မတ်မလီု၊ သိပ်တမ်ပါ ၁၂
(Geedge Networks-ဂျီးစ် နက်ဝေါ့) ဂကောံပၞာန်တံဂှ် ကေတ်လဝ် နဲကဲပညာ မၚ်ရံၚ်ထံၚ်ပရိုၚ် ကာန်ပနဳ Geedge Networks မချိက်လဝ်ကဵု အလဵုအသဳကြုက်တုဲ ကၠောန်သ္ပဖန်ဇန်မံၚ် ပရေၚ်လဝေၚ်ပၞာန် ဒိဂျေတ်တေဝ်လ် ပ္ဍဲကဵုဍုၚ်ဗမာရ ဂှ် Justice For Myanmar (JFM) ထမံက်ပတိတ် နၚ်ရ။
ကာန်ပနဳ Geedge Networks အဆက် အလဵုအသဳကြုက်ကေုာံ ကာန်ပနဳ “မြန်မာတယ်လီကွန်း” တံ ကဵုမံၚ်အရီုဗၚ်ဇြဟတ်ကဵု ပရေၚ်လဝေၚ်ပၞာန် ဒိဂျေတ်တေဝ်လ် ဂကောံပၞာန်တံနွံမံၚ်ရောၚ်ဂှ် တ္ၚဲခြာဟွံလံဏံ ပတိတ်နၚ် လိက်ဒုၚ်စဳရေၚ်မွဲရ။
ဗီုပြၚ်သၞောတ် မဟာရန်ကြုက် ကၟာတ်အေန်တာနိတ်ဂှ် သွံကဵုဍုၚ်ဗမာ ဗဂပ်ကဵုလဝ်တုဲ သၞောတ်ဏံဝွံ ဂွံဗက်ဒၞာဲဇိုၚ်၊ ရပ်ထိၚ်၊ ပွမပျဲပျာံၜုၚ်တက်ကဵု ပရေၚ်ကာဂစိုတ် လ္တူညးဍုၚ်ကွာန်တံဂှ် သွက်ဂွံကၠောန်အာမာန်ကီု အစောံစရာဲ မွဲလှ်ေမှဟွံကေၚ်ဂွံလဝ်တံဂှ် ပအပ်ကဵုလဝ် ဂကောံပၞာန်တံရောၚ် သ္ဂးရ။
ဟိုတ်ဂှ်ရ အပ္ဍဲကဵုဍုၚ်ဗမာ လ္တူညးသုၚ်စောဲမံၚ် အေန်တာနိတ် ၃၃ ဒဿမ ၄ ပြကောဋိကိုတ်တံ ပွမစကာမံၚ် အန်လာၚ်တံဂှ် ဂကောံပၞာန်တံ နကဵုသၞောတ် ထ္ၜတ်ပိုၚ်ခြာလဝ်ဟၟဲ ကေတ်ဂွံအာမာန်ဖအိုတ်ရောၚ် ပ္ဍဲလိက်ဒုၚ်စဳရေၚ် ချူလဝ်ရ။
ပ္ဍဲကဵုသၞောတ် Geedge Networks ဂှ်မ္ဂး လ္တူညးသုၚ်စောဲ ဇာဖိုၚ်အေန်တာနိတ်တံ အဆံၚ်ဗက်ဒၞာဲဇိုၚ် ကုဇၟာပ်မၞိဟ်မွဲမွဲတံ မာန်ကီု ပၞောဝ်ကဵု တိုၚ်တာဝါ (Cell IDs)ဂှ် ဒုၚ်သ္ဇိုၚ်တုဲ ဍံၚ်ဗက်အာ ပွမ ချိက်ဆက်လဝ်တံမာန်ကီု ဒၞာဲညးစကာမံၚ် ဖုၚ် မိုဗိုင်လ်တံဂှ် မွဲအခိၚ်ဓဝ် ထမံက်ထ္ၜးကဵု ဒၞာဲနွံတံမာန်ရောၚ်။
