ဗြဝတဳ၊ သိပ်တမ်ပါ ၁၃
ဒပ်ကဝ်မယှေန်ပၞာန်ဝွံ ကလေၚ်သီဂွံ တေန်ဂါန်ညဳနံၚ်တုဲ ဒၞာဲလ္တူဍုၚ်ဗြဝတဳ ဗွဲမဂၠိုၚ်တံဂှ် ဖျေံဒပ်လုပ်ကေတ်တုဲ ဒၞာဲဒပ် BGF ကေတ်လဝ်ဒၞာဲ သၟဝ်ဒဒန် ပရေၚ်ဆာန်ကၟိန် စၟတ် ၁ ဂှ်လေဝ် ပါဲပတိတ်ထောံရဂှ် ညးဒေသဗြဝတဳတံ ဟီုကဵုဌာန်ပရိုၚ်သြၚ်လောန်တိုင်မ်ရ။
ဂၠံၚ်အာယှ ဗြဝတဳ-ကအ်ကြိက် ဒေသတေန်ဂါန်ညဳနံၚ်တံဂှ် ဒပ်ကဝ်မယှေန်ပၞာန်သီအဝဵု ကလေၚ်ထိၚ်ချုက်ကေတ်မာန်ယျရောၚ် ပ္ဍဲသိပ်တမ်ပါ ၆ ဂှ် လလောၚ်တြးဏာလဝ်ကီု သွက်ပရေၚ်ဂီုကၠီုဂးတုဲ လ္တူဍုၚ်ဗြဝတဳ ဒၞာဲဗွဲမဂၠိုၚ်တံဂှ် ဒပ်ကဝ်မယှေန်ပၞာန် ဖျေံဒပ်လုပ်ကေတ်လဝ်ဒၞာဲ ရဂှ် ညးဒေသဗြဝတဳတံ သ္ဂးရ။
ကရောၚ်ပၞာန်အံၚ်ဇေယျ ဒပ်ကဝ်မယှေန်ပၞာန် ကၠာဟွံစိုပ်က္ဍၚ် ပ္ဍဲအခိၚ်ကာလ တံဝွံ သွက်ပရေၚ်ဂီုကၠီု ဍုၚ်ဗြဝတဳဂးတုဲ ဒပ်မၚ်ပယျဵုကရေၚ် BGF ဖျေံဒပ် ကေတ်လဝ်ဒၞာဲ ပ္ဍဲဒဒန်ပရေၚ်ဆာန်ကၟိန် စၟတ် ၁၊ ဒၞာဲဇုမ်ပရေၚ်ကူသာန်သွံရာန် ကေုာံ ဒၞာဲလုပ်တိတ်ဍုၚ်တံကီု ဒပ်ကဝ်မယှေန်ပၞာန်ဂှ် ပ္ဍဲဒၞာဲရုၚ်မုက်ပၞာန် ကေုာံ အပ္ဍဲတမ်ဒပ် ခလရ ၂၇၅ တေံရ ဖျေံစွံလဝ်ဒပ်နွံရ။
ပြဟ်ဟ်ဏံ လ္တူဍုၚ်ဗြဝတဳဂှ် ပဵုနူအကာဲအရာကၠာတေံ ဒပ်ကဝ်မယှေန်ပၞာန် ကၠောန်သ္ပကေတ်မံၚ်ဒၞာဲတုဲ ကောန်ဒပ် BGF ကေတ်လဝ်ဒၞာဲ သၟဝ်ဒဒန် ပရေၚ်ဆာန်ကၟိန် စၟတ် ၁ ဂှ်လေဝ် ဒပ်ကဝ်မယှေန်ပၞာန် ကဵုပါဲတိတ်အာဂှ် ကောန်ဒပ် BGF တံ တိတ်အာယျရောၚ်ဂှ်လေဝ် ညးဒေသဗြဝတဳတံ သ္ဂးရ။
တုဲပၠန် ဂကောံဒပ်ကရေၚ်ရပ်လွဟ် နွံမံၚ်လ္တူဍုၚ်ဗြဝတဳ မပ္တံကဵု ဒပ်ပၞာန်ကရေၚ်ပတုဲဖဵု ဒဳမဝ်ကရေသဳ DKBA၊ ကံၚ်သဳပရေၚ်ၜိုဟ်လလမ်ကရေၚ် KNU/KNLA PC တံဟွံက ကောန်ပၞာန် ဒပ်မၚ်ပယျဵုကရေၚ် BGF တံဂှ်ကီု ဒပ်ကဝ်မယှေန်ပၞာန် စနူကဵု ပရေၚ်အာကၠုၚ်ဓရတ်တိုန်ရဂှ် တမ်ရိုဟ်ကၞက် ညးကြပ်ကဵု ဂကောံရပ်လွဟ်တံ သ္ဂးရ။
