မတ်မလီု၊ သိပ်တမ်ပါ-၁၅
ပ္ဍဲကဵုတွဵုရးမန် ကဝ်မယှေန်ပၞာန် သီအဝဵု သွက်ဂွံပံက်အာ တန်ဗတောန် အရာယိုက်ဂၠေၚ်ဝန်ပၞာန် စၟတ် ၁၇ ဂှ် သၟတ်ပ္ဍဲကဵုဒေသ ကရပ် ၂၄၀ ဒးဒုၚ်ပကောံဏာ ကောန်ပၞာန်တၟိရဂှ် နကဵုတၚ်နၚ် ကဝ်မယှေန်ပၞာန် လလောၚ်လဝ် ဂွံတီရ။
သၟတ်ဒးဒုၚ်ပကောံလဝ် နဒဒှ်ကောန်ပၞာန်တၟိတံဂှ် သ္ကိုပ်ဝန်ဇၞော် တွဵုရးမန် ကဝ်မယှေန်ပၞာန် ခါန်ကၞက် ဥူအံၚ်ကျဳတိၚ် အာဆဵုဂဗလဝ် ဒၞာဲဘာပရေၚ်ပညာ စၟတ်(၆) နွံမံၚ်ဌာန်ဂအုပ်ပၞာန်ရးအဂၞဲ ဍုၚ်မတ်မလီု ပ္ဍဲကဵု သိပ်တမ်ပါ-၁၂ ဂှ်ရ။
နကဵုကောန်ပၞာန်တၟိ သၟတ်ဒးဒုၚ်ပကောံလဝ်တံဝွံ ရဲဂကောံ ပရေၚ်အုပ်ဓုပ်အရာပ်/ကွာန်တံ ကော်ကေတ်လဝ်ဂှ်ကီု၊ ရဲတိတ်မ္ၚး အခိၚ်ဗ္တံ၊ ရဲဒးဒုၚ်ရပ်လဝ် နူကဵုဒေသ ညးတြုံၜါတၠဍိုက်ကွဳလိုန်ဓါတ်ဟွံဂွံ၊ စနူကဵု ညးအာ/စဴကၠုၚ်နူကမၠောန်တံ မပါလုပ်မံၚ်ရောၚ် ညးဒေသတံ ဟီုဂးမံၚ်ရ။
ဟိုတ်နူကဵု ကဝ်မယှေန်ပၞာန် ပကောံမံၚ်ကောန်ပၞာန်ဂှ်ရ အကာဲအရာ ဟွံဂံၚ်အာကမၠောန် ဒှ်မံၚ်တုဲ သၟတ်ဂမၠိုၚ် ဆက်တိတ်မံၚ်ဍုၚ်မ္ၚး နွံမံၚ်ရောၚ် သၟတ်ဒေသမွဲတၠ ဟီုရ။
“စိုတ်ဒွိၚ်သၟတ်တံဂၠိုၚ်တိုန်တုဲ လ္ၚဵုတံ တိတ်အာဍုၚ်မ္ၚးနွံမံၚ် ဗီုပြၚ်နာနာသာ်ရ၊ နဲကဲစုၚ်ၚ် စ္ဍးတိတ်မံၚ်နူကဵုဍုၚ်ဗမာအိုတ်ယျ၊ အပ္ဍဲဍုၚ်ဗမာ ပြဟ်ဟ်ဏံ ဇြဟတ်သၟတ်တံ အဓိကဟၟဲရပုဟ်။ နွံမံၚ်ပၠန်လေဝ် ဒးဒှ်မံၚ်ဒွိၚ်ဒွာဲဂၠိုၚ်ကွေံကွေံ ဟဂှ်တှ်ေ သၟတ်တံဟွံဂံၚ်အာကၠုၚ် ဟွံဂံၚ်အာကမၠောန် စိုပ်မံၚ်ဘဝဏံအိုတ်ယျ” သာ်ဝွံသ္ဂးရ။
သွက်တန်ဗတောန်ပၞာန်ဂှ် ကဝ်မယှေန်ပၞာန် တံၚ်ရပ်ပဝ်တာ သၟတ်ဒေသတံ၊ အဃောအာမံၚ်တရဴ ရပ်ကော်ဏာ၊ ပ္ဍဲကဵုဒၞာဲကမၠောန်တံလေဝ် လုပ်ရပ် ကော်ဏာတုဲ နကဵုကောန်ပၞာန်တၟိ ပကောံမံၚ်ဟဂှ်ရ။
နနဲအဓ္ဓမ ဟိုတ်နူကဝ်မယှေန်ပၞာန် ပကောံမံၚ်ကောန်ပၞာန်တၟိတုဲ သၟတ်ဗွဲမဂၠိုၚ် ကွာ်မံၚ်လ္တူဂၠံၚ်တံဂှ် ပွမဂီုကၠီုတံဟၟဲသၟးဟွံက မံၚ်ဒၟံၚ် အပ္ဍဲသ္ၚိပၠန်လေဝ် နဒဒှ် ကောန်ပၞာန်တၟိ အခိၚ်ဟွံရုဲ ဒးဒုၚ်ပကောံဏာမာန်တုဲ ဒးမံၚ်တန်တဴအာ သီုကဵုစိုတ်ဒဝိၚ်တံရဂှ် သၟတ်ဒေသတံ ဟီုမံၚ်ရ။
မွဲလပါ်ဂှ်ပၠန် ပေါဲရုဲမာဲကြပ်ကၠုၚ်ဂှ်ရ ကဝ်မယှေန်ပၞာန် နွံမံၚ်ပၟိက်ကဵု ဇြဟတ်ပရေၚ်ဂီုကၠီုတုဲ ပဵုနူကဵု ဂိတုကၠာကၠာတေံဏီ ထပ်ပကောံဟလိုၚ်တိုန်မံၚ် ဇြဟတ်ကောန်ပၞာန်တၟိဂှ် ဂွံဆဵုညာတ်မံၚ်ကီု ဗီုပြၚ်ပကောံကောန်တၟိပၠန် စကာနဲကဲစုၚ်ၚ်တုဲ ကၠောန်မံၚ်ဟဂှ်ရ။
အတိုၚ်တၚ်နၚ်ဌာန်ပရိုၚ် သြၚ်လောန်တိုၚ်မ် ပကောံဂွံလဝ်မ္ဂး ပ္ဍဲကဵုတွဵုရးမန် စနူဘာပကတ်ပကေၚ် အရာယိုက်ဂၠေၚ်ဝန်ပၞာန် နူကဵုလၟေၚ်စၟတ် ၁ ဒဵုစိုပ် ၁၇ ဂှ် သၟတ်လုပ်အဝေါၚ်ယိုက်ဂၠေၚ်ပၞာန် ဗဒါဲ ၃၀၀၀ နဒဒှ်ကောန်ပၞာန်တၟိ ဒးဒုၚ်ပကောံလဝ် နွံရ။
ပရိုၚ် – သြၚ်လောန်တိုၚ်မ်
Photo – MOI