လံၚ်လုၚ်၊ သိပ်တမ်ပါ ၁၇
ပ္ဍဲရးတနၚ်သဳ ပွိုၚ်ဍုၚ်လံၚ်လုၚ် ကရောၚ်ပၞာန် ဒပ်ကဝ်မယှေန်ပၞာန် ထပက်လုပ်ကၠုၚ် ကွာန်တဗျာတုဲ ရပ်ကော်ဏာ ညးတြုံနူဒေသ ပန်တၠရဂှ် ဂွံတီကေတ် နူကဵု ဂကောံဇြဟတ်ပၠန်ဂတးတံရ။
ဒပ်ကဝ်မယှေန်ပၞာန် ဖျေံလဝ်သ္ဇိုၚ် လ္တူဍုၚ်လံၚ်လုၚ်ဝွံ ပ္ဍဲဂိတု သိပ်တမ်ပါ ၁၅ အခိၚ်နူဂယး ဂေတ်မံၚ်ကၚ် ဒၞာဲကွာန်ကရပ် ဗ္ဒါဲဍုၚ်တံဂှ် ကရောၚ်ပၞာန် ထပက်လုပ်ကၠုၚ် ကွာန်တဗျာရ။
ကရောၚ်ပၞာန် ဒပ်ကဝ်မယှေန်ပၞာန် ထပက်လုပ်ကၠုၚ် ကွာန်တဗျာတုဲ ဗက်စၟဳစၟတ်ဂၠိုက်ဂၠာဲမံၚ် သ္ၚိဌာန်ညးလ္ၚဵုတံတုဲ ရပ်ကော်ဏာ “ကိုမောင်လှထွေး (အယုက် ၃၀ )၊ ကိုဖိုးဖေ၊ ကိုမင်းဟို ကဵု ကောန်ဗၠာဲညး အပံၚ်ဖအိုတ် ၄ တၠနွံမံၚ်ရဂှ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ကရောၚ်ပၞာန်ဏံဝွံ ပ္ဍဲကွာန်တဗျာ ကရပ်ဍုၚ်လံၚ်လုၚ် ဟိုတ်နူ ဆက်နွံဒၟံၚ် ဒဵုကဵု ဂိတုသိပ်တမ်ပါ ၁၅ အခိၚ်ဒေါဝ်တ္ၚဲတုဲ ညးဒေသတံ ဂွိၚ်ဂွာဲ ဖေက်လကိုတ်မံၚ်အိုတ်တုဲ ဒးဂြိပ်ပါဲမံၚ်ရဂှ် သ္ဂးရ။
ဒပ်ကဝ်မယှေန်ပၞာန် ဖျေံလဝ်သ္ဇိုၚ် လ္တူဍုၚ်လံၚ်လုၚ်တံဂှ် ခြာဟွံလံဟွံလံ ထပက်ကရောၚ်ပၞာန်တုဲ စၟဳစၟတ်ကောန်ကွာန်တံကီု သီုကဵု ရပ်ကော်ဏာကီု ကၠောန်ကၠုၚ်မံၚ် သ္ဂးရ။
ကရောၚ်ပၞာန် ဒပ်ကဝ်မယှေန်ပၞာန် ရပ်ကော်ဏာလဝ် ညးတြုံ နူဒေသပန်တၠဏံဂှ် ဒဵုကဵုအခိၚ်လၟုဟ် ကလေၚ်ဗၠးတိတ်ကၠုၚ် ဟၟဲဏီ တုဲ မိမကောဒေံညးတံပၠန် ညိလေဝ်ကေတ်အဆက် ဟွံဂွံဏီပုဟ် ဂွံတီရ။
စနူတုဲကၠုၚ် ဂိတုဂျူလိုၚ်တေံ ပ္ဍဲရးတနၚ်သဳ ဒပ်ကဝ်မယှေန်ပၞာန် ထ္ၜးဟိုတ်နာနာသာ်တုဲ ရပ်ဂွံဏာလဝ်ညးဍုၚ်ကွာန် ကောန်အရာပ် ဟွံအောန်နူ ၁၀၂ တၠနွံတုဲ ၃၉ တၠဟေၚ် ကလေၚ်ဗၠးကၠုၚ်နွံ သာ်ဝွံ နူကဵု ဂကောံသုတေသနပ္ဍဲဒေသ FE5 Thanintharyi လလောၚ်ပတိတ်လဝ်နွံရ။
ပရိုၚ်-သြၚ်လောန်တိုၚ်မ်
Photo – CJ