မတ်မလီု ပ္ဍဲသိပ်တမ်ပါ ၁၃
ဒၞာဲဒပ်ကဝ်မယှေန်ပၞာန် ပတေင်လဝ်ပရေၚ်ဂီုကၠီုတၟေၚ် အပ္ဍဲကဵုတွဵုရးမန် ပွိုၚ်ဍုၚ်လ္ၚဵုတံဂှ် အကြာတ္ၚဲတံဏံ ပရေၚ်ဒမၠဗတိုက်မံၚ်စေအ်အ် ဒှ်ကၠုၚ်ရဂှ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
လ္တူဍုၚ်မတ်မလီု ဒၞာဲဒပ်ကဝ်မယှေန်ပၞာန် ထိၚ်ချုက်ဖျေံစွံလဝ်ပရေၚ်ဂီုကၠီု ပေၚ်ၚ်မာန် ပ္ဍဲအရာပ်”စျေးကြို” ပ္ဍဲသိပ်တမ်ပါ ၁၃ ဂှ် သ္ၚိမၞိဟ်နွံမွဲမ ဒးဒုၚ်ဗတိုက် ဏာ ထဝ်ဒကောၚ် လျိုၚ် ၁၀ ဒကေဝ်၊ သြန်ဗဒါဲ ၄၀၀ ကိုတ်ကဵု ဖုၚ်ခိုဟ်ဟ်တံ ရ။
တုပ်ကဵုပရူဏံ အပ္ဍဲမွဲတ္ၚဲဂှ်ကီုရ လ္တူဍုၚ်ဇြပ်ဗု ဗြဴကဵုတြုံ သီဆေၚ်ထဝ်တုဲ အခိၚ်စဴကၠုၚ်သ္ၚိဂှ် ညးတြုံၜါတၠ ထ္ၜးလွဟ် ဗတိုက်ဏာတုဲ ကပေါတ်ကယျိုၚ်ထဝ် နာနာဗဒါဲ ၂၀ ဂကူ၊ အကွက်ၚုဟ်မးသြန် ၃၇၀၀ ကိုတ် ပါအာကီုရ။
ဒၞာဲလ္တူဍုၚ် ဒပ်ကဝ်မယှေန်ပၞာန် ထိၚ်ချုက်လဝ်ပေၚ်ၚ်တံ ပရေၚ်ပရော ဒမၠဗတိုက် က္တဵုဒှ်အာဆက်က်ကီုလေဝ် ညးတာလျိုၚ်တံ ဗက်ရပ်ကဵုဟွံမာန် ဒှ်ကၠုၚ်ဂှ်တှ်ေ အကြာညးဍုၚ်ကွာန်တံ ပရေၚ်ပါ်ပါဲဇၞော်တိုန်ကၠုၚ်ရ။
ဒၞာဲလ္တူဍုၚ် ဒပ်ကဝ်မယှေန်ပၞာန် ပတေင်လဝ်ပရေၚ်ဂီုကၠီု အိုတ်စောန်ကီုလေဝ် ပရေၚ်ဒမၠဗတိုက်၊ ပရေၚ်ပၠံၚ်ၜးဂၠိုၚ်တိုန်မံၚ်ဂှ်ကီု၊ ထေင်င်လဵုလဵု ကၠတ်မံၚ်ဂၠံက်မံၚ်တံ ပဵုတုဲပရေအ်တိုန်ရဂှ် ညးဒေသတွဵုရးမန်မွဲတၠ ဟီုရ။
“လၟုဟ် ပရေၚ်ပၠံၚ်ၜးတံ ပဵုဂၠိုန်တိုန်၊ ထေၚ်ၚ်လဵုလဵုဂှ် ကၠတ်မံၚ်၊ ဂၠံက်မံၚ်ထေၚ်လဵုကွေံရ၊ ကပေါတ်တံ မုတံ ဂၠံက်ကေတ်ဏာ ပရေအ်ကွေံကွေံ။ မၞိဟ်ဟၟဲတှ်ေ ကောန်ၚာ်မွဲဓဝ်ဂှ် မၞိဟ်ပန်မသုန် ဗိုၚ်ပၠံၚ်ၜးမံၚ်၊ ဂၠံက်ကေတ်ထိုၚ်လှုဲ၊ ကဠာစုတ်လှုဲ ဒးဒုၚ်ကၠတ်၊ ဗီုဗီုတံဏံ ဂေတ်တုဲ ဂၠံက်သြန် ဂြိပ်တိတ်အာ၊ စရိုတ်မၞိဟ်တံ ယောၚ်ယာအာကွေံကွေံရ” သာ်ဝွံ သ္ဂးရ။
ဗီုဗီုတံဏံ ဒဵုကဵုလ္တူဍုၚ်ဇၞော် ဒမၠဗတိုက် ပရေၚ်ပၠံၚ်ၜးကၠတ်ဂၠံက်တံ ဟိုတ်နူအကာဲအရာ ပရေအ်မံၚ်တုဲ နကဵုညးဍုၚ်ကွာန်တံဂှ် ညိလေဝ် ပရေၚ်ဂီုကၠီုဟၟဲကီု ဟိုတ်ဂှ်ရ စနူကဵု ပရေၚ်ကၠောန်ၜိုတ်ကမၠောန် သွက်ဂွံ ဟဂျိုၚ်အာလမျီု ဒှ်တိုန်အခက်အခုဲရဂှ် ညးဆက်ဟီုရ။
