ကျာ်ထဝ်၊ သိပ်တမ်ပါ ၁၂
ပ္ဍဲကဵုတွဵုရးမန် ပွိုၚ်ဍုၚ်ကျာ်ထဝ် နူကဵုကွာန်ဂြိုပ်သၠဗြာတ် ဒပ်ကဝ်မယှေန်ပၞာန် ရပ်ဏာလဝ် သၟာကမၠောန်ခါဲထဝ် ၃၀ ပြၚ်ဂှ် သွက်ဂွံယိုက်ဂၠေၚ်ဝန်ပၞာန် ကော်ဏာယျရောၚ်ဂှ် ညးကြပ်ကဵု ဗ္ဒိုပ်ဗၠာဲသၟိၚ် ကေန်မောန်ချံၚ်တံ ဟီုကဵု ဌာန်ပရိုင်သြၚ်လောန်တိုၚ်မ်ရ။
နူကဵုဒၞာဲက္တိုင်ထဝ် ဧက ၂၀၀ နွံကရပ်ကွာန်ဂြိုပ်သၠဗြာတ် ပ္ဍဲဂိတု သိပ်တမ်ပါ ၉ အခိၚ်နူဂယး ၜိုတ် ၁၀ နာဍဳဂှ် ဒပ်ကဝ်မယှေန်ပၞာန်တံ လုပ်ရပ်သၟာကမၠောန် ၜိုတ် ၅၀ ပြၚ် ကော်ဏာတုဲ ပလံၚ်ဗစိုပ်လဝ် ပ္ဍဲကဵုဗ္ဒိုပ်ဗၠာဲသၟိၚ် ကေန်မောန်ချံၚ်ရ။
စိုပ်အခိၚ်ဗ္တံဂှ်တှေ် သွက်ဂွံယိုက်ဂၠေၚ်ဝန်ပၞာန်ဂးတုဲ အပ္ဍဲကဵုမၞိဟ်ရပ်ထိၚ်လဝ်တံဏံ ၜိုတ် ၃၀ ပြၚ်ဂှ် ဖ္ဍိုက်ပတိုန်လ္တူ ကွဳစက်ပၞာန်တုဲ ပလံၚ်ဗစိုပ်ဏာ ဇရေၚ်ဘာကွတ်ပၞာန် စၟတ် ၆ ဍုၚ်မတ်မလီု သ္ဂးရ။
အပ္ဍဲကဵုမၞိဟ်ဒးဒုၚ်ရပ်လဝ်တံဏံ ရဲကၟိန်သ္ၚိဌာန်ညးတံ ရုဲစှ်ပတိတ်ဏာ ၉ တၠ မာန်တုဲ၊ မၞိဟ်သှ်ေမံၚ်တံဂှ် ၜိုန်ရ ကလေၚ်နုက်ကေတ်ကဵု သြန်လေဝ် ဟွံကလေၚ်ဗလးကဵုတုဲ ပလံၚ်ဗစိုပ်ဏာ ဍုၚ်မတ်မလီုရဂှ် ညးကြပ်ကဵု ဗ္ဒိုပ်ဗၠာဲသၟိၚ်မွဲတၠ ဟီုရ။
သွက်ဂွံယိုက်ဂၠေၚ်ဝန်ပၞာန် နဒဒှ်ကောန်ပၞာန်တၟိ ဒးဒုၚ်ပလံၚ်ဏာ လၟုဟ်တံဂှ်တှ်ေ ရဲနူလပါ်ရးဒေသဗဂေါကဵု ရဧရာဝတဳ ကၠုၚ်ကၠောန်မံၚ်ကမၠောန် ၜံက်ခါဲထဝ်တံရဂှ် ဂွံတီရ။
အပ္ဍဲကဵုရဲဒးဒုၚ်ရပ်လဝ်တံမ္ဂး ညးဗြဴ၊ ညးတြုံအယုက်ဇၞော်ဇၞော်တံကီု ကောန်ၚာ်အယုက်ဟွံပေၚ်တံဂှ် ဒပ်ကဝ်မယှေန်ပၞာန် ကလေၚ်ဗလးကဵုလဝ် သ္ဂးရ။
ပ္ဍဲကဵုသိပ်တမ်ပါ ၉ ဂှ် ဒပ်ကဝ်မယှေန်ပၞာန် ဇြဟတ်ၜိုတ် ၁၀၀ တံ ထပက်ကၠုၚ်ကရောၚ်ပၞာန်တုဲ လုပ်ရပ်ဏာ ဒၞာဲကမၠောန်က္တဵုထဝ် “ဂျစ်တူး၊ အငယ်ကောင်၊ သိန်းရွှေ၊ ဦးဖြူလေး၊ ကောင်းထက်ဇော်” ၆ ဒၞာဲရ။
အခိၚ်ရပ်ကော်ဏာဂှ် သီုကဵုသၟာကမၠောန် ကွဳစက်တုက်တိဘက်ဟိုဝ် ၂ မ၊ ကွဳလိုန်ဓါတ် ၁၀ မကဵု ကပေါတ်ကရိယာဆက်စပ်နာနာတံ သီကေတ်ဏာတုဲ ညးဒးဒုၚ်ရပ်တံကဵု ကပေါတ်တံသီုဖအိုတ်ဂှ် ပလံၚ်ဗစိုပ်ဏာလဝ် ဗ္ဒိုပ်ဗၠာဲသၟိၚ် ကေန်မောန်ချံၚ် မဒှ်ရ။
ပရိုၚ်-သြၚ်လောန်တိုၚ်မ်
Photo – KIC