မတ်မလီု- သိပ်တမ်ပါ ၁၁
ဗော်ပရေၚ်ဍုၚ်ကွာန်ဂွံလဝ်အခေါၚ် ဗီုဗော်ညးဗြဴ(မန်) ကီု နဒဒှ် ဗော်ပရေၚ်ဍုၚ်ကွာန် ဂွံလဝ်စၟတ်သမ္တီဗော် ၄ ဗော်တံဂှ် ပလီုထောံ နူကဵုဗော်ပရေၚ်ဍုၚ်ကွာန်တံရ သာ်ဝွံ ကဝ်မယှေန်ပေါဲရုဲမာဲကၟိန်ဍုၚ် ကဝ်မယှေန်ပၞာန် ပ္ဍဲသိပ်တမ်ပါ ၉ လလောၚ်ပတိတ်နၚ်ရ။
ဗော်ညးဗြဴ(မန်) ၊ ဗော် (အမျိုးသားနိုင်ငံရေးဒီမိုကရက်တစ်၊ ဗော် ပြည်ထောင်စုလယ်သမား အလုပ်သမားအင်အားစုပါတီ)တံ နကဵု ဥပဒေ ဗော်ပရေၚ်ဍုၚ်ကွာန်ဂမၠိုၚ် ပွမသ္ပစၟတ်သမ္တီ ၝောံပိုဒ် ၅၊ ၝောံပိုဒ်ပါ်(ဇ) အတိုၚ်စၟတ်လဝ် ဟိုတ်နူပံက်ရုၚ်ဟွံမာန်တုဲ ပလီုထောံ သ္ဂးလဝ်ရ။
နကဵု ဥပဒေ ဗော်ပရေၚ်ဍုၚ်ကွာန်ဂမၠိုၚ် ပွမသ္ပစၟတ်သမ္တီဂှ် ယဝ်ရဒှ် ဗော်စန်ဒက်အလုံကၟိန်ဍုၚ်မ္ဂး လၟိဟ်ကောန်ဗော် အောန်အိုတ် ၅၀၀၀၀ ဒနွံတုဲ ပၞောဝ်ကဵုပွိုၚ်ဍုၚ်သီုဖအိုတ်မ္ဂး ဒးပံက်လဝ် ရုၚ်ဗော်ရောၚ် ခၞံလဝ်ပ္ဍဲဥပဒေနွံရ။
ရုၚ်ဗော်ပံက်လဝ်တံဂှ် အတိုၚ်စၟတ်လဝ်ဟွံကဏီ လၟိဟ်ပဵုၜက်မံၚ်ဏီ၊ လၟိဟ်ကောန်ဗော်တံလေဝ် ဂၠိုၚ်ၜက်ပဵုမံၚ်နူကဵု စၟတ်လဝ်တံနွံမံၚ်ကီု ဟိုတ်နူပရေၚ်ထစုက်ဓလူ ဒိုဟ်စုၚ်နွံကၠုၚ်တုဲ ဒးဒုၚ်ပလီုဏာ ဗော်ရောၚ် ဥက္ကဌဗော်ညးဗြဴ(မန်) မိလျိုၚ်မန် ကော် မိတာယှေန် ဟီုရ။
“ပ္ဍဲနေပျဳတဝ် ပတိုန်ကဵုလဝ်စုၚ်ၚ်လေၚ်ၚ်ရ။ ရုၚ်လေဝ် ၜက်လဝ်ပေၚ်မံၚ်ရ။ လၟိဟ်ကောန်ဗော်လေဝ် ပေၚ်မံၚ်။ ညးတံစၟဳစၟတ်တုဲ ကလေၚ်ကဵုနၚ်လိက်။ ပေၚ်မံၚ်ဂး။ ပံက်လဝ်ရုၚ် ၁၁၀ ရုၚ်ပြၚ်မံၚ်။ ပွိုၚ်ဍုၚ်ကီု သီုဖအိုတ် ပေၚ်မံၚ်သီုဖအိုတ်ရ။ လၟိဟ်ၜက်မံၚ်ဏီ။ ဆဂး ဗော်ပြိုၚ်ပကာန်မံၚ်ကဵုပိုဲ ဂၠိုၚ်မံၚ်။ အေဗီုဂှ်ရ ဗော်မိက်ဂွံၜုၚ်ဖျေံပိုဲတံဂှ် ထပက်ဓလူ ပေၚ်မံၚ်ဒိုဟ်စုၚ်တုဲ ပိုဲဒးဒုၚ်အာ။ နကဵုအဲညာတ်ဂှ် ပွမခၠန်ဗဂေတ်မတ် ပရေၚ်ဍုၚ်ကွာန်ရ” သာ်ဝွံ သ္ဂးရ။
လ္တူဒးဒုၚ်ပလီုဏာဗော်ဏံ သွက်ဂွံဆက်ပတိုန်ထ္ၜးသဳကၠဳအာ ကဝ်မယှေန် ပေါဲရုဲမာဲကၟိန်ဍုၚ် သၟဝ်တဲကဝ်မယှေန်ပၞာန်နွံတုဲ ဗော်သွက်ဂွံတန်တဴအာမာန် ဆက်ကၠောန်အာရောၚ် မိလျိုၚ်မန် ဟီုရ။
စနူသၞာံ ၂၀၁၄ တေံ စဒက်ပတိုန်ကၠုၚ်လဝ် ဗော်ညးဗြဴ(မန်) တုဲ ၜိုန်ရလုပ်ပြိုၚ် ပေါဲရုဲမာဲ ၂၀၁၅ ကဵု ၂၀၂၀ ကီုလေဝ် မွဲဒၞာဲမှ ကေၚ်ဂွံဇၞးလဝ်မာဲ ဟၟဲကၠုၚ်ရ။
စိုပ်ပ္ဍဲလက်ထက် ဂကောံပၞာန်သီအဝဵုဏံ ဗော်ညးဗြဴ (မန်) ကလေၚ်ပတိုန်စၟတ်သမ္တီဗော်တုဲ ပ္ဍဲသၞာံ ၂၀၂၃ ဂိတုဂျောန် ၂၃ ဂှ် ကလေၚ်ဂွံကၠုၚ် စၟတ်သမ္တီဗော်ပၠန်ရ။
ဆဂး နူကဵု ကဝ်မယှေန်ပေါဲရုဲမာဲကၟိန်ဍုၚ် ကဝ်မယှေန်ပၞာန် နကဵုစၟတ်တ္ၚဲ ဂိတုသိပ်တမ်ပါ ၉ ဂှ် ပလီုထောံ ဗော်ညးဗြဴ (မန်) နဒဒှ် နူကဵုဗော်မွဲရ။
ဂိုတ်ဂစာန်လုပ်ပြိုၚ်မံၚ် ပေါဲရုဲမာဲကဝ်မယှေန်ပၞာန်ဂှ်တှ်ေ သွက်ဗော်ဂွံဇၞးမာဲဟွံသေၚ်၊ သွက်ဗော်ဂွံဆက်တန်တဴအာ ဍာ်ဇမၠိၚ် ကၠောန်သ္ပရေၚ်တၠုၚ်အာရောၚ် ဥက္ကဌဗော်ညးဗြဴ(မန်) မိလျိုၚ်မန် ကော် မိတာယှေန် ဟီုလဝ်ကဵု ဌာန်ပရိုၚ် သြင်လောန်တိုၚ်မ်ရ။
ပရိုၚ်-သြၚ်လောန်တိုၚ်မ်
Photo – ဗော်ညးဗြဴ(မန်)