မတ်မလီု ပ္ဍဲသိပ်တမ်ပါ ၁၃
ပေါဲရုဲမာဲ ကဝ်မယှေန်ပၞာန် ကၠောန်အာဏံ ဗတိုက်သရိုဟ်ဏာရောၚ် လ္တူဂကောံဇြဟတ်ပၠန်ဂတးတံ လလောၚ်ပတိတ်လဝ်တံဂှ် တန်တဴကဵု ပရေၚ်ဂီုကၠီုတုဲ ချဳဒရာၚ်အာဏောၚ် ဗော်ပရေၚ်ဍုၚ်ကွာန်မန်တံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
အခိၚ်ကၠောန်ပေါဲရုဲမာဲဂှ် ညးစၞးအလံၚ်အမာတ်တံ အခိၚ်စှ်ေ ပရေၚ်စန်ဒက်မာဲတံဂှ် သွက်ပရေၚ်ဂီုကၠီုညးတံ နကဵုကဝ်မယှေန်ပၞာန် ဒးစဳဇန်ကဵုအာရောၚ် ဂအုပ်သ္ကိုပ်ပၞာန်ဇၞော် မေန်အံၚ်လှိုၚ် ဟီုလဝ်နွံရ။
မွဲလပါ်ပၠန် ချူခၞံလဝ် ဥပဒေပရေၚ်စဵုဒၞာပေါဲရုဲမာတုဲ အတိုၚ်ဥပဒေဏံခၞံ ပံက်ဏာလဝ် ကမ်မတဳကောပ်ကာဲအရာပရေၚ်ဂီုကၠီု သွက်ပေါဲရုဲမာဲဗော်ဇဳ နူကဵုဗဟဵု ဒဵုစိုပ်အဆံၚ်ပွိုၚ်ဍုၚ် တုဲဒှ်အာယျ။
နကဵုကဝ်မတဳဏံဝွံ ပၞောဝ်ဗက်ကဵု အတိုၚ်လၟေၚ်ကာလပေါဲရုဲမာဲတံတုဲ စေဝ်ပရေၚ်ဂီုကၠီု ညံၚ်ဟွံဂွံထောၚ်ပြိုဟ်အာဂှ် ဒပ်ပၞာန်၊ ဂကောံဒပ်မၚ်ကၚ် ပရေၚ်ဂီုကၠီုညးဍုၚ်ကွာန်ကဵု ဂကောံဗတိုက်သရိုဟ်ပကီုပရာတ်တံ သွက်ဂွံပံၚ် ဗစိုပ်ပ္ညီပညပ်အာကဵု ဂကောံမိတ်နာနာတံ မဒှ်ရ။
ဆဂး ဟိုတ်နူအကာဲအရာပရေၚ်ပၞာန် ကတဵုဒှ်မံၚ်အပ္ဍဲဍုၚ်တံတုဲ သွက်ညးစၞးအလံၚ်အမာတ် လုပ်ပြိုၚ်ပေါဲရုဲမာဲတံ ပကောံမၞိဟ် စှ်ေအာပရေၚ်စန်ဒက်မာဲဂှ် အကာဲအရာဒှ်ဟွံမာန် ဗော်လ္ၚဵုဒုၚ်လဝ်တဲရ။
သွက်ပရေၚ်ပေါဲရုဲမာဲဏံ နူလ္တူသိုဝ်ယှေဝ်မဳဒဳယာတံ မွဲအဆံၚ် သွက်ဂွံစန်ဒက်အာ ကေုာံ ပ္ဍဲကဵုဒေသဆန္ဒမာဲ ဇြဟတ်ပရေၚ်ဂီုကၠီုခိုဟ်တဴ ဒၞာဲပံက်ရုၚ်မာဲမာန်ဂှ်မှ တိုက်ရိုက်ဘိုအ်ဂွံဆဵုဂဗကဵု ညးတၠဆန္ဒမာဲတံရောၚ်ဂှ် ချပ်မံၚ်ရ။
