နေပျဳတဝ်၊ သိပ်တမ်ပါ ၉
တးပါဲကၠေံလဝ် ဆန္ဒကေုာံ ဒဒိုက်ညးဍုၚ်ကွာန် ဍုၚ်ဗမာတံတုဲ ဍုၚ်ဇိုၚ်ဝုတ်ဒိုဟ်ကဵု ဍုၚ်ဇၞော်လ္ၚဵုတံဂှ် လ္တူဂကောံပၞာန်သီအဝဵု နကဵုရုပ်ကီု စိုတ်ဓါတ်ကီု ထံက်ပၚ် ဒတူလိုၚ်ကဵုမံၚ်ဇြဟတ်တံဂှ် သွက်ဒပ်ပၞာန် PDF တံ ဒှ်တိုန်တၚ်ကော်ဆောရဂှ် နူကဵုဌာနဝန်ဇၞော်ပရေၚ်စဵုဒၞာ NUG ဟီုရ။
ပ္ဍဲကာလပၠန်ဂတးဏံ သွက်ဒပ်ပၞာန်စဵုဒၞာညးဍုၚ်ကွာန် PDF နွံမံၚ်သၟဝ်တဲ ဌာနဝန်ဇၞော်ပရေၚ်စဵုဒၞာ MOD အလဵုအသဳညဳသၟဟ်ကောန်ဂကူ NUG တံ တၚ်ကော်ဆောနွံမံၚ်ဖိုအ်ရောၚ် ပ္ဍဲလိက်ဒုၚ်စဳရေၚ် ပၞာန်ဒုၚ်ညးဍုၚ်ကွာန်တံ တဝ်စၞေဟ် ပေၚ်ပန်သၞာံ လလောၚ်ပတိတ်လဝ် ဂိတုသိပ်တမ်ပါ ၇ ဂှ် ချူလဝ်နွံရ။
ဂကောံပၞာန်ဂှ် ပွမပကောံကေတ်ကောန်ပၞာန် ဗွဲအဓ္ဓမတုဲ ကလေၚ်ထပေၚ်ဇြဟတ်မာန်ကၠုၚ်ကီု၊ စကာကၠုၚ်ဒရုၚ်မာန်ကီု ဒုၚ်သ္ဇိုၚ်ဂွံလဝ်မုက်ကဵု ဍုၚ်ဇၞော်ဇိုင်ဝုတ်ဒိုဟ်တုဲ ဒၞာဲကဵုမုက်ပၞာန်လ္ၚဵု ပကောံဇြဟတ် ကလေၚ်ပလန်ထပက်ကၠုၚ်လဝ်ပၞာန်မာန်ရောၚ် သ္ဂးရ။
တုဲပၠန် လ္တူဂကောံကောန်ဍုၚ်အရၚ်ရပ်လွဟ်တံ နကဵုဍုၚ်ဇိုၚ်ဝုတ်ဒိုဟ် ဟိုတ်နူ ကဵုဇြဟတ်ဟရိုဟ် ဘပဠ ကရေပ်ဓရပ်နာနာသာ်တုဲ ပ္ဍဲဒေသသၟဝ်ကျာ ဍုၚ်ဗမာ ပေါဲပၞာန်ဒေါအ်ဒေၚ်အာ မွဲအံၚ်ချိုန်ခဏဏံဂှ် ကေတ်အခေါင်အရာခိုဟ်တုဲ ဂကောံပၞာန် ကလေၚ်ပလန် ထပက်မံၚ်ပၞာန် ရောၚ် ပ္ဍဲလိက်ဒုၚ်စဳရေၚ်ဂှ် ချူလဝ်ရ။
တီလဝ်ဘိုအ်ဂွံဂွံဖဵုဂုဏ် မွဲဘိုအ်ရဟေၚ် ဍုၚ်လ္ၚဵုတံ ထေၚ်ၚ်လဵုလဵု လပါ်ဂကောံပၞာန် အခိၚ်ထံက်ဂလာန် ဒတူလိုၚ်ကဵုမံၚ်ဗီုဏံမ္ဂး နကဵုဂကောံဇြဟတ်ပၠန်ဂတး ညးဍုၚ်ကွာန်တံဂှ် ပဵုနူအခိၚ်ကၠာတေံတုဲ ၜါဆ ဒးဂစာန်လုပ်အာပေါဲဗတိုက်ရောၚ် MOD ဗတိုက်ဖအောဝ်လဝ်ရ။
ပ္ဍဲအကာဲအရာပြဟ်ဟ်ဏံ ဒၞာဲဒေသလ္ၚဵု ဂကောံပၞာန် ပြေင်ဇန်လဝေင်ပၞာန် ဗတိုက်ကၠုၚ်မံၚ်တံဂှ် နကဵုဂကောံဇြဟတ်ပၠန်ဂတးတံပၠန် စကာအာ ပၞာန်ဒမၠုက်၊ ပၞာန်ချဳဒရာၚ် ပၞာန်လုပ်ကေတ်ဒၞာဲ နကဵုဗျူဟာ ဂပ်ဂဝ်ထေက်ကြိုက် သုၚ်စောဲတုဲ နဲကဲပရိယာယ်ပၞာန်စုၚ်ၚ် ညံၚ်ဂွံကလေၚ် ဗတိုက်သၠေက်အာ မဒှ်ရ။
