ကုလသမဂ္ဂ၊ သိပ်တမ်ပါ ၁၄
ညံၚ်ဂွံကလေၚ်ပၠုပ်လမျီု သွက်ဂွံသောၚ်ကလးပရေၚ်ပဋိပက္ခ အေတ်သရေ-ပါလေတ်သတိုၚ်ၜါဍုၚ် ဂကောံဟာမာတ်သ်တံဟွံပါဂှ် နူကဵု သဘၚ်သဳကၠဳ ပရေၚ်ဂီုကၠီုကုလသမဂ္ဂ ပါ်မာဲ ထံက်ဂလာန် ဖျေံဏာသ္ဂုတ်သွာတ်ရ။
နိဂီုဍုၚ် ၁၄၂ ဍုၚ် ထံက်ဂလာန် တၚ်သ္ဂုတ်သွာတ်ဏံတုဲ အေတ်သရေကဵု မဟာမိတ်အဓိက အမေရိကာန် ၁၀ ဍုၚ်တံ ဟွံတုပ်စိုတ်ရ။ ၁၂ ဍုၚ်ဂှ် ဟွံစုတ်လဝ်မာဲ ဂွံတီရ။
အပ္ဍဲကဵုသ္ဂုတ်သွာတ်ဏံ ပတိုန်လဝ်ဒုဟ်ကု ဂကောံဟာမာတ်သ် သောၚ်ၚ်ကၠးကၠးနွံတုဲ သွက်ဂွံဖျေံလွဟ် အာတ်မိက်လဝ်ရ။
သွက်ဂွံပျုတ်ဗဒေက် အရာဂကောံဟာမာတ်သ် ဗတိုက်လဝ် ပ္ဍဲသၞာံ ၂၀၂၃ အံက်တဝ်ပါတေံ လီုကၠုၚ်လဝ် ပွိုၚ်ကြပ်အာၜါသၞာံဂှ် အေတ်သရေ တင်ဒုဟ် ကီုလေဝ် ပြၚ်သေတ်ကဵု သဝ်ဒဳအာရေဗဳယာတံ ပတိုန်လဝ် တၚ်သ္ဂုတ်သွာတ် ဒှ်မံၚ်ဗီုပြၚ် အဓိပ္ပါယ်ၜါသွာၚ် ဟွံသေၚ်။
ပရေၚ်ဂကောံဟာမာတ်သ် ဗတိုက်လဝ် အံက်တဝ်ပါ ၇ ဂှ် သဘင်သဳကၠဳဇၞော် ပျုတ်ဗဒက်ဏာတုဲ ညံၚ်ဂွံကလေၚ်ဗလးကဵု ညးဒးလဝ်ပးဒၞန်သီုဖအိုတ်တံ အာတ်မိက်လဝ်ရ။
ပေါဲပၞာန်ဂါဇာ ညံၚ်ဂွံဒေါအ် သွက်ဂွံပံၚ်ကောံဂစာန်အာ ဖတိုက်ဖအောဝ်လဝ်တုဲ ဒုၚ်သ္ဇိုၚ်တၚ်သောၚ်ကလး အေတ်သရေ-ပါလေတ်သတိုၚ်ၜါဍုၚ်ဂှ် သွက်သ္ဂောံဂွံ ပရေၚ်ၜိုဟ်လလမ်ဍာ်ဇမၠိၚ်မာန် ဘိုင်ဂစာန်အိုတ်ညိဂှ် ဖတိုက်ဖအောဝ်လဝ်ရ။
ပွမဒေါအ် ပေါဲပၞာန်ဂါဇာကီု ပရေၚ်အုပ်ဓုပ် ဂကောံဟာမာတ်သ် ဖအိုတ်ကၠေံထောံ ပ္ဍဲဂါဇာတုဲ သီုကဵုလွဟ်ဍေံတံ ဒးသၠောဲပအပ်ကဵု ဂကောံပိုၚ်ပြဳအဝဵု ပါလေတ်သတိုၚ်ရောၚ် ပ္ဍဲတၚ်လလောၚ် သဘၚ်သဳကၠဳဇၞော် ကုလသမဂ္ဂရ။
ဣဝွံ ဒးကိတ်ညဳကဵု နကဵုတၚ်ရန်တၟံဏံ သွက်အရာပိုၚ်ပြဳအဝဵု ဍုၚ်ပါလေတ်သတိုၚ်သၠးပွး ညံၚ်ဂွံမံက်တိုန် ဒးဒှ်ရောၚ် ပ္ဍဲလိက်လလောၚ်တြးဂှ် ချူလဝ်ရ။
ပ္ဍဲသိပ်တမ်ပါ ၂၂ ကၠောန်လဝ် ဍုၚ်နယူယံက် သဘၚ်သဳကၠဳဇၞော်ကုလသမဂ္ဂဂှ် နဒဒှ်ဍုၚ်ပါလေတ်သတိုၚ် လုပ်ဗဗွဲသၞောဝ် မ္ဒးသ္ပအာစၟတ်သမ္တီရောၚ် ပြၚ်သေတ်ကဵု ဗြိတိၚ် သီုကဵုဍုၚ်လ္ၚဵုတံ စွံလဝ်ဂတိနွံတုဲရ။
ယဝ်ရ သ္ပအာစၟတ်သမ္တီမ္ဂး မွဲလပါ်ဂှ် ကလေၚ်ပလန်တဲရောၚ် အေတ်သရေ ကဵုလဝ်သတိနွံရ။
Ref:AFP