မတ်မလီု၊ သိပ်တမ်ပါ ၁၂
ပ္ဍဲကဵုတွဵုရးမန် ကပေါတ်ဗၞိက်သေံဗွဲမဂၠိုၚ်တံဂှ် ထ္ၜးဟိုတ် ကၠောန်မံၚ် ပရေၚ်ကူသာန်ဗၞိက်ဂးတုဲ ရပ်သီကေတ်လဝ်တံဂှ် သ္ကိုပ်ဝန်ဇၞော် တွဵုရးမန် ပါ်တြးပရအ်ကဵုမံၚ် ကောန်သ္ဂံၚ်ကဝ်မယှေန်ပၞာန်တံရဂှ် ညးကြပ်ကဵုကဝ်မယှေန်ပၞာန်တံ ဟီုလဴကဵု ဌာန်ပရိုၚ်သြင်လောန်တိုၚ်မ်ရ။
ကပေါတ်ဗၞိဟ်သေံ ရပ်သီဂွံလဝ်တံဝွံ သ္ကိုပ်ဝန်ဇၞော်တွဵုရးမန် ဥူအံၚ်ကျဳတိၚ် ဖျေံလာပ်ပတိုန်စရာဲကု ကောန်သ္ဂံၚ်ဒပ်ပၞာန် ဂွံလဝ်ပေါဲအံၚ်ဇၞးတံ နကဵုကပေါတ်စၞစသုၚ်နာနာ တက်က္ဍိုပ်လိက်တုဲ ပ္ဍဲသိပ်တမ်ပါ ၁၀ ဂှ် ပ္ဍဲကဵုရုၚ်အလဵုအသဳ တွဵုရးမန် ကၠောန်ပေါဲတြးဝါဒ အာပ်ပြာပ်ကဵုလဝ်ရ။
အပ္ဍဲဏံ ကပေါတ်ဗၞိက် ဗဗွဲဓဝ်ဟွံသေၚ်ဂးတုဲ ရပ်ဂွံလဝ် ကပေါတ် ပတိတ်နူဍုၚ်သေံ မပ္တံ ခၞံဟကှ်နာနာ၊ ကကဠာ၊ ကဝ်ဖဳမေတ်နာနာ ကပေါတ် ၇ ဂကူ ပါ်ပရအ်ကဵုဏာ ကွက်ၚုဟ်မး ၂၈၀၀ ကိုတ် ပြၚ်နွံရောၚ် သ္ဂးရ။
နူကဵုကဝ်မယှေန်ပၞာန် ပါ်ပရအ်ကဵုဏာ ကပေါတ် သွက်သ္ဂံၚ်ဍေံတံဟီုဂှ် ဒှ်မံၚ်ကပေါတ်သေံ ရပ်ဂွံသီကေတ်လဝ်တံဒှ်တုဲ လၟုဟ်ပၠန်လေဝ် ဟိုတ်နူဆက်ရပ်မံၚ်ဂှ်တှ်ေ ရဲတၠကမၠောန်ဗွဲမဂၠိုၚ်တံ ဒှ်မံၚ်အကာဲအရာ ဒးပြံၚ်ကမၠောန်ရောၚ် သၟာဗၞိက်မွဲတၠ ဟီုရ။
“လၟုဟ် ရပ်ဂွံလဝ်ကပေါတ် ဟွံသာပုဟ်၊ သှ်ေမံၚ်တံဂှ်လေဝ် ရပ်ဂွံလဝ် ဟွံအောန်ပုဟ် မၞိဟ်တံ ဟွံဂံၚ်ကၠောန်စရ၊ ဒှ်အာဗီုဏံရ၊ မုကပေါတ်လေဝ် ဟွံလုပ်ကၠုၚ်ရ၊ မုလေဝ် ဟွံဒှ်ရပုဟ် အေဒှ်မံၚ်ဟဏံ၊ သွံလ္တူအန်လာၚ် ဟွံဂွံပုဟ်၊ ဖျာအန်လာၚ်ဗွဲမဂၠိုၚ် မာတ်အိုတ်ယျ၊ ပကန်ကပေါတ်လေဝ်ဟွံဂွံ၊ ဗကန်ကပေါတ်ဟွံဂွံတှ်ေ မုဂွံသွံအာရော။ မုလေဝ်သွံဟွံဂွံရပုဟ်၊ ပိုဲတံလေဝ် ဒးပြံၚ်ကၠောန်အာကမၠောန်တၞဟ်ဏောၚ် တၠကမၠောန်ဗွဲမဂၠိုၚ် သွက်ဂွံပြံၚ်ကမၠောန်ဂှ် ချပ်မံၚ်အိုတ်ယျ” သာ်ဝွံ သ္ဂးရ။