ကာလကဝ်မယှေန်ပၞာန် ပလေဝ်ပလေတ်စမံၚ် သွက်ဂွံကၠောန်အာ ပေါဲရုဲမာဲဏံ ပွမမၚ်ရံၚ်လ္တူအန်လာၚ်တံဂှ် ဟိုတ်နူ ပဵုကၠောန်တိုန်ကၠုၚ်မံၚ်တုဲ နကဵုညးဍုၚ်ကွာန်တံ ပဵုတုဲဒးစွံအာဂရု ထေက်ရောၚ် ညးအုပ်ကာ ကံၚ်သဳမဳဒဳယာဗမာဗၠးၜး (IPCM) ဥူတိုဇဝ်လာတ် ဟီုကဵု ဌာန်ပရိုၚ် သြၚ်လောန်တိုၚ်မ်ရ။
“ဗွဲတၟေၚ် ဗီုကာလလၟုဟ်ဏံ ညးဍုၚ်ကွာန်တံ ပဵုတုဲ စွံဂရုထေက်၊ တုဲပၠန် ညးမွဲကဵုညးမွဲ ဟီုဂးပါ်ပါဲမံၚ်ဂှ် ပိုဲဂွံညာတ်မံၚ်တုဲ ပဵုတုဲ မၚ်ရံၚ်စွံကၠုၚ်သတိဏောၚ်။ ဗွဲတၟေၚ် ပါဲနူပရေၚ်ဓရ်ဍာံ ကံၚ်သဳပၞာန် (စကမ) တုဲ ပရေၚ်ဓရ်ဍာံ တၞဟ်ဟ်မွဲမွဲသာ်ဂှ် ညိလေဝ် အခေါင်ဟၟဲပုဟ်။ ဟိုတ်ဂှ်ရ ပွမသုၚ်စောဲအန်လာၚ်တံဂှ် ပဵုတုဲ ဒးစွံအာသတိထေက်ဏောၚ်၊ တုဲပၠန် အကြာဇကုကဵုဇကု စကာမံၚ် သၞောတ်ပရေၚ်ဆက်စၠောံ ပရေၚ်ဂီုကၠီုနွံတံကီုလေဝ် ပဵုတုဲဒးစွံသတိထေက်ကီု၊ မွဲပၠန် ပ္ဍဲကဵုကေတ်မံၚ်ပရိုၚ် တြးပရိုၚ်တံဂှ် မၚ်ရံၚ်မံၚ် ပဵုတုဲဒးစွံအာသတိရောၚ်။ ပရေၚ်ဍဵုဍိုက်လေဝ် ပဵုဂၠိုၚ်ဇၞော်တိုန်ဏောၚ်” သာ်ဝွံ သ္ဂးရ။
ပ္ဍဲအဝ်ဂတ် ၂၅ တေံ စပ်ကဵုပရေၚ်ကဵုမာဲတုဲ လ္တူအန်လာၚ် ညးတြုံမွဲတၠ ချူဆန်ပါ်ပါဲလဝ်ဂှ် ရန်တၟံ သွက်ဂွံပလီုပေါဲရုဲမာဲဂးတုဲ နူကဵုကဝ်မယှေန်ပၞာန် ရပ်ထိၚ်စောဲလဝ်အမှု ပ္ဍဲကဵု ဗဒိုပ်ဗၠာဲသၟိၚ် သာယာဨ ပွိုၚ်ဍုၚ် တံၚ်ဂျဳရ။
စိုပ်သိပ်တမ်ပါ ၉ ဂှ် လ္တူညးတြုံဏံ နကဵုဥပဒေ ပွမစဵုဒၞာ ပရေၚ်ပထုဲပလီု ပေါဲရုဲမာဲဗော်ဇဳ အတိုၚ်ၝောံပိုဒ် ၂၃(က) ဂှ် ဖျေံဏာ ဒဏ်ထံၚ် ၇ သၞာံ သီုကဵုကမၠောန်ရဂှ် နူကဵုကဝ်မယှေန်ပၞာန် လလောၚ်ပတိတ်လဝ်ပရိုၚ်ရ။
