မတ်မလီု၊ သိပ်တမ်ပါ ၁၀
ပ္ဍဲတွဵုရးမန် သွက်ကဝ်မယှေန်ပၞာန်သီအဝဵုတံ ရဲကဵုပရိုၚ်ဒပ်ပၞာန်ကဵု ဗၠာဲသၟိၚ်တံ ညးဒေသတံ ရဲဒစုက်ဒလူ ဒလာန်တံဝွံ လ္တူညးဍုၚ်ကွာန်တံ ကၠောန်မံၚ် ပွမသ္ပမာန်ဍဵုဍိုက် ပဵုဂၠိုၚ်တိုန်တုဲ အကာဲအရာပရေအ်မံၚ်ကွေံကွေံရောၚ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ကၠာဟွံစိုပ်ပေါဲရုဲမာဲ ပ္ဍဲအကြာအရာပ်ကဵုကွာန်တံဂှ် ဆဵုညာတ် မၞိဟ်ဟွံသင်ကာမ္ဂး ညံၚ်ဂွံကဵုပရိုၚ်ဗွဲမပြဟ် နူကဵုကဝ်မယှေန်ပၞာန် ကဵုကၠုၚ်လဝ် စၞောန်ပ္ညုၚ်နွံတုဲ လ္တူညးဍုၚ်ကွာန် သ္ပမာန်ပရေၚ်ဍဵုဍိုက်တံ ပဵုပရေအ်မံၚ် ကွေံကွေံရောၚ်။
ရဲကဵုပရိုၚ်ကု ဒပ်ပၞာန်ကဵုဒပ်ဗၠာဲသၟိၚ်တံဝွံ လ္တူညးဒေသတံဂှ် နဲကဲနာနာ ပယျာတ် အာတ်ကေတ်သြန်ကီု ဆဵုညာတ်အာ ကပေါတ်သေံဗက်ဟွံဂတာပ် ကပေါတ်ဟွံလုပ်သၞောဝ် ဂးတုဲ ကဵုဗက်ရပ်သီကေတ်ထောံဟွံက လ္တူရဲဟွံသင်ကာတံဂှ် ထ္ၜးဟိုတ်နာနာသာ်တုဲ ကဵုရပ်ကၠေၚ်ဒက်ဏာ ကၠောန်ကၠုၚ်လဝ်ရ။
ဗွဲကြဴဏံ စနူကဵု လ္တူရဲအာကၠောန်ကမၠောန်ဍုၚ်သေံတံဂှ်လေဝ် ရဲကဵုပရိုၚ်တံ အာတ်မိက်ကေတ်သြန်နွံမံၚ် သာ်ဝွံ ညးလ္တူဍုၚ်မုဟ်ဍုၚ်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ၝရဲကဵုပရိုၚ်တံဏံ ဍေံတံအာမံၚ်ကဵု ကွဳလိုန်ဓါတ်တုဲ ဗက်အာတ်မံၚ်သြန်။ အခိၚ်လၟုဟ် ကပေါတ်ဗၞိက် ကၠုၚ်နူသေံတံဂှ် တတ်ကၠောံလပါ်ဒဒန်ထီုမၠဵုဟွံဂွံတုဲ နကဵုဖံၚ် တတ်ကၠောံကြုၚ် ကၠုၚ်လပါ်ဏံ။ ဒးကၠောံကဵုဖံၚ်တုဲ နူဂှ်မွဲအဆံၚ် ကွဳစက်ဒးထပ်ကလေၚ်ဖ္ဍိုက်ကပေါတ်တံဂှ် ဍေံတံဗက်အာတ်သြန်။ ဗွဲကြဴ လ္တူရဲအာဍုၚ်သေံဂှ်လေဝ် ရဲကဵုပရိုၚ်တံ ဗက်အာတ်စသြန်နွံမံၚ်” သာ်ဝွံ သ္ဂးရ။
တုဲပၠန် ရဲကဵုပရိုၚ်ဒပ်ပၞာန်ကဵု ဒပ်ဗၠာဲသၟိၚ်တံဂှ် ဍေံတံမွဲတၠဓဝ်ကီု ဗီုပြၚ်ဂကောံ ကီု ကောံတုဲပယျာတ်ကေတ် အာတ်သြန်နွံမံၚ်တုဲ ကဵုလှုဲဟွံမာန်မ္ဂး ကဵုရပ်ဏာရောၚ် ပရေၚ်ဘပဠတံ နွံမံၚ်ရ။
