ဍာ်ဗု၊ သိပ်တမ်ပါ ၁၀
ပ္ဍဲကဵုရးတနၚ်သဳ ပွိုၚ်ဍုၚ်ဍာ်ဗု ကွာန်ဍာ်တူ ဟိုတ်နူဒပ်ကဝ်မယှေန်ပၞာန် ပန်ဏာကဵုလွဟ်ဇၞော်တုဲ ကောန်ၚာ်မွဲတၠ ချိုတ်အာရဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ပ္ဍဲကဵုပွိုၚ်ဍုၚ်ဍာ်ဗု ဒပ်ကဝ်မယှေန်ပၞာန် ထပက်မံၚ်ကရောၚ်ပၞာန်ဝွံ ပ္ဍဲသိပ်တမ်ပါ ၈ အခိၚ်နူဂယး ၜိုတ် ၁၁ နာဍဳဂှ် ပန်ကၠဟ်ဖျေံဏာ လွဟ်ဇၞော်မွဲမ ဇရေၚ်အပ္ဍဲကွာန် ဍာ်တူရ။
ဟိုတ်နူဒပ်ကဝ်မယှေန်ပၞာန် ပန်ဏာကဵုလွဟ်ဇၞော်ဂှ် ကောန်ၚာ်ဗြဴ အယုက် ၃ သၞာံ နွံမံၚ်ပ္ဍဲသ္ၚိ ကွာန်ဍာ်တူဝွံ မွဲအလန်ဓဝ်ချိုတ်အာဒၞာဲဂှ်တုဲ ကိုဝေန်ယှိုဲ အယုက် ၄၀ သၞာံဂှ်လေဝ် ဒးအာဝပ်ရ။
ၜိုတ်အခိၚ်ဒေါဝ်တ္ၚဲဂှ် ကရောၚ်ပၞာန်ဏံ လုပ်စိုပ်ကၠုၚ်အပ္ဍဲကွာန်ဍာ်တူတုဲ လုပ်ဖျေံလဝ်ဒပ် ပ္ဍဲကဵုဘာဗတောန်လိက်ရ သာ်ဝွံ ညးဒေသတံဟီုတုဲ ဂွံတီရ။
တုဲကၠုၚ် ဂိတုသိပ်တမ်ပါ ၆ တေံဂှ်လေဝ် ပ္ဍဲကဵုပွိုၚ်ဍုၚ်ဍာ်ဗု ပေါဲဗတိုက်ကွာန်မြာၚ်ဂှ် တၠကွဳစက်ကဵု ညးဗက်ဍုတ်ကွဳစက်ဗၞိက် ၜါတၠတံ ကြေပ်အာ အကြာၜါလပါ်တုဲ ဒးဒုၚ်ပန်ချိုတ်အာလဝ် နွံရ။
စနူကဵုဂိတုတုဲကၠုၚ်တေံတုဲ ပ္ဍဲကဵုပွိုၚ်ဍုၚ်ဍာ်ဗုဂှ် ဟိုတ်နူဒပ်ကဝ်မယှေန်ပၞာန် ထပက်မံၚ်ကရောၚ်ပၞာန်ဂှ်ရ ပ္ဍဲကဵုကွာန်နွံမံၚ်သ္ကုတ်ဂၠံၚ် ရေဝ်-ထဝါဲတံ ပေါဲဗတိုက်အကြာၜါလပါ် ဆက်တုဲဒှ်ကၠုၚ်လဝ် မဒှ်ရ။
သတင်း – သံလွင်တိုင်းမ်
Photo – Social Media