နေဗျဳတဝ်၊ သိပ်တမ်ပါ ၁၀
နူကဵု ကံၚ်သဳစဵုဒၞာကောန်ဂကူကေုာံ ပရေၚ်ဂီုကၠီု ကဝ်မယှေန်ပၞာန်တံ ပွမထပ်ကော်ဘိက် ဂုဏ်ဖဵုသွက်ကၟိန်ဍုၚ်ဂးတုဲ ကု PDF တံကီု ဂကောံရပ်လွဟ်တံ သွက်ဂွံပံၚ်တောဲအာကဵုဒပ်ပၞာန် အကြာဂကောံဇြဟတ် ပၠန်ဂတးတံဂှ် စကာသုၚ်စောဲကၠုၚ်မံၚ် ဗျူဟာပါ်ဒကးဆီရ။
CRPH ကဵု NUG တံဂှ် ဒက်ပတန်လဝ် PDF တုဲ သွက်သ္ဂောံဂွံလွဟ်မကမ် တံမာန် ပၠုပ်စုတ်စွံလဝ် သၟဝ်ဂကောံ EAO လ္ၚဵုတံ ဂးရ။ တုဲပၠန် သွက် EAO လ္ၚဵုတံ ညံၚ်ဂွံသၠဲအာတိဍာ်ပၠန်ဂှ် နဒဒှ်လေံဒုက် ပွမစကာသုၚ်စောဲလဝ် PDF တံတုဲ ဒးဒုၚ်ကဵုကၠုၚ်လဝ် ဘဝတံရောၚ် စောဲစပ်လဝ်ရ။
အခိၚ်လၟုဟ်ဏံ ဟိုတ်နူပွမပံၚ်တောဲရေၚ်တၠုၚ် အလဵုအသဳကဵု ဍုၚ်ဇိုၚ်ဝုတ်ဒိုဟ်တံဂှ်ရ ပရေၚ်ဒတူလိုၚ်မံၚ်စံၚ်တန်တဴ သွက် EAO လ္ၚဵုတံ ဝါတ်ဂါတ်ကၠုၚ်တုဲ PDF တံလေဝ် ပဵုတုဲ စိုပ်အာဒဒိုက်ရဂှ် ပ္ဍဲကဵုလိက်ကော်ဘိက်ဂှ် ချူထမံက်လဝ်ရ။
ပၟိက်စိုတ် CRPH, NUG တံဝွံ ဍေံတံဟေၚ် ဒှ်မံၚ်အလဵုအသဳ ဒုၚ်ရုဲစှ်လဝ်ရောၚ် ပရေၚ်ဒတူလိုၚ်ဍေံတံ ညံၚ်ဟွံဂွံကၠေံကၠက်အာဂှ် ရုဲစှ်လဝ် ဂၠံၚ်ဍာန်ရပ်လွဟ်တုဲ ဟိုတ်နူကဵု ပရေၚ်ဍေံတံပလီုပထုဲမံၚ်ဂှ်ဟေၚ် ဂၠံၚ်တရဴဒဳမဝ်ကရေသဳ မ္ဒးဒေါအ်ဒေင် အိၚ်ဇိၚ်အာလဝ်ရောၚ် ပတိုန်လဝ်ဒုဟ်ရ။
တုဲပၠန် ပရေၚ်ဒဳမဝ်ကရေသဳ အာမံၚ်လပါ်ကလေၚ် ဟီုဂှ် ဒၟာနူ ဂၠံၚ်တရဴရပ်လွဟ်ရောၚ် လညာတ်ဍာံ ညံၚ်ဟဳမၠာ်ရံၚ်အာ စိုပ်မံၚ်အခိၚ်ယျဂှ် ကဝ်မယှေန်ပၞာန် ချူစုတ်ဟီုဂးလဝ် ပ္ဍဲလိက်ကော်ဘိက်ရ။
