ခတ္တမန္ဒူ ၊ သိပ်တမ်ပါ ၁၆
ဟိုတ်နူပေါဲထ္ၜးဆန္ဒ “Gen Z” သၟတ်ဇၞော်တဴကၠုၚ်လဝ် ပ္ဍဲခေတ်အေန်တာနိတ်တံ အလဵုအသဳတြေံ ပြဟ်စှ်ေအာတုဲ က္ဍိုပ်သ္ကိုပ်နဳပဝ်တၟိဂှ် နဒဒှ်သ္ကိုပ်ဝန်ဇၞော်တၟိ အခိၚ်စယိုက်ဂၠေၚ်တာလျိုၚ်ဝွံ အရာပွမဗက်အဂတိတံ ညံၚ်သ္ဂောံသ္အးကၠေံအာ အတိုၚ်ညးထ္ၜးဆန္ဒတံအာတ်မိက်လဝ် ကၠောန်အာကဵုရောၚ် ပ္ဍဲကဵုသိပ်တမ်ပါ ၁၄ ဂှ် သ္ပဏာဂတိရ။
စကေတ်တာလျိုၚ် ပ္ဍဲကဵုသိပ်တမ်ပါ ၁၂ တုဲ နဒဒှ်ဂလာန်ဗကန် ကုညးဍုၚ်ကွာန် အလန်ပထမကၠာအိုတ်ဂှ် အတိုၚ်တၞောဝ်ဒတောဝ် Z တံ ဗီုချပ်လဝ် ပိုဲဒးကၠောန်အာရောၚ် သ္ကိုပ်ဝန်ဇၞော်တၟိ သူယှဳလာ ကာကဳ ဟီုဏာရ။
ပွမအာတ်မိက် ဂကောံဏံမ္ဂး ပွမဗက်အဂတိတံ ညံၚ်သ္ဂောံ သ္အးကၠေံကီု အရာပရေၚ်အုပ်ဓုပ် ညံၚ်ဂွံခိုဟ်အာ ကေုာံ နကဵုပရေၚ်ပိုန်ဒြပ်တံ သွက်ဂွံညဳသၟဟ်အာမာန်ရောၚ် သာ်ဝွံ ညးထပေၚ်ဟီုဏာကီုရ။
ညးဇၞော် ပရေၚ်သၞောဝ်ဓရ်တြေံ နွံအယုက် ၇၃ ဝွံ သွက်ညးမစုတိအာ ပ္ဍဲပရေၚ်ကလိုက်ကၟဵုတံဂှ် နကဵုစၟတ်သမ္တီပွမအောန်စိုတ် ပွိုၚ်မွဲမိနေတ်ညိၚ် သ္ပရှ်ေသှ်ေအဲပရဲတုဲ ကၠောန်သ္ပကောံဓရီု ဂကောံအလဵုအသဳရ။
အကြာပေါဲထ္ၜးဆန္ဒပွိုၚ်ၜါတ္ၚဲဂှ် မၞိဟ်ဟွံအောန်နူ ၇၂ တၠချိုတ်အာ၊ ၁၉၁ တၠ ဒးအာဝပ်နွံရ သာ်ဝွံ သ္ကိုပ်ညးအုပ်ကာ ဂကောံအလဵုအသဳ အက်ခ်နာရာယာမ် အာယဲလ် ဟီုလဝ် ပ္ဍဲသိပ်တမ်ပါ ၁၄ ဂှ်ရ။
ဗၞတ်အကြာမွဲဗွဝ်စှ်သၞာံလံ ပၞာန်အပ္ဍဲဍုၚ် ဒေါအ်အိုတ်အးတုဲ ပ္ဍဲသၞာံ ၂၀၀၈ ဂှ် ပလီုထောံသၞောတ်ဧကရာဇ် ဗွဲကြဴဏံ အကာဲအရာဟွံညိင်ဝပ် ပွမပရေအ်အိုတ်မွဲ ဒှ်ကၠုၚ်ရ။
ညးစၞးထ္ၜးဆန္ဒတံ၊ ညးဇၞော်ဆေၚ်ကဵုဒပ်ပၞာန်တံကေုာံ အကြာသမ္မတတံ ပညဳပညပ်သဳကၠဳညးသ္ကံတုဲ နဒဒှ်ညးက္ဍိုပ် အလဵုအသဳ ရုဲစှ်ခါန်ကၞက်လဝ် မေတ်သေတ်ကာကဳ ရ။
သၟတ်တံ စကာ App တုဲ ရုဲစှ်ဏာညး နဒဒှ်သ္ကိုပ်ဝန်ဇၞော်ရ။
ခါန်ကၞက်ညးတုဲ ခြာဟွံလံ ပလီုကၠေံစၠတ်ထဝ်၊ နူဂှ်ပၠန် စိုပ် ၂၀၂၆ ဂိတုမာတ် ၅ မ္ဂး ကၠောန်အာပေါဲရုဲမာဲရောၚ် လလောၚ်တြးဏာလဝ်ရ။
Ref:AFP