ပ္ဍဲကဵုကၞောတ်သၞာံဏံမ္ဂး ဒပ်ကဝ်မယှေန်ပၞာန် ကၠောန်အာပေါဲရုဲမာဲရောၚ် မဒှ်တုဲ ကၠာဟွံစိုပ်ပေါဲရုဲမာဲဏီ အပ္ဍဲတွဵုရးကရေၚ် အရာမကၠောန်ကၠုၚ် ပရေၚ်သ္အးဇ္ၚးတိဍာ်တံဂှ် ပ္ဍဲဒၞာဲသ္ကုတ်ဂၠံၚ် ကြုၚ်ဒဵု-ကအ်ကြိက်၊ ဂၠံၚ်အာယှ ကေုာံ ပ္ဍဲဒေသတေန်ဂါန်ညဳနံၚ်တံဂှ် ဒပ်ကဝ်မယှေန်ပၞာန် ကလေၚ်ထိၚ်ချုက်ဂွံမာန်အာ မဒှ်ရ။
မွဲဒမြိပ်ဂၠံၚ်အာယှဖအိုတ် ထိၚ်ချုက်ဂွံအာယျ ဒပ်ကဝ်မယှေန်ပၞာန် ကရေဲမံၚ်ကီုလေဝ် ပ္ဍဲသ္ကုတ်ဂၠၚ် ၜိုတ် ၄ ဒၞာဲတံပၠန် ပေါဲဗတိုက်အကြာဒပ် ၜါလပါ် ဆက်က္တဵုဒှ်မံၚ်တုဲ ဂၠံၚ်သီုဖအိုတ်တံဂှ် ဒပ်ကဝ်မယှေန်ပၞာန် ထိၚ်ချုက် ဟွံမာန်ဏီပုဟ်ဂှ် တမ်ရိုဟ်ကၞက်ပရိုၚ် ညးဒေသတံ သ္ဂးရ။
နူကဵု ဒပ်ကဝ်မယှေန်ပၞာန် သွက်ဂွံသီကေတ်အာ ဒၞာဲဒပ်ပံၚ်တောဲပၠန်ဂတးတံ ထိၚ်ချုက်လဝ်တိဍာ်ဒေသ မဟာဒပ် ၆ ဍုၚ်လေဝ်ကေကဝ် သၠုၚ်ကျာ ဍုၚ်ဗြဝတဳဂှ်လေဝ် စပလေဝ်စမံၚ်တုဲ ပ္ဍဲကဵုဒေသ လေဝ်ကေကဝ်ဂှ် နကဵုဒရုၚ်၊ လွဟ်ဇၞော်ကဵု ပၞာန်ကျာတံ ထောံကြဳဖျေံဗုမ် မွဲဏှမွဲဏှ သ္ဂးရ။
သ္ပဟိုတ် နူကဵု ဒပ်ကဝ်မယှေန်ပၞာန် ပန်မံၚ်ကီု နူဗလးတိပၠန် ထပက်ကၠုၚ် ကရောၚ်ပၞာန်ဂှ်ရ ညးဒေသ လေဝ်ကေကဝ်တံဂှ် ဒၞာဲဒေသဗၠးဘဲမာန်တံ ဂြိပ်ပါဲတိတ်အာအိုတ်တုဲ ပြဟ်ဟ်ဏံ သွက်ရဲဒဴပၞာန်တံ စၞစဇွောံမ၊ ဍုၚ်ပလးကေုာံ ကၟုဲဒၞာဗွဲမဂၠိုၚ် ပြဟ်ဟ်ဏံ နွံမံၚ်ပၟိက်ဇၞော်ကဵုဇြဟတ်ရဂှ် ညးကဵုမံၚ်အရီုဗၚ်တံ ကဵုလဝ်သမ္တီနွံရ။
ပရိုၚ်-သြၚ်လောန်တိုၚ်မ်
Photo – BGF