တုဲပၠန် ကပေါတ်ဗၞိက်သေံဗွဲမဂၠိုၚ်တံ ပွမကၠောန်မံၚ် ပရေၚ်ကူသာန်ဗၞိက်ဂှ် ထ္ၜးဟိုတ်တုဲ ညးဒေသတံ ညံၚ်ဟွံဂွံစကာ ကၠောန်မံၚ်တုဲ ကလေၚ်ပါ်ပရအ်ကဵုမံၚ် ကောန်သ္ဂံၚ်ဍေံတံ ဗီုဗီုတံဏံဂှ် ဒှ်ဟွံထေက်ကီု ညံၚ်ကဵု ဗီုပြၚ် ဒးကလေၚ်ရာန်ကေတ်မံၚ် နူကဵုကောန်ပၞာန်ဍေံတံ ဒှ်မံၚ်ရဂှ် ညးပါ်ပါဲလဝ်ရ။
ပြဟ်ဟ်ဏံ ဒပ်ကဝ်မယှေန်ပၞာန်တံဂှ် ကပေါတ်သေံ စနူကဵုကပေါတ် စၞစသုၚ်သ္ဇိုၚ်ကီု သီုဖအိုတ် ပ္ဍဲကဵုဒၞာဲလုပ်တိတ်ဍုၚ်တံဂှ် ဗက်ရပ်မံၚ်ကီု၊ ပ္ဍဲဒၞာဲသၞေဟ်ကၚ်တံလေဝ် ဗက်ရပ်မံၚ်ဟွံက ဒဵုကဵုဒၞာဲဆေၚ်ဖျာ တံလေဝ် ဗက်ရပ်သီကေတ်မံၚ် နွံရ။
ဟိုတ်နူ ရဲသၟဝ်တဲကဝ်မယှေန်ပၞာန်တံ ဟိုတ်နူဗက်ရပ်မံၚ် ကပေါတ်ဗၞိက်သေံတံဂှ်တုဲ ပ္ဍဲဗွဝ်ဖျာဂမၠိုၚ် ကပေါတ်နူဍုၚ်သေံ ပိုတ်မံၚ်အိုတ်တုဲ အနှေန်ၚုဟ်ကပေါတ်တံလေဝ် သၠုၚ်တိုန်အာရ။
မွဲလပါ်ပၠန် သ္ကိုပ်ဝန်ဇၞော်တွဵုရး ကဝ်မယှေန်ပၞာန်ခါန်ကၞက် ဥူအံၚ်ကျဳတိၚ်ဝွံ ပ္ဍဲအတးလောန်ကၠုၚ်ဏံလေဝ် ကၞာထးညး ညံၚ်ဂွံဂဵုမြဟ်မိပ်ဇြိပ်ဂှ် ရပ်သီကေတ်လဝ် ဗဳယာလုပ်ကၠုၚ် နူဍုၚ်သေံတံတုဲ ပါ်ပရအ်ကဵုလဝ်နွံမံၚ် ညးဒေသတံ ဟီုရ။
ကၠောန်မံၚ်ပရေၚ်ကူသာန်ဗၞိက်ထ္ၜးဟိုတ်တုဲ ရပ်ဂွံလဝ် ကပေါတ်ဗၞိက်တံဂှ် နကဵုဍုၚ်ပိုၚ် သီကေတ်တုဲ နကဵုပရေၚ်ကမၠောန် ဌာနအကံက်အခေါန်နာနာတံ ထေက်ကဵုဒးကၠောန်အာကီုလေဝ် ဗီုပြၚ်ပါ်ပရအ်ကဵုဏာ ကောန်သ္ဂံၚ်ပၞာန်တံ ဗီုတံဏံဂှ်တှ်ေ သွက်ဘဏ္ဍာဍုၚ် ပရေၚ်ယုတ်ဒေက်နွံမံၚ်ရောၚ် တၠပညာပရေၚ်ပိုန်ဒြပ်တံ သ္ဂးရ။
ပ္ဍဲကဵုတွဵုရးမန်ဂှ် မပ္တံ ဗၞိက်စၞစသုၚ်နာနာ၊ ကပေါတ်မၞိဟ်သုၚ်စောဲ၊ ဂဥုဲနာနာ၊ ကပေါတ်ကျိုၚ်ကျဝ်၊ ကပေါတ်သိုၚ်ခၞံနာနာ စနူကဵု ကပေါတ်ဗၞိက် စကာနာနာအိုဿီုတံဂှ် အဓိက ဒးပတေဟ်မံၚ် ကပေါတ်ကၠုၚ်နူဍုၚ်သေံတံတုဲ ဟိုတ်နူကဝ်မယှေန်ပၞာန် ဗက်ရပ်မံၚ်ဂှ်တှေ် ညးဂမၠိုၚ်တံ ဒှ်အခက်အခုဲအိုတ်ရ။
ပရိုၚ်-သြၚ်လောန်တိုၚ်မ်
Photo – MOI