နကဵုဗော်ညဳသၟဟ်မန် ဗော်စန်ဒက်အာမာဲ အပ္ဍဲကဵုတွဵုရးမန်ဂှ်တှ်ေ သွက်ညးဍုၚ်ကွာန်တံ ဂွံစုတ်မာဲမာန် ပ္ဍဲဒၞာဲဒေသ ပံက်လဝ်ရုၚ်မာဲဟေၚ် သွက်ဂွံဆဵုဂဗစန်ဒက်အာ ညးတၠဆန္ဒမာဲတံနွံရောၚ် ညးအခေါင်ဟီုဂးနွံ နာဲတာန်ယှိုဲ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“စပ်ကဵုစှ်ေပရေၚ်စန်ဒက်မာဲတုဲ အဓိက ပိုဲချပ်လဝ် နွံမံၚ်ညိညကီု၊ ဒၞာဲညးဍုၚ်ကွာန်တံ ကၠုၚ်စုတ်မာဲဂှ် ဆဵုဂဗအာကဵု ရဲစုတ်မာဲတံတုဲ တက်အာကျာဏောၚ်။ မွဲပၠန် ဟွံစုတ်မာဲမွဲသာ် ညံၚ်ဟွံဂွံမံၚ်အာ အတိုၚ်ဏံဂှ် ပိုဲစန်ဒက်အာဏောၚ်၊ ကိစ္စဇၞော်အိုတ်ဂှ် ညံၚ်ဂွံစုတ်မာဲရ၊ ပ္ဍဲဒၞာဲဏံ တိုက်ရိုက်ညံၚ်ဂွံဆဵုဂဗတက်အာကျာကဵု ညးဍုၚ်ကွာန်တံဂှ် ပၟိက်ဇၞော်ကွေံကွေံ။ နကဵုဗော်ကီု သီုကဵုအလံၚ်အမာတ်ကီု” သာ်ဝွံ သ္ဂးရ။
နကဵုဗော်ညးတံဂှ် ပ္ဍဲကဵု စၠတ်ထဝ်တွဵုရးကေုာံ စၠတ်ထဝ်ကောန်ဂကူ ဒၞာဲဆန္ဒမာဲသီုဖအိုတ် သဘဴဘိုအ်ဂွံလုပ်ပြိုၚ်အာနွံတုဲ သွက်စၠတ်ထဝ်ညးဍုၚ်ကွာန်ဂှ်တှ်ေ ဒၞာဲအကာဲအရာဇၞးမာဲမာန်တံဂှ်ရ သွက်ဂွံရုဲစှ်လုပ်ပြိုၚ်အာနွံ ညးဆက်ဟီုရ။
ပြဟ်ဟ်ဏံ သွက်ဂွံပတိုန်အာစရၚ် အလံၚ်အမာတ် လုပ်ပြိုၚ်မာဲတံဂှ် ဗွဲမဂတာပ်အခိၚ် ညံၚ်ဂွံပၠုပ်အာစရၚ်မာန်ဂှ် ဂစာန်မံၚ်တုဲ အကြာတၚ်ဝါတ်ဂါတ် အခက်အခုဲနာနာတံဂှ် ၜိုတ်ဂွံအခိၚ် ဂစာန်ကၠောန်မံၚ်ရ နာဲတာန်ယှိုဲ သ္ဂးရ။
နကဵု ဗော်ဍုၚ်မန်တၟိ AD တဝ်စၞေဟ်မံၚ်သၞောတ်တၠအဝဵုပၞာန်ဂှ်တှ်ေ နဲကဲစုၚ်ၚ် ဗတိုက်သရိုဟ်အာ ပေါဲရုဲမာဲအလီ ကဝ်မယှေန်ပၞာန်ရောၚ်ဒှ်တုဲ ကၠောန်အာပေါဲရုဲမာဲ ဒၞာဲညးတံထိၚ်ချုက်လဝ်တံဂှ် ညိလေဝ်ဟွံဒုၚ်တဲပုဟ် ကဵုလဝ်သမ္တီနွံရ။
