နေပျဳတဝ်၊ သိပ်တမ်ပါ ၁၇
သွက်ပေါဲရုဲမာဲ ဒပ်ကဝ်မယှေန်ပၞာန် သ္ကိုပ်သ္ကမကၠောန်အာဏံ သွက်သ္ဂောံဂွံမာဲ ဒစးဒုၚ် နူကဵု ညးပါဲဒဴသ္ၚိဌာန်ယာယဳ ဟီုမွဲနဲပၠန် နူကဵု ရဲဒဴပၞာန်တံမာန်ဂှ် ကဝ်မယှေန်ပေါဲရုဲမာဲ ကၟိန်ဍုၚ် UEC ကဵုကၠုၚ်သမ္တီ ပ္ဍဲဂိတုသိပ်တမ်ပါ ၁၅ ဂှ်ရ။
အတိုၚ် တၚ်လလောၚ်တြး UEC ပတိတ်လဝ်ဂှ်မ္ဂး ရဲဒဴပၞာန်တံကီု သီုကဵုညးမစိုပ်မံၚ် ဌာန်ဒၞာဲမ္ၚးတံ သွက်ဒၞာဲဆန္ဒမာဲ စၠတ်ထဝ်နာနာတံ ညံၚ်ဂွံစုတ်ကဵုမာဲဒစးဒုၚ်မာန် စဳဇန်ကဵုလဝ် မဒှ်ရ။
နကဵု ရဲဒဴပၞာန်တံ မိက်ဂွံစုတ်မာဲဒစးဒုၚ်မ္ဂး သွက်ဂွံဗပေၚ်စုတ် ဗီုပြၚ် (၁၅) ဂှ် လ္တူမုက်လိက်ဝက်ဒ်သိုက် UEC ဟွံသေၚ်မ္ဂး ဒၞာဲဒေသ ဇကုတံ စိုပ်မံၚ်တံ အာတ်ကေတ်နူကဵု ဂကောံရုၚ်ပါ် ကဝ်မယှေန် ပေါဲရုဲမာဲပွိုၚ်ဍုၚ်တံတုဲ ဂိတုအံက်တဝ်ပါ ၁၂ စွံလက်ကရဴအိုတ် ဒးကလေၚ်ပလံၚ်ဗစိုပ်ကဵုရောၚ် သ္ဂးရ။
ဗီုပြၚ် (၁၅) စိုပ်ကၠုၚ်လဝ် ဂကောံရုၚ်ပါ်ကဝ်မယှေန်ပေါဲရုဲမာဲ ပွိုၚ်ဍုၚ်တံဂှ်ပၠန် သီုကဵုစၟတ်သမ္တီ စရၚ်မာဲပွိုၚ်ဍုၚ် ဗီုပြၚ် (၁၅-ဂ) တံဂှ် ဇရေၚ် ရုၚ်ပါ်ကဝ်မယှေန်ပေါဲရုဲမာဲပွိုၚ်ဍုၚ် မဆေၚ်စပ်ဂှ် ပ္ဍဲအံက်တဝ်ပါ ၂၉ ညံၚ်ဂွံစိုပ် ဒးပလံၚ်ဗစိုပ်ရောၚ် ချူလဝ်နွံရ။
တုဲပၠန် နူကဵု ရုၚ်ပါ်ကဝ်မယှေန်ပေါဲရုဲမာဲပွိုၚ်ဍုၚ် မဆေၚ်စပ်ပၠန် တၞးမာဲ ဒစးဒုၚ်ကဵု ထိုၚ်လိက်တံဂှ် သီုကဵုစရၚ်မၞိဟ် ညးမစိုပ်မံၚ် ဌာန်ဒၞာဲမ္ၚး တၞးလိက်ဗီုပြၚ် (၁၅) ဂှ် ပ္ဍဲအံက်တဝ်ပါ ၂၄ ဒးပလံၚ်ဗစိုပ် လဝ် ဇရေၚ် ရုၚ်ပါ် ကဝ်မယှေန်ပေါဲရုဲမာဲပွိုၚ်ဍုၚ် မဆေၚ်စပ်တံဂှ် ရောၚ်။
ဒၞာဲရဲဒဴပၞာန်တံစိုပ်မံၚ်ဂှ် ပ္ဍဲအကြာ ဂိတုနဝ်ဝမ်ပါ ၂၅ ကဵု ၂၉ တ္ၚဲဂပ်ဝ်ဒးရးမွဲမွဲ ညံၚ်ဂွံကဵုမာဲဒစးဒုၚ်မာန် နကဵုရုၚ်ပါ် ကဝ်မယှေန်ပေါဲရုဲမာဲပွိုၚ်ဍုၚ် မဆေၚ်စပ်တံ ဒးဖန်ဖက် ရေၚ်တၠုၚ်ကဵုရောၚ် အပ္ဍဲတၚ်လလောၚ်ဏံ ကဵုလဝ်စၞောန်နွံရ။