သွက်ဂွံကုတ်ထပိုတ် ပိုက်တမ်ရိုဟ်ကၞက် သၞောတ်တၠအဝဵုပၞာန် ညံၚ်ဂွံ ကၠေံကၠက်အာ ဂကောံဇြဟတ်ပၠန်ဂတးသီုဖအိုတ်တံ ကောံကလောအ် ညဳသၟဟ်မှဒှ်မာန်ရောၚ် ဒပ်ပၞာန်ကၠိုဟ်ခၠၚ်တုဲ စကာသုၚ်စောဲကၠုၚ် ဗျူဟာ ပါ်ဒကးဆီရောၚ် ဥူနေဘုၚ်လာတ် ညးအခေါၚ်ဟီုဂးနွံ အလဵုအသဳညဳသၟဟ်ကောန်ဂကူ NUG ဟီုရ။
“ပ္ဍဲကဵုဍုၚ်ဗမာ ညံၚ်ဂွံထပိုတ်တမ်ရိုဟ်ကၞက် သၞောတ်တၠအဝဵုပၞာန် ဂွံကၠေံကၠက် သွက်ဂွံကၠောန်အာမာန်ဂှ် ပိုဲ NUG PDF CRPH NUCC တံသၟးဟွံက ဂကောံဇြဟတ်ပၠန်ဂတး ERO သီုဖအိုတ် ကောံကလောအ်ညဳသၟဟ်မှ ဒှ်မာန်ရောၚ် ဒပ်ပၞာန်ပကီုပရာတ်တံ ကၠိုဟ်ခၠၚ်လဝ်ပေၚ်ၚ်ဏောၚ်။ ဟိုတ်နူဍေံတံ ကၠိုဟ်ခၠၚ်လဝ်ခိုဟ်ဟ်တုဲ ပရေၚ် ဗျူဟာပါ်ဒကးဆီဏံ ဍေံတံစကာသုၚ်စောဲလဝ် စေအ်အ်ရ။ လၟုဟ်ဍေံတံဟီုဏာ လက်ကြဴအိုတ်ဏံဂှ်လေဝ် အရေဝ်ပါ်ဒကးဆီ အကြာ ERO တံကဵု PDF တံရ” သာ်ဝွံ သ္ဂးရ။
လ္တူပွမစရၚ်မာဲမှာရာ က္တဵုဒှ်လဝ် ပ္ဍဲကဵုပေါဲရုဲမာဲ ၂၀၂၀ တေံ ညံၚ်ဂွံသောၚ်ကလးကဵု တးပါဲထောံ လ္တူတၚ်အာတ်မိက်ဂှ်တုဲ သွဟ်ပေါဲရုဲမာဲကဵု ညံၚ်ဂွံကော်စၠတ်ထဝ် ဂစာန်ကၠောန်ကၠုၚ်လဝ် ဗွဲအတၚ်အဓ္ဓမရောၚ် စောဲစပ်စုတ်လဝ် ပ္ဍဲတၚ်ကော်ဘိက်ဂှ်ရ။
ပွမဟွံဓရ်ယာ မာဲတံဂှ် နကဵုဒပ်ပၞာန် စၟဳစၟတ်ထမံက်ပတိတ်တုဲ သွက်ဂွံကလေၚ်ကၠောန်ကဵု ပေါဲရုဲမာဲ မၞုံကဵုပရေၚ်ဓရ်ယာသၠးပွးမာန် အတိုၚ်သ္ဇိုၚ်သၞောဝ်ဥပဒေ နကဵုဂအုပ်ဒပ် ရပ်စပ်စကာကၠုၚ်လဝ် အဝဵုဍုၚ်ရောၚ် သ္ဂးရ။
ဟိုတ်ဂှ်ရ PDF တံကီု သီုကဵု ဂကောံဇြဟတ်ရပ်လွဟ်တံကီုဂှ် ပေါဲရုဲမာဲကၠောန်အာအကြာဏံ လောန်ၜက်အာတုဲ အတိုၚ်ညးဂမၠိုၚ်စၟဳစလဝ် သွက်ဂွံဒက်ပတိုန်အာ ကၟိန်ဍုၚ် ဒုၚ်လဝ်သ္ဇိုၚ်ကဵု သၞောတ်ဒဳမဝ်ကရေသဳကေုာံ ဖိတ်ဒရေဝ်တံမာန်ဂှ် ညံၚ်ဂွံကလေၚ်လုပ်ကၠၚ် ဗွိုၚ်သၞောဝ်ဥပဒေ မ္ဒးကော်ဘိက် ဂးရ။