လ္တူဇာဖိုၚ်ပရေၚ်မၞိဟ်တံဂှ် ဟိုတ်နူ ပါ်ပါဲ ဂကောံပၞာန်တံကဵု ချူဆန်ကဵုဇြဟတ်ထံက်ဂလာန် ဂကောံပၠန်ဂတးတံတုဲ စနူသၞာံ ၂၀၂၂ ဂိတဖေဖဝ်ဝါရဳ ဒဵုကဵု သၞာံ ၂၀၂၅ ဖေဖဝ်ဝါရဳဏံ ညးသုၚ်စောဲအန်လာၚ် ၁၈၈၄ တၠ ဒးဒုၚ်ရပ်လဝ်နွံ နူကဵု Data For Myanmar ပကောံလဝ် တၚ်နၚ်နွံရ။
နူကဵု ကာန်ပနဳ Geedge Networks ဂှ် သွက်ဂွံဍံၚ်ဗက်ဒၞာဲဇိုၚ် ညးချဳဒရာၚ် က္တဵုကၟိုဟ်တံကီု၊ ပွမပျဲပျာံကီု ပ္ဍဲအရာ ပရေၚ်ကာဂစိုတ်မၞိဟ်တံ သွက်ဂကောံပၞာန် ညံၚ်အစောံစရာဲ ဂွံသၠုၚ်တိုန်အာ ကဵုမံၚ်အရီုဗၚ်ရောၚ်ဂှ် လိက်ဒုၚ်စဳရေၚ် JFM ချူလဝ်ရ။
နူကဵုကာန်ပနဳဏံ သွံဗဂပ်ကဵုလဝ်တုဲ အပ္ဍဲကဵုဍုၚ်ဗမာ နကဵုပရေၚ်ပံၚ်တောဲ ညးမရေၚ်တၠုၚ်ကမၠောန် အေန်တာနိတ်တံဂှ် ထမံက်ရုပ်ရဴကၠောန်မံၚ် နဲကဲပညာ မၚ်ရံၚ်ထံၚ်ပရိုၚ်တံလေဝ် နွံရ။
ပရေၚ်ဏံဂှ်တှ်ေ အပ္ဍဲကဵုဍုၚ်ဗမာ ညးပါ်ပါဲဂကောံပၞာန်ကီု၊ ညးဟီုပတိတ် ပရေၚ်ဓရ်ဍာံကီု ဂွံရံၚ်အာ တမ်ရိုဟ်ကၞက် သၠးပွးတံမာန်ဂှ် ကဵုမံၚ်အန္တရာဲဗွဲမလောန်ရောၚ် JFM ထံက်ထ္ၜးရ။
ပွမ ဍဵုဍိုက်ဒိဂျေတ်တေဝ်လ် ပရေၚ်ဂကောံပၞာန်တံဂှ် ပရေၚ်ဍုၚ်ကွာန်သၟးဟွံက လ္တူပရေၚ်ပိုန်ဒြပ်လေဝ် ဇီုကပိုက် ကၠုၚ်မာန်တုဲ ပြဿနာ ဒးရပ်စပ်အာ ဍာ်ဇမၠိၚ်ဒှ်အာမာန်တုဲ ကောန်ညးဍုၚ်ကွာန်ဗမာတံ ဒဒိုက်ဗွဲမဂၠိုၚ် ဒးဇီုကပိုက်အာဏီရောၚ် ဥူတိုဇဝ်လာတ် ဟီုရ။
“ပရေၚ်ကရေပ်ဓရတ်ဒိဂျေတ်တေဝ်လ် ပဵုတုဲ ဘိုအ်ဂွံပရေအ်အာရနွံ၊ ဗွဲတၟေၚ် ဍုၚ်ပိုဲဂှ်တှ်ေ စပ်ကဵုအခေါၚ်သၠးပွး ပရိုၚ် ပရေၚ်ဆက်စၠောံတံ ပ္ဍဲကဵု ပရေၚ်ဇီုကပါ် နကဵုပရေၚ်ပိုန်ဒြပ်မၞိဟ် ပရေၚ်ဍုၚ်ကွာန်တံဂှ် ကိစ္စအခိၚ်ဒမၠေံ မွဲဍောတ်ဓဝ်ရ ဟွံသေၚ်၊ ပြဿနာဒးရပ်စပ်အာဍာ်ဇမၠိၚ်ဒှ်အာယျ၊ ဟိုတ်ဂှ်ရ သၟတ်တံ အန္တရာဲညံၚ်ဟွံဂွံဒှ် ဗီုလဵုဂွံဆက်ရပ်စပ်အာ ပရေၚ်အန်လာၚ် သိုဲယှေဝ်မဳဒဳတံရောဂှ် ဒးစွံအာသတိဇၞော်ဇၞော်ရ။ ဗွဲတၟေၚ် ညးမွဲမွဲဂှ် မၚ်ရံၚ်မံၚ်ဇကုတှ်ေ မုမှာရာအာရော ဟီုဗက်ဟွံဂတာပ် မွဲအခိၚ်ဓရ် မၞိဟ်မၚ်ကဵုဒဒိုက်နွံမံၚ် ကောန်ဍုၚ်ဗမာဗွဲမဂၠိုၚ် ဒှ်အာဒဒိုက်မာန်ဏောၚ် မိက်ဂွံဟီုရ” သာ်ဝွံ သ္ဂးရ။
