ဂျေရုသလေန်-သိပ်တမ်ပါ ၁၀
ပ္ဍဲဂါဇာ ရပ်လဝ်မၞိဟ်ဒးဒုၚ်လဝ်ပးသီုဖအိုတ်တံ ဒးကလေၚ်ဗလးကဵု တၚ်တုပ်စိုတ်မွဲတၚ်ဏံ နကဵုဟာမာတ်သ် ဒးဒုၚ်တဲရောၚ် သမ္မတအမေရိကာန် ဒဝ်နေဝ်ထရ ဟီုဏာတုဲ ယဝ်ရဟွံဖျေံလွဟ်မ္ဂး ဒးဆဵုဂဗအာကဵု ပွမလေၚ်ဒေက်အလုံအိုဿီုရောၚ် သ္ကိုပ်ဝန်ဇၞော်ပရေၚ်စဵုဒၞာ အေတ်သရေဝ် ဟီုဏာ ပ္ဍဲသိပ်တမ်ပါ ၈ ဂှ်ရ။
ပ္ဍဲဒေသအေသရေသီဂွံလဝ် ဒၞာဲစၟတ်တိုၚ်ကွဳစက်မွဲ ဟိုတ်နူသၟာလွဟ်တံပန်တုဲ မၞိဟ် ၅ တၠ ဒးဒုၚ်ချိုတ်လဝ်နွံ နူဌာနကာမံက်တိုန် အေသရေဝ် ဟီုရ။
ပ္ဍဲသိပ်တမ်ပါ ၇ ဂှ် အလုံဒေသ မၞိဟ် ၄၈ တၠ ချိုတ်အာလဝ်တုဲ အခိၚ်ဗတမ် ဟိုတ်နူအေတ်သရေ ဗတိုက်လဝ်ဂှ် မၞိဟ် ၁၀ တၠ ချိုတ်အာနွံ အေဂျေန်သဳပရေၚ်စဵုဒၞာလပါ်အရာပ် ဂါဇာသဳတဳ ဟီုလဝ်ရ။
သမ္မတအမေရိကာန် ဒဝ်နေဝ်ထရ တၚ်ကဵုသတိ လက်ကြဴအိုတ် တိတ်ကၠုၚ်တုဲ ခြာဟွံလံဂှ်
သွက်ဂွံပညဳပညပ် မၚ်မံၚ်ရ ဂကောံဟာမာတ်သ် ဟီုကၠုၚ်လဝ်နွံရ။
သွက် မၞိဟ်ဂစိုတ်မၞိဟ်ကဵု ရဲမုဒိင်ဟာမာတ်သ် နွံမံၚ်ပ္ဍဲ ဟဝ်တေဝ် ဒုၚ်စရှ်သာ ဍုၚ်သအာၚ်တံ တင်ကဵုသတိ လက်ကရဴအိုတ်ရ၊ ကလေၚ်ဗလးကဵုနၚ် ပးဒၞန်တံတုဲ ညံၚ်ဂွံဖျေံလွဟ်၊ ဟွံဖျေံမ္ဂး ဒးဒုၚ်ပလီုကၠေံ ဂါဇာရောၚ်၊ အလုံအိုဿီု ဒးဒုၚ်ပလီုကၠေံရောၚ် သ္ကိုပ်ဝန်ဇၞော်ပရေၚ်စဵုဒၞာ အေတ်သရေဝ်ကာဇ် ချူလဝ် လ္တူမဳဒဳယာပရေၚ်မၞိဟ် X ညးတေံရ။
ပရေၚ်ပေါဲပၞာန်ညံၚ်ဂွံဒေါအ်အာ ဍုၚ်ဂမၠိုၚ် ၜိုန်ရကဵုဇြဟတ်ဟရိုဟ်လေဝ် အေသရေ သၠုၚ်ပတိုန်လဝ် အသိၚ်ပေါဲဗတိုက်တုဲ ဒၞာဲစမြိုၚ်အထပ်သၠုၚ် နွံမံၚ်ဂါဇာသဳတံဂှ် ညံၚ်ဂွံလှေက်စှ်ေအာလ္တူတိ သွက်ဂွံသီဗတိုက်ကေတ်မာန် ပလေဝ်စမံၚ်ယျ။
တ္ၚဲဏံ လ္တူဗလးအကး ဂါဇာသဳတဳဂှ် လဗိုတ်ကျာဇၞော် ဟာရဳကုၚ် ဗတိုက်ကၠုၚ်ရောၚ် ဝန်ဇၞော်အေသရေ ချူလဝ် လ္တူ X ညးတေံရ။
ပ္ဍဲဂါဇာ ပးဒၞန် ၄၇ တၠ သှ်ေမံၚ်ဏီတုဲ အပ္ဍဲဏံ ချိုတ်အာ၂၅ တၠယျ ပတေဟ်စလဝ် အေတ်သရေ ဟီုဂးလဝ်ရ။
ပ္ဍဲဂါဇာ အေသရေ ဖန်ဖက်ၜက်ၜေတ်မံၚ် ပရေၚ်ဂစိုတ်မၞိဟ်ကမၠက်ဂကူရောၚ် တၚ်ကဵုသတိနာနာ တိတ်မံၚ်ကီုလေဝ် သွက်ဂွံသီကေတ်အာ ဂါဇာသဳတဳမာန်ဂှ် အေတ်သရေ သၠုၚ်အသိၚ် ဂစာန်မံၚ် မဒှ်ရ။
Ref:AFP