ပ္ဍဲကဵုဒၞာဲဒေသ ကဵုမံၚ်အရီုဗၚ်ကဵု ရဲဒဴပၞာန်ဗွဲမဂၠိုၚ်တံဂှ် နကဵု ကဝ်မယှေန်ပၞာန်တံ ဍဟွံစိုပ်ဒှ်မံၚ်တုဲ စပ်ကဵုပရေၚ်ကံက်စရၚ် ပေါဲရုဲမာဲဟၟဲပုဟ်ဂှ် ညးကဵုမံၚ်ပရေၚ်ရီုဗၚ် ဗ္စာရဏာမၞိဟ် ပ္ဍဲသ္ကုတ်ဒေသ သၠုၚ်ကျာမွဲတၠဟီုရ။
“ဒၞာဲပိုဲအာကဵုလဝ် ပရေၚ်အရီုဗၚ် ရဲဒဴပၞာန်ဗွဲမဂၠိုၚ်တံဂှ်တှ်ေ ဒှ်မံၚ်ဒေသ ကဝ်မယှေန်ပၞာန်တံ ဍဟွံစိုပ်ဟွံမာန်သၟး။ ဟိုတ်ဂှ်ရ ကဝ်မယှေန်ပၞာန်တံဂှ် စပ်ကဵုပေါဲရုဲမာဲ ပရေၚ်ကံက်စရၚ်ဟၟဲပုဟ်” သာ်ဝွံ သ္ဂးရ။
ဆဂး ရဲဒဴပၞာန်စိုပ်မံၚ်လ္တူဍုၚ် ဒၞာဲယန္တရာပရေၚ်အုပ်ဓုပ် ကဝ်မယှေန်ပၞာန် ထိၚ်ချုက်လဝ်မာန်တံဂှ် ညံၚ်ဂွံစုတ်ကဵု မာဲဒစးဒုၚ်မာန် ဗက်ကံက်စရၚ်နွံမံၚ်ရောၚ် ပရိုၚ်လ္ၚဵုတိတ်မံၚ်ကီုရ။
ရဲဒဴပၞာန်စိုပ်မံၚ် ပ္ဍဲပွိုၚ်ဍုၚ်ပါမံၚ် ပ္ဍဲစရၚ်မာဲတံဝွံ အတိုၚ်ဗီုပြၚ် (၁၅) မိက်ဂွံကဵုမာဲမ္ဂး နူကဵုဒၞာဲဒေသဆန္ဒမာဲ မစိုပ်မံၚ်လၟုဟ်ဏံဂှ် စရၚ်ကဵုမာဲ ညံၚ်ဂွံပါလုပ်အာ နကဵုနဲကဲဥပဒေ ပေါဲရုဲမာဲစၠတ်ထဝ် ၁၀ အတိုၚ် ခုတ်စၟတ်လဝ်တံ ဒးဂမြၚ်ဗတီအာ မဒှ်ရ။
ကၠာဟွံဂွံစိုပ် တ္ၚဲကၠောန်ဗ္ဒျ်ပေါဲရုဲမာဲ ညံၚ်ဟွံလဇုဲနူကဵု ပွိုၚ် ၆၀ တ္ၚဲ အံက်တဝ်ပါ ၂၇ ဂှ် စွံလက်ကရဴအိုတ်တုဲ နူကဵုရုၚ်ပါ်ကဝ်မယှေန် ပေါဲရုဲမာဲအရာပ်/ ကွာန်တံမွဲအဆံၚ် ဒးဂမြၚ်ပတိုန်အာ ကုဇရေၚ် ရုၚ်ပါ်ကဝ်မယှေန် ပေါဲရုဲမာဲပွိုၚ်ဍုၚ် နကဵု ဗီုပြၚ် (၃-က) ရောၚ် အပ္ဍဲတၚ်နၚ် လလောၚ်တြးဂှ် ချူထမံက်လဝ်ရ။
စိုပ်ဒဳဇြမ်ပါ ၂၈ ပ္ဍဲကဵုပေါဲရုဲမာဲကၠောန်ဗ္ဒျ်အာ သ္ကုတ် (၁) ဏံဂှ် အလုံမွဲဍုၚ် ၁၀၂ ပွိုၚ်ဍုၚ် ရန်လဝ်နွံတုဲ ဒၞာဲတိဍာ်ဒေသ ကျလဝ်ပၞာန် ဒးလးလဝ်တဲ ၅၆ ပွိုၚ်ဍုၚ်တံဂှ် အကာဲအရာ သွက်ဂွံကၠောန်ဗ္ဒျ်အာ ပေါဲရုဲမာဲဟၟဲပုဟ် ကဝ်မယှေန်ပၞာန် ဒုၚ်လဝ်ဝန်နွံရ။
မွဲလပါ်ပၠန် ပေါဲရုဲမာဲ ညံၚ်သ္ဂောံဂွံ မာဲဒစးဒုၚ် ကောန်ဍုၚ်ဗမာ လ္တူညး မအာစိုပ်မံၚ် ဍုၚ်မ္ၚးတံမာန်ဂှ် ပ္ဍဲတၞးလိက် ဗီုပြၚ် (၁၅) တၚ်နၚ် ပူဂဵုဆေၚ်စပ်တံ ထပေၚ်စုတ်တုဲ ဒးပလံၚ်ဗစိုပ်လဝ် ပ္ဍဲအံက်တဝ်ပါ ၂၉ ရောၚ် ထပ်ထပဵုကဵုလဝ်တ္ၚဲနွံရ။
ပရိုၚ်-သြၚ်လောန်တိုၚ်မ်
Photo – MOI