ပ္ဍဲရးတနၚ်သဳ ပွိုၚ်ဍုၚ်ဍာ်ဗုဂှ် ဟိုတ်နူကရောၚ်ပၞာန် ဒပ်ကဝ်မယှေန်ပၞာန် စံၚ်ပလီုထောံသ္ၚိဌာန်ဂှ်ရ ရဲဒဴမံၚ်ပၞာန် ကရပ်ၜိုတ် ၁၀၀၀ တံ ပြဟ်ဟ်ဏံ အရာကာမံက်တိုန် နွံမံၚ်ပၟိက်အရီုဗၚ်ဗွဲမပြဟ်ရောၚ် ဂွံတီနူ ဒပ်ပၠန်ဂတးဖျေံလဝ်သ္ဇိုၚ် ပ္ဍဲဒေသတံရ။
ဒပ်ကဝ်မယှေန်ပၞာန် ဇြဟတ်ကရပ် ၁၀၀ ဟိုတ်နူထပက်ကၠုၚ် ကရောၚ်ပၞာန် တုဲ ပွိုၚ်ဍုၚ်ဍာ်ဗု ပ္ဍဲကဵုကွာန် “တောင်ရင်းအင်း” ကဵု ကွာန် “ဆယ်အိမ်စု”ဂှ် အကြာဒပ်ပၠန်ဂတးတံ ပေါဲဗတိုက်ဒှ်အာ ပွိုၚ် ၃ တ္ၚဲဆက်က်ရ။
အပ္ဍဲပေါဲဗတိုက်ဏံ ဒပ်ကဝ်မယှေန်ပၞာန်တံဝွံ ပ္ဍဲကွာန် “တောင်ရင်းအင်း” ဂှ် သ္ၚိ ၃၀ မပြၚ် ကေုာံ ကွာန် “ဆယ်အိမ်စု”ဂှ် သီုကဵုဘာလကျာ်လေဝ်ပါအာ သ္ၚိ ၁၇ မ ဒးဒုၚ်စံၚ်ပလီုဏာတုဲ သ္ၚိဟွံအောန်နူ ၅၀ မပြၚ် ဒးဒုၚ်ဖံက်ကေတ်ဏာ ကပေါတ်တံရ။
ဟိုတ်နူကရောၚ်ပၞာန် ဒပ်ကဝ်မယှေန်ပၞာန် စံၚ်ပလီုထောံသ္ၚိဌာန်ဂှ်ရ ညးဒေသ “ဆယ်အိမ်စု၊တောင်ရင်းအင်း ကဵု ဖားချောင်း” ဒးဂြိပ်ပါဲအာဘဲပၞာန် ကရပ် ၁၀၀၀ နွံမံၚ်တုဲ ဒဵုအခိၚ်လၟုဟ် ညးတံဟွံဂံၚ် ကလေၚ်စဴကွာန်ဏီရ။
ပွိုၚ်ၜါသတ္တဟပြၚ် ဟိုတ်နူဒးပါဲအောပ်မံၚ် ဘဲပၞာန်ဂှ်ရ ပြဟ်ဟ်ဏံ သ္ၚု၊ စၞစ၊ ယာတ်စဵုဒၞာ ကဵု ဂဥုဲဇဗနာနာတံ နွံမံၚ်ပၟိက်ရောၚ် ညးတာလျိုၚ် ဒပ်ပါ် ၆ ဒဝ်န “ကိုပျံလွှား” ဟီုကဵုဌာန်ပရိုၚ်သြၚ်လောန်တိုၚ်မ်ရ။
လောန်ကၠုၚ်ဂိတုအဝ်ဂတ်တေံ ပ္ဍဲပွိုၚ်ဍုၚ်ဍာ်ဗု ဒၞာဲကဵုဒေသ ကလိၚ်အံၚ် ကီုလေဝ် ကရောၚ်ပၞာန် ဒပ်ကဝ်မယှေန်ပၞာန်ကဵု ဒပ်ပၠန်ဂတးတံ ပေါဲဗတိုက်ဒှ်မံၚ်တုဲ ညးဒေသ ၄၀၀၀ ပြၚ် ဒးဂြိပ်ပါဲမံၚ်တုဲ ဒဵုကဵုအခိၚ်လၟုဟ် ဟွံကလေၚ်စဴကၠုၚ်ဌာန်ဇာတိညးတံဏီရ။
ပရိုၚ်-သြၚ်လောန်တိုၚ်မ်
Photo – Social Media