ဘာအၚ်၊ သိပ်တမ်ပါ ၁၀
ပေါဲရုဲမာဲကဝ်မယှေန်ပၞာန် ညံၚ်ဟွံဒှ် ဗော်သွးကောန်ဂကူကရေၚ် KNU ဒစဵုဒစးတဝ်စၞေဟ် ကၠောန်မံၚ်တုဲ ဒပ်ဗၠာဲသၟိၚ်ကောန်ဂကူကရေၚ်လေဝ် အတိုၚ်တာလျိုၚ်စှ်ေကၠုၚ်ဂှ် မွဲကရောံပံၚ်တောဲပါလုပ်ရေၚ်တၠုၚ်အာကီုရောၚ် နူကဵု ဌာန်ဂအုပ်ဗဟဵု KNU ဟီုဏာ ပ္ဍဲသိပ်တမ်ပါ ၉ ဂှ်ရ။
ပ္ဍဲလိက်သဝဏ် ဗော်သွးကောန်ဂကူကရေၚ် KNU ပလံၚ်ဗစိုပ်လဝ် ကု တ္ၚဲဒပ်ဗၠာဲသၟိၚ် ကောန်ဂကူကရေၚ် ၃၄ ဝါ ပ္ဍဲသိပ်တမ်ပါ ၉ ဂှ် ဟီုလဝ်ရ။
စနူအခိၚ်ပၞာန်သီအဝဵု သၞာံ ၂၀၂၁ ဂိတုဖေဖဝ်ဝါရဳ ၁ စပ္တံဒက်ပတန် ပံက်ဏာလဝ် ကံၚ်သဳပၞာန်ဂှ် ဟၟဲကဵုဗဗွဲဓရ် အုပ်ဓုပ်ကၠုၚ်လဝ်တုဲ စိုပ်သၞာံ ၂၀၂၅ ဂျူလိုင် ၃၁ ဂှ် နဒဒှ် ကဝ်မယှေန်ပၞာန် ပြံၚ်သၠာဲဒက်ပ္တန်ဏာတုဲ ညံၚ်ဂွံဒှ်အာ ဗဗွဲသၞောဝ် ဂစာန်ကၠောန်ကၠုၚ်ပေါဲရုဲမာဲရောၚ် ပ္ဍဲလိက်သဝဏ် KNU ချူလဝ်ရ။
ပေါဲရုဲမာဲဝွံ သောၚ်ကလးအာ ပြဿနာပရေၚ်ဍုၚ်ကွာန်တံ မာန်ဟွံသေၚ်တုဲ နကဵုကၠောန်အာ ပေါဲရုဲမာဲဂှ်လေဝ် ပဋိပက္ခအပ္ဍဲဍုၚ်တံ ပဵုတုဲ ညံၚ်ဂွံဇၞော်တိုန်အာကီု ပွမဖေက်လကိုတ်၊ ပွမဒှ်ဓဝိၚ်တံ က္တဵုဒှ်တိုန်ရောၚ် KNU သ္ဂးရ။
တုဲပၠန် ဗော်သွးကောန်ဂကူကရေၚ် KNU ဝွံ နူကဵုအလုံကောန်ဂကူပရေၚ် ဒးဒုၚ်ဍဵုဍိုက်လဝ်တံ ညံၚ်ဂွံဗၠးၜးအာ၊ အခေါၚ်သၠးပွး၊ အခေါင်အရာ ပရေၚ်တုပ်သၟဟ်၊ ပရေၚ်ကံကုသဵုဇကု ဇကုသွက်ဂွံဖန်ဖက်အာမာန် ပၞောဝ်ဗက်ကဵု လၟေၚ်ဇၟောဝ်ဍာ် ပရေၚ်ဍုၚ်တံဂှ် ဒးရေၚ်တၠုၚ်အာရောၚ် သ္ဂးရ။
အတိုၚ် သ္ဇိုၚ်သၞောဝ် ဂျနဳဗါကဝ် (Geneva Call) မခၞံလဝ် ပွမဒၞာတာ ပရေၚ်ပကီုပရာတ် ဆေၚ်စပ်ကဵုလိၚ် ကေုာံ ပွမပါ်ခြာ ပရေၚ်ၝောံကၟက် ညံၚ်ဂွံကၠေံ မပ္တံကဵုကတိကဝတ်တံဂှ် ၜိုတ်အစောန်နွံ ဒဂေတ်ဗက်ရေၚ်တၠုၚ် အာတုဲ ဒပ်ဗၠာဲသၟိၚ်ကောန်ဂကူကရေၚ်ဝွံ ပံၚ်တောဲကဵုညးဍုၚ်ကွာန်တံကဵု ပရေၚ်ကမၠောန် ဗော်မိ-KNU တံဂှ် ဘိုၚ်ရီုဗၚ်ကေတ်အာတာလျိုၚ်ရောၚ် သ္ဂးရ။
ဒပ်ဗၠာဲသၟိၚ်ကောန်ဂကူကရေၚ်ဝွံ သွက်ဂွံစဵုဒၞာအာ လမျီုပိုန်ဟာန် ဒြပ်ရတ် ညးဍုၚ်ကွာန် ကေုာံ သွက်ဂွံထမံက်အာရုပ်ရဴ ပရေၚ်အုပ်လဒမ်သၞောဝ်တံမာန် တာလျိုၚ်စပ်ကဵု ကဏ္ဍပရေၚ်ဂီုကၠီုတံဂှ် ညးဍုၚ်ကွာန်တံ ညံၚ်ဂွံရီုဗၚ်ပံၚ်တောဲ အာကဵု ဒပ်ဗၠာဲသၟိၚ်ကောန်ဂကူကရေၚ်ဂှ်လေဝ် ကိစ္စဇၞော်မံၚ်ရောၚ် ဌာန်ဂအုပ်ဗဟဵု KNU ဟီုဂးလဝ်ရ။
ပရိုၚ်-သြၚ်လောန်တိုၚ်မ်
Photo – KNU