လပါ်ဒပ်ပၞာန်စဵုဒၞာညးဍုၚ်ကွာန်ဂှ် ပရေၚ်ဆဵုဂဗခိုဟ်ဟ်တံကဵု တင်ဂွံဇြဟတ်တံနွံမံၚ်တုဲ ကုဇၟာပ်ပ်သ္ဂံၚ်တံ နကဵုဗဂပ်စုတ်ကဵု လွဟ်ပေင်င်ဟွံမာန်ဏီ ကေုာံ သီုကဵုဇြဟတ်မကမ်တံ တၚ်ဍိုန်လျနွံမံၚ်ဏီရ။
တင်နွံပၟိက်ဇွောံမနာနာတံဂှ် သွက်ဂွံထပ်ဟပဵု ဗပေၚ်ကဵုမာန်ကီု ပရေၚ်ခန်လ္ၚတ် ညံၚ်ဂွံကိတ်ညဳစိုပ်တရဴကီု နွံမံၚ်ပၟိက်ကဵု တန်ဗတောန်နာနာ သၟးဟွံက သွက်ဂွံသၠုၚ်ပတိုန်အာ ဍိုက်ဒကေဝ်အစောန်ပၞာန်ဂှ်လေဝ် ပၟိက်ဇၞော်မံၚ်ဏီ ကဵုလဝ်သမ္တီရ။
တုဲပၠန် ပံၚ်တောဲအာကဵု ဂကောံမဟာမိတ်ပၠန်ဂတးတံတုဲ ပဵုနူကဵုအဆံၚ် ပရေၚ်လဝေင်ပၞာန်တံတုဲ သွက်ဂွံသၠုၚ်ပတိုန်အာ ပရေၚ်ပံၚ်တောဲ ရေၚ်တၠုၚ်အာ အဆံၚ်မဟာဗျူဟာတံဂှ် နွံမံၚ်ပၟိက်ကီု သွက်ဂွံမၚ်မွဲရံၚ်စံၚ်အာ ညးဍုၚ်ကွာန် ရဲဒဴပၞာန်တံဂှ်လေဝ် အစဳဇန်သွက်ဂွံစွံလဝ် သြန်ဂအုံတၞဟ်ခြာမွဲ နွံမံၚ်ပၟိက်ရောၚ် တၚ်ကော်ဆော MOD တံဂှ် ထံက်ထ္ၜးလဝ်ရ။
ပ္ဍဲကဵုပၞာန်ဒုၚ်ညးဍုၚ်ကွာန်တံ တဝ်စၞေဟ်မံၚ် အခိၚ်လၟုဟ် တမ်ဒပ် PDF ၃၅၆ ဒပ် ဒက်ပတန်မာန်တုဲ စပ်ကဵုပရေၚ်ကဵုအမိၚ်ကောပ်ကာဲတံဂှ် ရုၚ်သ္ကိုပ်ဌာန်ဂအုပ်ပၞာန်၊ ဌာနရးပၞာန်၊ ဌာနပၞာန်/နဲကဲဗျူဟာခရိုၚ် ကေုာံ တမ်ဒပ်ဂးတုဲ အဓိက ပရေၚ်ကောပ်ကာဲ နွံမံၚ်အဆံၚ် ၄ အဆံၚ်ရ။
ဒၞာဲတိဍာ် ပံၚ်တောဲလုပ်မံၚ်ပေါဲဗတိုက် ကုဂကောံမဟာမိတ်ပၠန်ဂတးတံဂှ် နဒဒှ် ဒေသပၞာန် ပံက်လဝ်မာန်ကီု၊ စွံလဝ် သၟဝ်ပရေၚ်ကောပ်ကာဲ ပွမလဝေၚ်ပၞာန်တုဲ ဒပ်ပၞာန်စဵုဒၞာညးဍုၚ်ကွာန် PDF ဂှ် သ္ကိုပ်ဒပ်မဟာမိတ်တံ ကေတ်တာလျိုၚ် ဒက်ပတန်လဝ် ဌာနရးပၞာန် ၁၀ ဒၞာဲမာန်ကၠုၚ် သ္ဂးရ။
မွဲလပါ်ပၠန် သွက်ဂွံဖန်ဗဂေတ်အာ ပရေၚ်အပြံၚ်အလှာဲပၠန်ဂတးမန်ဂှ် နကဵုအလုံမွဲဍုၚ် အသိၚ်အလိုန်ညဳညဳ သွက်ဂွံထပက်အာပၞာန် ပ္ဍဲဇၟာပ်ပ် ဒေသတံမာန် ကလေၚ်ပလေဝ်မံၚ် ဌာနဝန်ဇၞော်ပရေၚ်စဵုဒၞာ MOD ရဂှ် နူကဵုလိက်ဒုၚ်စဳရေၚ် ကဵုမံၚ်သမ္တီ ဂးရ။
ပရိုၚ်-သြၚ်လောန်တိုၚ်မ်
Photo – PDF