဝတဳ-တေန်ဂါန်ညဳနံၚ်-ကအ်ကြိက်ကဵု ဒေသ တေန်ဂါန်ညဳနံၚ်တုဲ နူကဵုတမ်ဒပ် ဖျေံလဝ်သ္ဇိုၚ် ဗြဝတဳ ခလရ ၂၇၅ တံမွဲကဆံၚ် ထပက်ကရောၚ်ပၞာန် စိုပ်ကၠုၚ်လပါ် ကွာန် မေဝ်ကနေဝ်၊ မေဝ်ထဝ်တလေဝ်တံရဂှ် နူကဵုတမ်ရိုဟ်ကၞက်ပရိုၚ်ဒေသတံ ဟီုရ။
ပ္ဍဲကဵုသိပ်တမ်ပါ ၆ စနူအခိၚ်နူဂယးဂှ် ဒပ်ကဝ်မယှေန်ပၞာန် နကဵုဒရုၚ်ကာမဳကာဇေဝ် ဖျေံဗုၚ် ပ္ဍဲကဵုရုၚ်ဂဥုဲ ဍုၚ်လေဝ်ကေကဝ်တုဲ စမြိုၚ်ဒၞာဲရုၚ်ဂဥုဲတြေံ လီုအာကီုလေဝ် မၞိဟ်ဒးဘဲဝပ်ဟၟဲပုဟ် ညးဒေသတံဟီုရ။
ပ္ဍဲသိပ်တမ်ပါ ၇ သဝ်တ္ၚဲဂှ်ပၠန် ဒပ်ကဝ်မယှေန်ပၞာန် နူကဵုတမ်ဒပ်ခလရ ၂၇၅ မွဲကဆံၚ် ပန်ဟဍာၚ်ဏာလွဟ်ဇၞော် လပါ်ဇိုၚ်ဒဵုလက်ဟိုတ်တေံကီု ပ္ဍဲသိပ်တမ်ပါ ၈ အခိၚ်နူဂယးပၠန် ဒၞာဲအကြာ ဍုၚ်လေဝ်ကေကဝ်ကဵု ကွာန်(ရသေ့ဂူ) ဂှ် ၜၚ်ကျာပၞာန် ဖျေံဗုမ် ၅၀၀ ပံၚ် ၂ မကီုလေဝ် မၞိဟ်ဒးအာဘဲဝပ်ဟၟဲပုဟ် ညးဒေသတံဟီုရ။
ကရောၚ်ပၞာန် ဒပ်ကဝ်မယှေန်ဝွံ ပ္ဍဲသိပ်တမ်ပါ ၈ အခိၚ်နူဂယးဂှ် နူကဵုတမ်ဒပ် ခလရ ၂၇၅ မွဲကဆံၚ် စိုပ်ကၠုၚ်လပါ် ကွာန်မေဝ်ကနေဝ်၊ မေဝ်ထဝ်တလေဝ် တံတုဲ ကရောၚ်ပၞာန် ဘိုအ်ဂွံထပက်အာ လပါ်ဇိုၚ်ဒဵုလက်ဟိုတ်ကဵု ဍုၚ်လေဝ်ကေကဝ်တေံ နွံမံၚ် ညးဒေသဗြဝတဳတံ သ္ဂးရ။
လပါ်ဇိုၚ်ဒဵုလက်ဟိုတ်ကဵု ဍုၚ်လေဝ်ကေကဝ်တေံ ဟိုတ်နူကဵု ဒပ်ကဝ်မယှေန်ပၞာန် ထပက်ကရောၚ်ပၞာန်ဂှ်ရ ညးဍုၚ်ကွာန်တံ ဒးဂြိပ်ပါဲမံၚ် ဒၞာဲဗၠးဘဲတံနွံတုဲ သွက်ရဲဒဴပၞာန်တံ ပြဟ်ဟ်ဏံ နွံမံၚ်ပၟိက်ကဵု ပရေၚ်ရီုဗင်ဗစာရဏာမၞိဟ် အရာကာမံက်တိုန် က္တဵုဒှ်မံၚ်ရောၚ် ရဲကဵုအရီုဗၚ်ဘဲပၞာန်တံ ကဵုလဝ်သမ္တီနွံရ။
ဒပ်ကဝ်မယှေန်ပၞာန် ကလေၚ်သီဂွံဏာ ဂၠံၚ်ဇၞော် ဗြဝတဳ-ကအ်ကြိက်ကဵု တေန်ဂါန်ညဳနံၚ်တံတုဲ ဍုၚ်လေဝ်ကေကဝ် သၠုၚ်ကျာဍုၚ်ဗြဝတဳကီု ကရောၚ်ပၞာန် ဆက်ဂွံထပက်အာ လပါ် ဖလူ၊ ကုန်ဒဵုဗလံက်သဲတဝ် (စွယ်တော်အမြှောက်ကုန်း)၊ ကုန်ဒဵုလက်ဟိုတ်တံကဵု ဗဒိုပ်ဗျူဟာဝဝ်လေဝ် တံရောၚ် ဂွံတီရ။
ပရိုၚ်-သြၚ်လောန်တိုၚ်မ်
Photo – CJ