နကဵု ကာန်ပနဳ Geedge Networks ဂှ် နကဵုနဲကဲဂတာပ်ခေတ်တၟေၚ် ပရေၚ်မၚ်ရံၚ်ထံၚ်ပရိုၚ် ကေုာံ နဲကဲပရေၚ်ထပိုတ်သေန်သာတံ ဆက်စကာအာတုဲ အပ္ဍဲဏံ စၞးဂကောံပၞာန်ဂှ် ကာန်ပနဳ ပရေၚ်ဆက်စၠောံ ၁၃ ကာန်ပနဳ အဓိက ပါလုပ်မံၚ် ပ္ဍဲကဵု ကဏ္ဍတံဏံရ။
ပ္ဍဲဏံဂှ်တှ်ေ ATOM၊ MYTEL ၊ MPT၊ Ooredoo ၊ Frontiir၊ StreamNet၊ Golden TMH Telecom၊ Internet Maekhong Network (IM-Net)၊ Myanmar Broadband Telecom (MBT)၊ Myanmar Telecommunication Network (MTN)၊ Campana၊ Global Technology Group ကဵု China Unicom တံပါလုပ်ရ။
တုဲပၠန် အပ္ဍဲကဵုပရေၚ်ကမၠောန် ကၠောန်မံၚ်လၟုဟ် ကာန်ပနဳ ဍုၚ်သအာၚ် ကောပ်ကာဲလဝ်တံကီု ညးမကဵုမံၚ်ကမၠောန် ရေၚ်တၠုၚ်အေန်တာနိတ် ညးဒုၚ်အေန်တာ မိတ်အကြာတံကီု ညးကၠောန်ကမၠောန် ဇုက်လာၚ်ဖိုၚ်ဗါ ပ္ဍဲကဵုပရေၚ်ကမၠောန် အေန်တာနိတ်ဍုၚ်ဗမာဂှ် ညံၚ်ရဴလွဟ် ဂကောံပၞာန် တိုက်ရိုက် ပါလုပ်မံၚ်ရောၚ် အတိုၚ်တၚ်နၚ် ပရေၚ်ကာပၞုက် ကာန်ပနဳ မံက်တိတ်လဝ်တံဂှ် သ္ပလဝ်ဒတန်နွံရ။
ဟိုတ်ဂှ်ရ လ္တူကာန်ပနဳ Geedge Networks ကဵု ညးတာလျိုၚ်နွံတံ သွက်ဂွံဖျေံအာ ပရေၚ်မာတ်ဆိုအ် ညံၚ်ဂွံကၠောန်အာ ဟိုတ်နူကဵုမံၚ်ဇြဟတ် ပရေၚ်ရာဇဝတ် ဍုၚ်ဂၠးကဝ်တံတုဲ နကဵုပရေၚ်ကောပ်ကာဲ သၟဝ်တဲ Google ဂှ် ညံၚ်ဂွံစၟဳစၟတ်အာ ပရေၚ်ရာဇဝတ် ဂၠကဝ်မာန် JFM အာတ်မိက်လဝ်ရ။
ပရိုၚ်-သြၚ်လောန်တိုၚ်မ်
Photo – SAC