ဗြဝတဳ၊ သိပ်တမ်ပါ ၁၇
ပ္ဍဲကဵုတွဵုရးကရေၚ် ဒပ်ကဝ်မယှေန်ပၞာန် ကလေၚ်ထိၚ်ချုက်ဂွံအာ ဍုၚ်ဗြဝတဳတုဲ ပ္ဍဲအရာပ်လ္တူဍုၚ်တံဂှ် စွံပွန်ကဵု သၟတ် ကၠုၚ်ကၠောန် ကမၠောန် နူဌာန်သ္ၚောဲသ္ၚောဲတံတုဲ ကၠောန်သ္ပ တံၚ်ရပ်မံၚ်ပဝ်တာနွံမံၚ် ရဂှ် တမ်ရိုဟ်ကၞက်ပရိုၚ်ဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ပ္ဍဲကဵုဂိတုသိပ်တမ်ပါ သတ္တဟပထမဂှ် ဒပ်ကဝ်မယှေန်ပၞာန် ကလေၚ်သီဂွံဏာ ဒေသတေန်ဂါန်ညဳနံၚ်တုဲ နူဂှ်မွဲအဆံၚ် နကဵုဇြဟတ်ဗွဲမဂၠိုၚ် လုပ်စိုပ်ကၠုၚ် အပ္ဍဲဍုၚ်ဗြဝတဳဂှ် ဖျေံစွံလဝ်ဒၞာဲ ပ္ဍဲကဵုဂြိုဟ်ဍုၚ်ဒၞာဲအဓိကတံရ။
နကဵုဇြဟတ်ဗွဲမဂၠိုၚ် လုပ်စိုပ်ကၠုၚ် အပ္ဍဲဍုၚ်ဗြဝတဳ ဖျေံဒပ် ကလေၚ်ထိၚ်ချုက်မာန်အာတုဲ ဗွဲကြဴဏံ ဒပ်ကဝ်မယှေန်ပၞာန်ဝွံ ပံၚ်တောဲကဵု ဒပ်ပၞာန်မၚ်ပယျဵုကရေၚ် BGF တံဂှ် လ္တူဍုၚ် အကြာရုၚ်ဝေင်ဂုၚ်၊ ဒၞာဲ KTV ဂမၠိုၚ် ကေုာံ ဒၞာဲကဵုဌာန်ကမၠောန်နာနာ သၟတ် နူကဵုဒေသဌာန်သ္ၚောဲ ကၠုၚ်ကၠောန်မံၚ်ကမၠောန်တံဂှ် သွက်ဂွံယိုက်ဂၠေၚ်ဝန်ပၞာန် တံၚ်ရပ်ကော်ဏာပဝ်တာရဂှ် တမ်ရိုဟ် ကၞက်ပရိုၚ်ဒေသတံ သ္ဂးရ။
တုဲကၠုၚ်တ္ၚဲအကြာတံဏံပၠန် အပ္ဍဲအရာပ် ၄ လ္တူဍုၚ်ဗြဝတဳမွဲဓဝ်ဂှ် သၟတ် ဟွံအောန်နူကဵု ၂၀ တၠပြင်င် သွက်ဂွံယိုက်ဂၠေၚ်ဝန်ပၞာန်ဂးတုဲ ဒပ်ကဝ်မယှေန်ပၞာန် တံၚ်ရပ်ကော်ဏာပဝ်တာရဂှ် တမ်ရိုဟ်ကၞက်ပရိုၚ် ဒေသတံ ဟီုရ။
သၟတ်ဒးဒုၚ်ရပ်ဏာလဝ် သီုဖအိုတ်တံဂှ် ဒပ်ကဝ်မယှေန်ပၞာန် ပလံၚ်ဗစိုပ်စွံလဝ် အပ္ဍဲတမ်ဒပ် ၂၇၅ ဒပ်မဖျေံလဝ်သ္ဇိုၚ် ဍုၚ်ဗြဝတဳ တုဲ ကောန်သၟတ် ဒးဒုၚ်ရပ်ဏာလဝ်တံဂှ်လေဝ် မိမကောဒေံညးတံ ကေတ်အဆက်ဟွံဂွံတုဲ ကလေၚ်နုက်ကေတ်ဟွံဂွံကၠုၚ် သ္ဂးရ။
တုဲပၠန် ဒၞာဲလ္ၚဵု တၠဆေၚ် KTV, ဟဝ်တေဝ်၊ ရုၚ်ဂုၚ်တံဂှ် မၞိဟ်သၟဝ်ဍေံတံကၠောန်မံၚ်ကမၠောန်ဏံ ဍေံတံဟွံဒးစိုတ်မ္ဂး ဆက်ဖုၚ် ကဵု ရုၚ်ဗၠာဲသၟိၚ်တုဲ ကဵုရပ်ထိၚ်ဏာလေဝ်နွံ တမ်ရိုဟ်ကၞက်ဗြဝတဳတံ သ္ဂးရ။
လ္တူသၟတ်ဒးဒုၚ်ရပ်ဏာလဝ်တံဂှ် လုပ်ယိုက်ဝန်ပၞာန်ဟာ သာ်ဂှ်ဟွံသေၚ် စဴသ္ၚိဟာ ရဲဒပ်ကဝ်မယှေန်ပၞာန်တံသၟာန်တုဲ ယဝ်ရ စဴသ္ၚိမ္ဂး ဒးဒုၚ်ဖျေံထံၚ်ကၠာတုဲမှ ဂွံအခေါၚ်စဴရောၚ် မဒှ်တုဲ သၟတ် ဒးဒုၚ်ရပ်လဝ်တံ လုပ်ယိုက်ဝန်ပၞာန်ရောၚ် ရုဲစှ် သွဟ်ကဵုဏာအိုတ်ရဂှ် တမ်ရိုဟ်ကၞက်ပရိုၚ်တံဟီုတုဲ ဂွံတီရ။
အပ္ဍဲကဵုတွဵုရးကရေၚ် ဂကောံပကောံကောန်ပၞာန် ဒပ်ကဝ်မယှေန်ပၞာန်ဝွံ သွက်တန်ဗတောန် ဘာပၞာန်တၟိတၟိတံဂှ် သၟတ်ရပ်ဂွံလဝ်သၟးဟွံက သွက်ဂွံယိုက်ဝန်ပၞာန်ဂှ် လိၚ်စုတ်သၟတ်တံတုဲ ပလံၚ်ဗစိုပ်လဝ် ဘာပၞာန်တံလေဝ် နွံမံၚ်ကီုရောၚ် ဂွံတီရ။
ပရိုၚ်-သြၚ်လောန်တိုၚ်မ်
Photo – CJ