မက်ဒရေတ်၊ ဝါရှင်တန်၊ သိပ်တမ်ပါ ၁၇
အက်ပလဳကေယှေန် တြးဗဳဒဳယောဒမၠေံ TikTok သွက်ဂွံသၠောဲပြံၚ်ကဵု ပွအရာပိုၚ်ပြဳ သၟဝ်တဲအမေရိကာန် စပ်ကဵုမူစေဝ်ပၞောန် ဂွံပရေၚ်တုပ်စိုတ်ရ ညးတာလျိုၚ် အမေရိကာန်ကဵု ကြုက် ဟီုဏာ ပ္ဍဲသိပ်တမ်ပါ ၁၅ ဂှ်ရ။
ပရေၚ်တုပ်စိုတ်ဏံဝွံ အခိၚ်သမ္မတ အမေရိကာန် ဒဝ်နေဝ်ထရကဵု သမ္မတကြုက် ယှဳကျေအ်ဖျေန်တံ ပ္ဍဲသိပ်တမ်ပါ ၁၉ ပ္ဍဲကဵုအခိၚ်ဆဵုဂဗအာ ဒၞာဲဍုၚ်မက်ဒရေတ်ဂှ် သ္ပအာဒတန်ရောၚ် ညးတာလျိုၚ်ၜါဍုၚ်တံ ဟီုရ။
ညးစကာသုၚ်စောဲမံၚ် ပ္ဍဲအမေရိကာန် ၁၇၀ ပြကောဋိကိုတ်ပြၚ် စပ်ကဵု အက်ပလဳကေယှေန်ဏံ ပွမအရာကေတ်ကၠုၚ်မံၚ် ပရေၚ်တၚ်တုပ်စိုတ်တံ အကြာပရေၚ်ပိုန်ဒြပ် မဂၞန် ၁ ကဵု မဂၞန် ၂ ဂၠးကဝ်တံ သဳကၠဳလဝ်ဂိတုဗွဲမဂၠိုၚ်တုဲ အကြာတၚ်ဝါတ်ခက်ခုဲတံဂှ် ဂွံအာတၚ်တုပ်စိုတ်ရ။
ဍုၚ်ၜါဍုၚ်ဏံလေဝ် ပရေၚ်ပၞာန်ပရေၚ်ပိုန်ဒြပ် သွက်ဗွဝ်ဖျာဂၠးတိ မသၠဲလး ပွမချဳဒရိုက်ဏာတံ ညံၚ်ဂွံပြေပြံၚ်အာမာန်ဂှ် ဂစာန်မံၚ်အိုတ်ရ။
တ္ၚဲသိပ်တမ်ပါ ၁၇ ဂှ် ဟိုတ်နူခုတ်စၟတ်လဝ်တ္ၚဲလက်ကရဴအိုတ်တုဲ ပ္ဍဲကဵုအမေရိကာန် ညးစကာမံၚ် အက်ပလဳကေယှေန်ဏံ ယှုက်ထုဲအာမာန်ဂှ်ရ ဝန်ဇၞော်ပရေၚ်ဘဏ္ဍာ အမေရိကာန် သကိုအ် ဗါတ်သေအ် ဆဵုဂဗလဝ်ကဵု သ္ကိုပ်ပညဳပညပ်ကြုက်တံ ပ္ဍဲဍုၚ်မက်ဒရေတ် နိဂီုဍုၚ်သပုၚ်တုဲ သွက်ဂွံကေတ်ပရေၚ်တၚ်တုပ်ဂှ် သွက်သ္ကိုပ်ပညဳပညပ်ကြုက်တံ ဒှ်ကၠုၚ်ဇြဟတ်ဟရိုဟ်ရောၚ် ဟီုရ။
ပရေၚ်တၚ်တုပ်စိုတ်တံ ညံၚ်ဂွံချိုတ်ပၠိုတ် သွက်ဂွံခုတ်စၟတ်အာ ပွိုၚ် ၉၀ တ္ၚဲ ဆုတ်စွံလဝ်မာန်ပၠန်ရောၚ် ညးထပ်ဟီုထပေၚ်လဝ်ရ။
ဆဂး စပ်ကဵု ပရေၚ်တၚ်တုပ်စိုတ်ဏံတုဲ သွက်ဂွံသောၚ်ကလး ဟီုလဴကဵု တၚ်နၚ်ချိုတ်တ်ပၠိုတ်တ်တံဂှ် ညးတေံဟွံတုပ်စိုတ်ရ။
စပ်ကဵုခုတ်စၟတ်လဝ် ပရေၚ်သ္ပစၟတ်သမ္တီ ပ္ဍဲကဵုတၚ်တုပ်စိုတ်တံ အခိၚ်ဟီုလလောၚ်ဟီုလဝ်ဂှ် လက်ျှန်တၠုၚ်လအာ စပ်ကဵုယေန်သၞာၚ် TikTok ဗီုပၟိက်ညးတာလျိုၚ်ကြုက်တံဂှ် ဆက်ထိၚ်ဒဝ်အာကဵုရောၚ် ဝန်ဇၞော်ပရေၚ်ဘဏ္ဍာ အမေရိကာန် သ္ဂးလဝ်ရ။
ကာန်ပနဳဏံ သၠောဲပြံၚ်ပအပ်ဏာကဵု သၟဝ်အမေရိကာန် ပိုၚ်ပြဳတုဲမ္ဂး ကြုက်တံ ဆက်ပိုၚ်ပြဳလဝ် ယှေဝ်ယာဏီဟာ သၟာန်ဏံဂှ် နကဵုဇကု ဆဵုဗဂကဵု သမ္မတကြုက် ယှဳတုဲမှ သ္ပကဵုဒတန်မာန်ရောၚ် ဝန်ဇၞော်ပရေၚ်ဘဏ္ဍာ အမေရိကာန် သကိုအ် ဗါတ်သေအ် သှ်လဝ်ရ။
လ္တူတၚ်နၚ်ပူဂဵု စကာသုၚ်စောဲလဝ် TikTok ပကောံလဝ်တုဲ သၠောဲပလံၚ်ကဵုဏာ ဗော်ကောန်မျူနေတ်ကြုက်တံမာန်ဂှ်ရ ဒးဂွိၚ်ဂွာဲမံၚ်ကဵု ပရေၚ်ဂီုကၠီုဍုၚ်ဂးတုဲ သွက်ဂွံသၠောဲပြံၚ်ပအပ်ကဵု အရာမပိုၚ်ပြဳ သၟဝ်အမေရိကာန်တံဂှ် အကြာၜါလပါ်တံ ပညဳကၠုၚ်ဂှ် လအ်လမံၚ်ရ။
Ref:Reuters