နွံပၟိက်ကဵု စိုတ်ဆန္ဒပရေၚ်ၜိုဟ်လမ်တုဲ ကော်ဘိက်ဟွံသေၚ် ကော်ဘိက်မံၚ် သွက်ဂွံထ္ၜးစသက်က်ရောၚ်ဂှ် သ္ကိုပ်ဌာနပရေၚ်စဵုဒၞာ တလနာဲ ကံၚ်သဳဖိတ်ဒရေဝ် ဍုၚ်မန် MSFC ထံက်ထ္ၜးရ။
ဟိုတ်ဂှ်ရ သ္ဂံၚ်ပၠန်ဂတးတံ လုပ်ဖျေံလွဟ်အောန်တုဲ ကောန်ပၞာန်နူကဵု ဒပ်ပၞာန်တံရ လုပ်ကၠုၚ်မံၚ်လပါ် ဒပ်ပၠန်ဂတးတံနွံ သ္ဂးရ။
“ကောန်သ္ဂံၚ် လုပ်မံၚ်ပ္ဍဲပရေၚ်ပၠန်ဂတးတံ အာလုပ်ဖျေံလွဟ် အပ္ဍဲ စကစဟီုဂှ် အောန်ကွေံကွေံ ကြပ်ဟၟဲမံၚ်။ ဆဂး နူကဵုကံၚ်သဳပၞာန်တံဂှ်ရ ပ္ဍဲပေါဲဗတိုက်ကီု နူကဵုတမ်ဒပ်တံကီု ကေတ်အဆက်ကဵု ဒပ်ပၠန်ဂတးတံတုဲ ကၠုၚ်ဖျေံလဝ်လွဟ်ဂှ် နွံတၟဂလိုၚ်။ လၟိဟ်နွံကဵုလ္ၚီ။ ရံၚ်အာပရေၚ်ဏံတှ်ေ ပရေၚ်ကော်ဘိက် ကံၚ်သဳပၞာန်တံဂှ် ဒှ်အာသၟးသၟးရ။ ပြဟ်ဟ်ဏံ ပရေၚ်ဍာံဍာံကွေံကွေံဟီုဂှ် ကောန်ပၞာန်နူဒပ်ပၞာန်ဍေံတရ ပြံၚ်လုပ်ကၠုၚ်မံၚ် လပါ်ဒပ်ပၠန်ဂတးရနွံ” သာ်ဝွံ သ္ဂးရ။
ဒုၚ်သ္ဇိုၚ်ကဵု သၞောတ်ဒဳမဝ်ကရေသဳကေုာံ ဖိတ်ဒရေဝ်တုဲ သွက်ဂွံဒက်ပတန်အာ ကၟိန်ဍုၚ်ဇၞော်မာန်ဂှ် အလဵုအသဳ၊ ညးဍုၚ်ကွာန်၊ ဒပ်ပၞာန်ကဵု ဗော်ပရေၚ်ဍုၚ်ကွာန်တံဟွံက PDF တံလေဝ် နွံမံၚ်ပၟိက်ကီုတုဲ ရန်တၟံတုပ်မံၚ်ညးသ္ကံရောၚ် ကဝ်မယှေန်ပၞာန် တြးလဝ်ဝါဒရ။
ပံၚ်တောဲအာကဵု အလဵုအသဳ၊ ဒပ်ပၞာန်တံတုဲ ဖဵုကၟိန်ဍုၚ် ဂုဏ်ဖဵုဒေသ သွက်ဂွံထမံက်အာရုပ်ရဴ ဆန္ဒနွံမ္ဂး ညးမွဲဓဝ်ကီုဒှ်၊ နကဵုဂကောံကဵုဒှ် ဒၞာဲဗဒိုပ် ဒပ်ပၞာန်ကြပ်အိုတ်တံ၊ ဇရေၚ်သၞာဲဒါဒေသတံ ကေတ်အဆက် ပညဳပ္ညပ်မာန်ရောၚ် ချူလဝ်ရ။
ပရိုၚ်-သြၚ်လောန်တိုၚ်မ်
Photo – PDF