ကျာ်ထဝ်၊ သိပ်တမ်ပါ ၁၁
ပ္ဍဲကဵုတွဵုရးမန် ပွိုၚ်ဍုၚ်ကျာ်ထဝ် အပ္ဍဲကွာန်ဂြိုပ်သၠဗြာတ်( ငှက်ပျောတောရွာ) ဒၞာဲကမၠောန် ခါဲမံၚ်က္တိုၚ်ထဝ် ၆ ဒၞာဲ ဒပ်ပၞာန် လုပ်ဍိုက်သီကေတ်လဝ်တုဲ ရပ်ဏာသၟာကမၠောန် ၅၀ ပြၚ်နွံ ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ဒပ်ကဝ်မယှေန် ဇြဟတ်ၜိုတ် ၁၀၀ ပြၚ်တံဝွံ ပ္ဍဲသိပ်တမ်ပါ ၉ ၜိုတ်အခိၚ်နူဂယး ၁၀ နာဍဳဂှ် ဒၞာဲကမၠောန်ခါဲမံၚ်က္တိုၚ်ထဝ် ယၟုနွံမံၚ် “ဂျစ်တူး၊ အငယ်ကောင်၊ သိန်းရွှေ၊ ဦးဖြူလေး၊ ကောင်းထက်ဇော်” ၆ ဒၞာဲ အပ္ဍဲကွာန်ဂြိုပ်သၠဗြာတ်( ငှက်ပျောတောရွာ) နကဵုဇြဟတ် လုပ်ဍိုက် သီကေတ်ဏာလဝ်ရ။
အပ္ဍဲဒပ်ပၞာန် လုပ်သီကေတ်လဝ်ဏံ ကောန်သၟာကမၠောန်ထဝ်တံ သၟးဟွံက စက်တုက်တိ ဘတ်ဟိုဝ် ၂ မ၊ ကွဳလိုန်ဓါတ် ၁၀ မကဵု ကပေါတ်စကာ ပရေၚ်ကမၠောန်ဆက်တံဂှ်လေဝ် သီကေတ်ဏာတုဲ ဗွဲယာယဳရဲထိၚ်စွံလဝ် ကောန်သၟာကမၠောန်တံ ပ္ဍဲကဵုဗဒိုပ်ဗၠာဲသၟိၚ် ကမောန်ချံၚ် (ကင်မွန်းချောၚ်း)ရဂှ် ဂၠိုက်ဂၠာဲဂွံတီလဝ်ရ။
တၠကမၠောန်ထဝ်တံဂှ် ဟိုတ်နူကဵုလဝ်အကံက် ဇရေၚ်ကဝ်မယှေန်ပၞာန်၊ ကဵုမံၚ်အကံက်အခေါန်ကဵု ဗော်သွးကောန်ဂကူကရေၚ် KNU မဟာဒပ်(၁) ခရိုၚ်သဓီုတုဲ ဟိုတ်နူၜံက်ခါဲမံၚ်ထဝ်တံ ဒှ်မာန်ရဂှ် ညးဍုၚ်ကွာန်တံ သ္ဂးရ။
ပ္ဍဲကဵုပွိုၚ်ဍုၚ်ကျာ်ထဝ်ကဵု ၜဳလေၚ်တံဂှ် ဒၞာဲကမၠောန်က္တိုၚ်ထဝ် ဟွံအောန်နူ ၃၀၀ နွံတုဲ ရဲကဵုလဝ်အကံက်ကဵု လပါ်ကဝ်မယှေန်ပၞာန်လေဝ်နွံ ရဲကဵုလဝ်အကံက်ကဵု လပါ် KNU တံနွံတုဲ ကၠောန်မံၚ်ကမၠောန်ၜံက်ခါဲတံရ။
ပ္ဍဲသၞာံအာ ဂိတုအံက်တဝ်ပါ ၃၀ ဂှ်လေဝ် ပ္ဍဲကဵုပွိုၚ်ဍုၚ်ကျာ်ထဝ် အကြာကွာန် မေဝ်ယုၚ်ကျီကဵု မေဝ်ယုၚ်လေဝ်တံ အခိၚ်ဒပ်ပၞာန်လုပ်ကၠုၚ်လဝ်တေံ ရပ်ဏာ ကောန်သၟာကမၠောန်ခါဲထဝ်ကဵု ရဲကၠအ် ၜိုတ် ၃၀ တံနွံကီု ဂွံတီနူ ညးဒေသတံရ။
ပရိုၚ်-သြၚ်လောန်တိုၚ်မ်
Photo – Social Media