ရဲကဵုပရိုၚ်တံဂှ် ပဵုတုဲ ဟွံသ္ပကာကဵုမၞိဟ်ဒေသတံသၟးဟွံက ဟဳရံၚ်ဒးအာ မုက်မတ်ဍေံတံဂှ်မှ ဍေံတံကောံတုဲ ၜုၚ်တက်ကၠုၚ်လဝ်နွံကီုလေဝ် ဒၞာဲဂွံတေၚ်အမှုဟၟဲပုဟ် ညးသ္ဂးရ။
“ရဲကဵုပရိုၚ်တံ ဟီုကဵုအရေဝ်ခတ်တှ်ေ အနာံမုက်(ဒလန်)တံရ။ ၝတံဏံ ပဵုပရေအ်တိုန် ညိလေဝ်ဟွံသ္ပကာကဵုမၞိဟ်ပုဟ်။ ပဵုတုဲ ဗက်ဂၠာဲတိုန်ဟလာန်။ ၝတံဏံ ၜိုတ်လဵုလောန်ကာဲၜက်တိုန်ရော ဟီုတှ်ေ နူတနေံတေံ ပ္ဍဲကဵုဂၠံၚ်ပန်သွာၚ်ပိုဲဏံ ရပ်မံၚ်ကွဳလိုန်ဓါတ်ဂှ် ရဲကဵုပရိုၚ်ဒပ်ဗၠာဲသၟိၚ်ကဵု ပျူသဝ်ထဳတံသၟးရ။ လိုၚ်သေန်ဟၟဲလေဝ်ရပ်။ လိုၚ်သေန်နွံဂှ် စၟဳစၟတ်။ ဂၠာဲမံၚ်ဟလာန် နာနာသာ်ရ။ အာတ်သြန်၊ လၟုဟ်ပဵုတုဲ ပရေအ်ကၠုၚ်၊ ရံၚ်ဒးအာ မုက်ဍေံတံဂှ် မုရောဂးတုဲ ဂၠာဲဟလာန် ဍေံတံကောံတုဲ ၜုၚ်တက်မၞိဟ်တံ” သာ်ဝွံ သ္ဂးရ။
တုဲပၠန် ရဲကၠောန်မံၚ်ကမၠောန်ကဵုပရိုၚ်ကု ဒပ်ပၞာန်၊ ဗၠာဲသၟိၚ်တံဝွံ ဟွံသင်ကာဂးတုဲ ထ္ၜးဟိုတ်နာနာ ကဵုဗက်ရပ်မံၚ်သၟတ်ဗၠာဲတံကီု မွဲလပါ်ပၠန် ဗက်အာတ်မံၚ်သြန်ကဵု ရုၚ် KTV, ဆေၚ်စသုၚ်စၞ၊ ဆေၚ်စတိုဝ်တံဟွံက စနူကဵုဆေၚ်ဖျာတံလေဝ် နဲကဲဗီုပြၚ်နာနာ ဗက်အာတ်စမံၚ်လှုဲတံ နွံမံၚ် ညးဆက်ဟီုရ။
နကဵုထ္ၜးဟိုတ်ပရူပရာ နာနာသာ်တုဲ ရဲကဵုပရိုၚ်တံ ဗီုပြၚ် အာတ်ဗက်ကေတ်မံၚ်သြန် တံဏံဂှ် ယဝ်ရအာတေၚ်မ္ဂး ရဲသၟဝ်တဲ ကဝ်မယှေန်ပၞာန်တံ ပရေၚ်ကေတ်ကဵုအရေဝ်ဟၟဲ သၟးဟွံက သီုကဵု ဒးဒုၚ်ပၞောတ်လဝ်စိုတ်ကဵု ရဲကဵုပရိုၚ်တံမာန်ရောၚ် ညးဒေသတံ သ္ဂးရ။
အခိၚ်ကၠာတေံ လ္တူရဲကဵုပရိုၚ် နွံမံၚ်ဒေသတံဂှ် နူကဵုဂကောံဇြဟတ်ပၠန်ဂတးတံ နကဵုနဲကဲသၞောတ်ဒမၠုက် ကေၚ်ကၠောန်ကၠုၚ် ပရေၚ်ပသောၚ်သ္အးအနာံမုက် ဒလန်ဏံ နွံလဝ်တုဲ ထေၚ်ၚ်လဵုလဵု ဍေံတံဟွံဂံၚ်ကၠောန်ကီုလဝ် ဗွဲကြဴဏံ က္ဍိုပ်ဍေံတံ ကလေၚ်ယာတိုန်ပၠန်ရ။
ပ္ဍဲကဵုတွဵုရးမန် မွဲကာလသီလဝ်အဝဵုဏံ ညးကဵုပရိုၚ်ဒပ်ပၞာန်၊ ဗၠာဲသၟိၚ် လၟိဟ်နကဵုကၠမ် ဒးဒုၚ်ပသောၚ်ဏာလဝ်နွံတုဲ ပ္ဍဲဒၞာဲဒေသ ပရေၚ်ချဳဒရာၚ် ဒပ်ပၠန်ဂတးဇြဟတ်တဴတံဂှ် ဗွဲမဂၠိုၚ် ဒးဒုၚ်ပသောၚ်ၚးတးအာလဝ် နွံရ။
ပရိုၚ်-သြင်လောန်တိုၚ်မ်
Photo – MOI/CJ