တုဲပၠန် ကုဂကောံပရေၚ်ဍုၚ်ကွာန်/ဗော် လုပ်ပြိုၚ်အာ အပ္ဍဲပေါဲရုဲမာဲတံဂှ် နဒဒှ် ဂကောံ/ပူဂဵု ညးကလေၚ်ပၠုပ်လမျီု သ္ဇိုၚ်သၞောဝ်ဥပဒေ ၂၀၀၈ ကေုာံ ညးဆက်ဇမၠိၚ်လမျီုအယုက် တၠအဝဵုပၞာန်ရောၚ် လလောၚ်တြးလဝ် နွံရ။
နကဵုဗော်သွးကောန်ဂကူကရေၚ် KNU လေဝ် ညံၚ်ပေါဲရုဲမာဲ ကဝ်မယှေန်ပၞာန် ညံၚ်ဟွံဂွံဒှ်အာမာန် တဝ်စၞေဟ်ဒစဵုဒစးမံၚ်တုဲ နူကဵု ဒပ်ဗၠာဲသၟိၚ် ကောန်ဂကူကရေၚ်ကီုလေဝ် ဒၞာဲတာလျိုၚ်စှ်ေကၠုၚ်ဂှ် ပံၚ်တောဲရေၚ်တၠုၚ်အာ မွဲစွံရောၚ် နူကဵုဌာန်ဂအုပ်ဗဟဵု ဟီုပတိတ်လဝ်ရ။
ဗော်မန်တဴတက် စန်ဒက်အပ္ဍဲတွဵုရးကရေၚ်ဂှ်တှ်ေ ဒၟာနူပရေၚ်ဂီုကၠီုတုဲ ပရေၚ်ချဳဒရာၚ်ဗလးတိဂှ် ယှအ်ဖျေံ၊ နူလ္တူအန်လာၚ် သွက်ဂွံစန်ဒက်အာမာဲ ကေုာံ ဒၞာဲမၞိဟ်ဆဵုညာတ်ဂၠိုၚ်တံဂှ် ဆၜိုတ်ဗာန်စွံအာ လိုဂိုတဆိပ်ဗော်တံရ ချပ်လဝ်နွံမံၚ် က္ဍိုပ်သ္ကိုပ်ဗော်မွဲတၠ ဟီုရ။
နကဵု ကဝ်မယှေန်ပါ်ပေါဲရုဲမာဲ အပ္ဍဲတွဵုရးတံကီု ကာလဗော်တံ စှ်ေပေါဲရုဲမာဲတှ်ေ ကဵုပရေၚ်ဂီုကၠီုဟွံမာန်တုဲ သွက်စန်ဒက်မာဲ ပြေၚ်ရေၚ်မၞိဟ်တုဲ ဂေတ်ဂေၚ်အာကၠုၚ် ဗီုဗီုအခိၚ်ကၠာတေံဂှ် ဟွံကဵုအခေါၚ်ပုဟ် ညးဆက် သောၚ်ကလးလဝ်ရ။
“ကဝ်မယှေန်ပေါဲရုဲမာဲ တွဵုရးကရေၚ် ညးတံသောၚ်ကလးကဵုလဝ်ပိုဲ၊ ဗော်မွဲတုဲမွဲ ဗီုကၠာကၠာတေံ ပြေၚ်ရေၚ်လဝ်မၞိဟ် ကျိုၚ်ကယျိုၚ် ဂေတ်ဂေၚ်အာကၠုၚ် နကဵုအလံ ဟမိၚ်ဍိုပ်တံဂှ် ကၠောန်ဟွံဂွံပုဟ်။ ပကောံမၞိဟ်တုဲ ဟီုဂးဟဝ်ဂွံရ။ ယဝ်ရ ပကောံမၞိဟ် ဟဝ်ဏောၚ်တှ်ေ လဴကဵုညးတံ ညးတံကဵုပရေၚ်ဂီုကၠီုဏောၚ်။ တုဲတှ်ေ ဗီုဇကုကဵု ဇကုတိတ်အာ သ္ၚိတ်တ်၊ အေပ္ဍဲဒၞာဲပကောံလဝ်မၞိဟ် စန်ဒက်မာဲဂှ်တှ်ေ ကျိုၚ်လဝ်ကယျိုၚ်တံ ဗစူအလံတံ အခေါၚ်နွံမံၚ်၊ ဂေတ်ဂေၚ်စန်ဒက်မာဲဂှ် ဟွံကဵုအခေါၚ်၊ ကဵုပရေၚ်ဂီုကၠီုဟွံမာန် ဒှ်မံၚ်ဟဂှ်” သာ်ဝွံသ္ဂးရ။
