ကျံက်တဝ်၊ သိပ်တမ်ပါ ၁၄
ဘာတန်သၠုၚ်ပုဂ္ဂလိက ၜါမ ပ္ဍဲတွဵုရးရခေၚ် ပွိုၚ်ဍုၚ်ကျံက်တဝ် ဟိုတ်နူ ဒးဒုၚ်ကြဳဏာဗုမ်ဂှ်ရ ဒးကလေၚ်ပလန်တဲဇၞော်ဇၞော်ရောၚ် ဒပ်ပၞာန်အာရက္ခ AA ဟီုရ။
ပ္ဍဲသိပ်တမ်ပါ ၁၂ အခိၚ်နူဂယးပြဟ်ဂှ် ဒၞာဲကဵုဘာတန်သၠုၚ်ပုဂ္ဂလိက “ပညာပန်းခင်း” ကဵု “အမြင်သစ်” နွံမံၚ်ကွာန် “သရက်တပင်” ပွိုၚ်ဍုၚ်ကျံက်တဝ်ဂှ် နူကဵုဒပ်ကဝ်မယှေန်ပၞာန် ကြဳဖျေံဏာဗုမ် ၅၀၀ ပံၚ် ၜါမ ရ။
ဟိုတ်နူဒပ်ပၞာန် ကြဳဖျေံဗုမ်တုဲ ကွးဘာ ၁၉ တၠချိုတ်အာ ၂၂ တၠ ဒးလဝ်ဝပ်ရဂှ် နူကဵု ဒပ်ပၞာန်အာရက္ခ AA သီုကဵုစရၚ်ယၟု လလောၚ်ပတိတ်လဝ် ပရိုၚ်ရ။
ပွမဒပ်ပၞာန် လ္တူကြဳဖျေံဏာဗုမ်ဂှ် ဒဵုကဵုညံၚ်သ္ဂောံကလိဂွံ မၞုံကဵုပရေၚ်ဓရ်ယာ ဖန်ဖက်ရေၚ်တၠုၚ်အာတုဲ လ္တူညးဖန်ဖက်လဝ်၊ ညးကဵုလဝ်အမိၚ် ကေုာံ ညးဆက်စပ်မံၚ်တံဂှ် မ္ဒးကလေၚ်ပလန်ဏာတဲဇၞော်ဇၞော် ပိုတ်ပိုတ် သ္ကုတ်တ်ရောၚ် ဒပ်ပၞာန်အာရက္ခ AA ဟီုရ။
တုဲပၠန် နကဵု ဒပ်ပၞာန်အာရက္ခ AA ကီုလေဝ် တၚ်နၚ် ဂကောံပၞာန် ပွမ လုလောန်လဝ် အမှုရာဇဝတ်ပၞာန်တံဂှ်ကီု ပလံၚ်ဗစိုပ်ဏာ ကုဇရေၚ် ဂကောံဂၠးကဝ် မဆေၚ်စပ်တံရောၚ် ကဵုလဝ်သမ္တီနွံရ။
ပ္ဍဲတွဵုရးရခေၚ် အပ္ဍဲကဵုသၞာံဏံ ဟိုတ်နူ ၜၚ်ကျာ ဒပ်ကဝ်မယှေန်ပၞာန် ဗတိုက်တုဲ ညးဍုၚ်ကွာန် ၈၉ တၠ ချိုတ်လဝ်၊ ၉၁ တၠ ဒးလဝ်ဝပ်နွံရောၚ် နကဵုတၚ်နၚ် ဒပ်ပၞာန်အာရက္ခ AA ပတိတ်လဝ် ဂွံတီရ။
ပရိုၚ် – သြၚ်လောန်တိုၚ်မ်
Photo – AA