ပ္ဍဲကဵုအခိၚ်ဗ္တံ ဒပ်ကဝ်မယှေန်ပၞာန် ပတိတ်လဝ်အမိၚ် အခိၚ်တိတ်မ္ၚးဟွံဂွံတံဂှ် ပရေၚ်ဒမၠဗတိုက် ပၠံၚ်ၜးကၠတ်ဂၠံက်တံ ဗွဲမဂၠိုၚ်ဒှ်အာတုဲ တၚ်ဘိုအ်ဂွံဒးသၟာန် နွံမံၚ်ကီု ယဝ်ရအာတေၚ် ဒၞာဲမဆေၚ်စပ်တံမ္ဂး ဆၜိုတ် ပရေၚ်ပံက်လဝ် အမှုဟေၚ်နွံမံၚ်တုဲ ပရေၚ်ကေတ်ကဵုအရေဝ် ဟၟဲပုဟ် ညးဒေသတွဵုရးမန် မွဲတၠပၠန်ဂှ် ပါ်ပါဲလဝ်ရ။
‘’ပရေၚ်အုပ်လဒမ် ဥပဒေဟၟဲဂးတုဲ အခိၚ်ဗ္တံသ္ဂါ ၁၂ နာဍဳ ၁ နာဍဳ လ္တူအမိၚ်အခိၚ်ဗ္တံတိတ်မ္ၚးဟွံဂွံဂှ် ညးဗီုလဵုတိတ်မ္ၚးဂွံရော၊ သၟာန် ဗွဲမဂၠိုၚ် နွံမံၚ်ရ၊ မၞိဟ်ဒးဒုၚ်လဝ်တံဂှ် အာတေၚ်အမှု ဒၞာဲဆေၚ်စပ် ဇရေၚ် သ္ကိုပ်အုပ်ဓုပ်တံ ပၠန်လေဝ် ညးတံ မုကၠောန်ကဵုမာန်ရော သွဟ်ဏံတိတ်ကၠုၚ်ပၠန်ရတှ်ေ ညးမိက်ဂွံတေၚ်ဂှ်လေဝ် ဒၞာဲလဵု ညးလဵု ဂွံအာတေၚ်ဂှ် ကေတ်ဟွံဒးရ၊ ယဝ်ရ အာပံက်အမှု ရုၚ်ဗၠာဲသၟိၚ်ပၠန်တှ်ေ စရိတ်လိက်နာနာ ကဵုလဝ် ၅၀၀၀ ဂးတုဲ ဒးကဵုလဝ် ၅၀၀၀ ရ” သာ်ဝွံ သ္ဂးရ။
အပ္ဍဲဒေသ ဒမၠဗ္တိုက်စပၠံၚ်ၜးမံၚ်တံ ဗွဲမဂၠိုၚ်ဟီုတှ်ေ နကဵုဂကောံ ကၠောန်မံၚ်အိုတ်တုဲ လွဟ်ကဵုဘဲအန္တရာဲလမျီု မၞိဟ်တံမာန်လေဝ် ပါကၠုၚ်ကီုတုဲ စနူကဵု ရဲမံၚ်ဒၟံၚ်ပ္ဍဲသ္ၚိတံလေဝ် အကာဲအရာ ဒးစွံလဝ်သတိဒှ်မံၚ် ညးဒေသတံ ဟီုရ။
ကဝ်မယှေန်ပၞာန် ထ္ၜးဟိုတ် ပရေၚ်ဂီုကၠီုတုဲ ဂေတ်ဂေၚ်ထ္ၜးဇြဟတ် အပ္ဍဲဍုၚ်ကီု၊ ဒၞာဲမၞိဟ်တံ အာကၠုၚ်ဂၠိုၚ်ကီု ဒၞာဲဟွံခယျလဝ်တံ ဗက်မာတ်ဆိုအ် ဒၞာတာမံၚ်သၟးဟွံက ဗဂပ်စုတ်လဝ် CCTV ပေၚ်ၚ်ကီုလေဝ် လ္တူတၠတဲ ညးကၠောန်ဏာဒုဟ်ဂှ် ကေၚ်ရပ်ဂွံလဝ် ဟွံမိၚ်မွဲလှ်ေဏီရ။
ပ္ဍဲကဵုတွဵုရးမန် ကဝ်မယှေန်ပၞာန် သီအဝဵုတုဲ ဗွဲကြဴဏံ ပရေၚ်အုပ်လဒမ် ဥပဒေ ဍိုန်လျ ယုတ်ဒေက်စှ်ေအာဂှ်ရ ခြာဟွံလံဟွံလံ ပရေၚ်လုပ်ကၠတ်အပ္ဍဲသ္ၚိဂမၠိုၚ်၊ ပရေၚ်ဒမၠဗတိုက် ဂစိုတ်မၞိဟ်ပၠံၚ်ကပေါတ်တံဟွံက ပရေၚ်ကၠတ်ကွဳလိုန်ဓါတ်တံ အရိုဟ်ဟ်တ္ၚဲ က္တဵုဒှ်မံၚ် နွံရ။
ပရိုၚ်-သြၚ်လောန်တိုၚ်မ်
Photo – CJ