နကဵုဗော်ညးတံဂှ် သွက်ဒၞာဲစၠတ်ထဝ်ကောန်ဂကူ ပ္ဍဲတွဵုရးကရေၚ် အတိုၚ်စၟတ်လဝ် ဒၞာဲတိဍာ်ဆန္ဒမာဲ သီုဖအိုတ်တံကီု သွက်ဒၞာဲဆန္ဒမာဲ ကောန်ဍုၚ်အရၚ်ဂကူမန် မွဲဒၞာဲ ဘိုအ်ဂွံလုပ်ပြိုၚ် နွံမံၚ်တုဲ ပြဟ်ဟ်ဏံဂှ် ဂစာန်မံၚ် သွက်ဂွံပတိုန်စရၚ် ယၟုအလံၚ်အမာတ်တံရ သာ်ဝွံ ညးသ္ဂးရ။
စရၚ်အလံၚ်အမာတ် သွက်ဒၞာဲဆန္ဒမာဲ ဇၟာပ်စၠတ်ထဝ်တံဂှ် စနူသိပ်တမ်ပါ ၈ ပၠုပ်စရၚ်မာန်တုဲ စၟတ်တ္ၚဲ ၁၇ ဂှ် စွံလက်ကရဴအိုတ်၊ ပ္ဍဲအကြာဏံ ကလေၚ်နုက်ပတိတ်ကီု ထပက်အဇာမၞိဟ်ကီု ကၠောန်သ္ပအာမာန်ရောၚ် ကဝ်မယှေန်ပေါဲရုဲမာဲကၟိန်ဍုၚ် ကဵုလဝ်သမ္တီနွံရ။
တုဲပၠန် ပ္ဍဲအလုံဍုၚ်မွဲ ၃၃၀ ပွိုၚ်ဍုၚ်ဂှ် ခုတ်စၟတ်လဝ် ဒၞာဲဆန္ဒမာဲတံနွံတုဲ စိုပ်ဒဳဇြမ်ပါ ၂၈ မ္ဂး ပေါဲရုဲမာဲ သ္ကုတ် ၁ ဂှ် လလောၚ်တြးလဝ် သွက်ဂွံကၠောန်အာ ပ္ဍဲကဵု ၁၀၂ ပွိုၚ်ဍုၚ်ရ။
ဟိုတ်ဂှ်ရ အတိုၚ်နဲကဲလၟေၚ်ကမၠောန် ပေါဲရုဲမာဲမ္ဂး ကၠာဟွံစိုပ်တ္ၚဲရုဲမာဲ ပွိုၚ် ၆၀ တ္ၚဲဂှ် သွက်အလံၚ်အမာတ် ဗော်ပရေၚ်ဍုၚ်ကွာန်တံကီု ပူဂဵုလုပ်ပြိုၚ် ညးစၞးပုဂ္ဂလိကတံကီု ဂွံအခေါၚ်စန်ဒက်မာဲရ။
ပေါဲရုဲမာဲ ပါ်လဝ်သ္ကုတ်ပိသ္ကုတ် ကၠောန်အာဏံဂှ်တှ်ေ ပ္ဍဲသၞာံ ၂၀၂၆ ဂိတုဂျာန်နဝါရဳဂှ် ညံၚ်ဂွံစိုပ်ဒတုဲ စဳဇန် ကၠောန်သ္ပအာရောၚ် ပ္ဍဲကဵုအစဳဇန် လလောၚ်ပတိတ်ပရိုၚ် စပ်ကဵုပရေၚ်ပေါဲရုဲမာဲ သိပ်တမ်ပါ ၁၁ ဂှ် ညးလုပ်ဂကောံ ကဝ်မယှေန်တံ ဟီုဂးလဝ်နွံရ။
ပရိုၚ်-သြၚ်လောန်တိုၚ်မ်
Photo – Social Media