ၜဳလေၚ်၊ သိပ်တမ်ပါ ၉
ပ္ဍဲကဵုတွဵုရးမန် ဒၞာဲဒေသလ္ၚဵု ပရေၚ်ချဳဒရာၚ် ဇြဟတ်ပၠန်ဂတး တဴမံၚ်တံဂှ် ဗော်ပရေၚ်ဍုၚ်ကွာန် လုပ်ပြိုၚ်ပေါဲရုဲမာဲ ကဝ်မယှေန်ပၞာန်တံ ဗွဲမဂၠိုၚ် ဒးကၠတ်ပၞုက်ချဳဒရာၚ်မံၚ်ရဂှ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
ဒၞာဲဂကောံပၠန်ဂတး ဇြဟတ်ချဳဒရာၚ်ခိုဟ်တဴမံၚ် မပ္တံကဵု ပွိုၚ်ဍုၚ် ကျာ်ထဝ်၊ ၜဳလေၚ်၊ သဓီု၊ ကျာ်မြဟ်၊ ဇြပ်ဗု ကဵု ရေဝ်တံဂှ် ဗော်ပရေၚ်ဍုၚ်ကွာန် လုပ်ပြိုၚ်မာဲတံ ပရေၚ်စန်ဒက်ကဵု ပရေၚ်ချဳဒရာၚ်ဗော်တံ ညံၚ်ကဵုဟၟဲ အောန်မံၚ်ရ။
ပ္ဍဲဒေသတၞဟ်ဟ်တံပၠန် နကဵုဗော်လုပ်ပြိုၚ် ပေါဲရုဲမာဲကဝ်မယှေန်ပၞာန်တံဂှ် အာပံက်မံၚ်ရုၚ်ဗော်တံကီု စန်ဒက် ကောန်ဗော်တၟိတံကီု စနူကဵု ရုဲစှ်အလံၚ်ညးစၞးတံကီု ဖန်ဖက်ရေၚ်တၠုၚ်မံၚ် နွံရ။
ပရေၚ်ချဳဒရာၚ်ဗော် ပ္ဍဲဒေသဏံ ဟွံဆဵုညာတ်ကီုလေဝ် ပံက်မံၚ်ရုၚ်ဗော်သ္ၚိတ်တ်တံ နွံမံၚ်တုဲ ဒၞာဲကွာန်လ္ၚဵုတံဂှ် ဒဵုကဵုအခိၚ်လၟုဟ် ကံက်လဝ်စရၚ်မာဲ ဟၟဲဏီပုဟ် ညးဒေသၜဳလေၚ်မွဲတၠ ဟီုရ။
“ပရေၚ်ဗော်တံ ချဳဒရာၚ်မံၚ်ဂှ် အဲဟွံဂွံဆဵုဏီပုဟ်၊ ဒၞာဲဆော်ဟရံက်တေံဏံ ပံက်မံၚ် ခဒမ်ရုၚ်သ္ၚိတ်တ်ဇြဇြဂှ် ဆဵုလဝ်။ ဒၞာဲပိုဲ ၜဳလေၚ် စြေက်သၟဝ်ဏံ ဂၠံၚ်ဇၞော်ကွဳစက်နွံမံၚ်။ ပ္ဍဲလပါ်ကွာန် သၟဝ်ဂၠံၚ်ဇၞော်ကွဳစက်တံဂှ် စရၚ်မာဲ ဟွံကံက်လဝ်ပုဟ်။ မိၚ်လဝ် ရုၚ်မာဲလေဝ်ဟွံစွံပုဟ် ဂး” သာ်ဝွံ သ္ဂးရ။
တုဲပၠန် ပ္ဍဲပွိုၚ်ဍုၚ်ၜဳလေၚ် ဒၞာဲလ္တူဍုၚ်ဗွိုၚ်ညိညဂှ်ဟေၚ် ဂွေၚ်တုဲ အကာဲအရာ ဘိုအ်ဂွံကၠောန်အာ ဂွံဆဵုညာတ်မံၚ်တုဲ သွက်ဗော်လုပ်ပြိုၚ်မာဲတံ လ္တူဍုၚ်ဒၞာဲဍန်န်ဂှ် ကၠတ်တုဲ ဂံၚ်ချဳဒရာၚ်အာ ဒှ်မာန် ညးဆက်ဟီုရ။
စပ်ကဵုပေါဲရုဲမာဲတုဲ နူကဵုကဝ်မယှေန်ပၞာန် ပ္ဍဲကဵုဒေသ ထ္ၜးမံၚ်ဗီုပြၚ်စုတ်မာဲ နကဵုသၞောတ်ဒိဂျေတ်တေဝ်လ် နွံတုဲ နကဵုဗော်တံဂှ် ဖေက်အန္တရာဲညးတံတုဲ ထေၚ်ၚ်လဵုလဵု ဟွံဂံၚ်ချဳဒရာၚ်ဏီ ညးဒေသရေဝ်မွဲတၠ ဟီုရ။
“ပ္ဍဲပိုဲဏံ မုလေဝ်ဟၟဲဏီပုဟ်။ ညးလဵုလေဝ် မုလေဝ် ဟွံကၠောန်မွဲသာ်၊ ပ္ဍဲကဵုအရာပ်ဍေံတံ ဍေံတံစှ်ေတုဲ ဗက်ထ္ၜးပျးမံၚ်ကဵု ဗီုပြၚ်စုတ်မာဲ သၞောတ်ဒိဂျေတ်တေဝ်လ် ကၠောန်ပေါဲဆဵုဂဗတံ နွံမံၚ်။ ကၠောန်ပေါဲဆက်မိတ်တံ။ နကဵုဗော်တံဂှ် ဟီုမံၚ်ဟီုမံၚ်ရ ကွေံကွေံဂှ် မုလေဝ် ပရေၚ်ချဳဒရာၚ်ညးတံ ဟၟဲဏီပုဟ်။ အန္တရာဲသွက်ညးတံဂှ် ညးတံတီမံၚ်ဒှ်မာန်” သ္ဂးရ။
ဒၞာဲဒေသ ပွိုၚ်ဍုၚ် ကဝ်မယှေန်ပၞာန် ထိၚ်ချုက်လဝ်မာန်တံဂှ် ဗော်ပရေၚ်ဍုၚ်ကွာန် သွက်ဂွံလုပ်ပြိုၚ်မာဲဗွဲမဂၠိုၚ်တံဝွံ လၟေၚ်ပရေၚ်ကမၠောန် စပ်ကဵုပေါဲရုဲမာဲဂှ် ညးတံဆက်ကၠောန်မံၚ်ရ။
ပေါဲရုဲမာဲကဝ်မယှေန်ပၞာန် ကၠောန်အာဏံ ပ္ဍဲကဵုတွဵုရးမန်ဂှ် ဗော်ပျဳခိုၚ်ဖျိုဝ်၊ ဗော်(ပြည်သူ့ ပါတီ၊ ပြည်သူ့ရှေ့ဆောင်ပါတီ) ဗော်ညးဗြဴ (မန်)၊ ဗော်ညဳသၟဟ်မန် သီုဖအိုတ် ဗော်ပရေၚ်ဍုၚ်ကွာန် ၁၁ ဗော် သွက်ဂွံလုပ်ပြိုၚ်အာ နွံရ။
ပေါဲရုဲမာဲကဝ်မယှေန်ပၞာန် ကၠောန်အာဏံဂှ် ညံၚ်ဟွံဂွံပံၚ်တောဲ ပါလုပ်အာဂှ် နဲလဵုဒှ်ဒှ် ဂကောံဇြဟတ်ပၠန်ဂတးတံ ဒစးဒစဵုအာဏောၚ် ကဵုလဝ်သတိနွံတုဲ ဒၞာဲဒေသညးတံ ထိၚ်ချုက်လဝ်တံ ကၠောန်ပေါဲရုဲမာဲဂှ် ညိလေဝ် ဒုၚ်တဲဟွံမာန်ပုဟ် လလောၚ်တြးလဝ်ရ။
ပရိုၚ်-သြၚ်လောန်တိုၚ်မ်
Photo – Social Media