လှာဒကှ်၊ သိပ်တမ်ပါ ၁၈
ပ္ဍဲတွဵုရးကရေၚ် သ္ကုတ်ဂၠံၚ် ဆက်လဝ်ကဵုဍုၚ်လှာဒကှ်တံဂှ် ဒပ်ပၞာန် ထပက်ကရောၚ်ပၞာန်တုဲ ပန်ကၠဟ်ဖျေံမံၚ်လွဟ်ဇၞော် အကြာကွာန် တံဂှ်ရ ညးဒေသတံ ဒးဂြိပ်ပါဲဒဴမံၚ်ဒၞာဲဗၠးဘဲရဂှ် တမ်ရိုဟ်ကၞက်ပရိုၚ် ဒေသတံ ဟီုလဴကဵုဌာန်ပရိုၚ်သြၚ်လောန်တိုၚ်မ်ရ။
စနူကဵု ဂိတုသိပ်တမ်ပါ သတ္တဟ တတိယဏံတုဲ နူကဵု ကွာန်ၜါသွာၚ် ပွိုၚ်ဍုၚ်ကျာ်မြဟ် တွဵုရးမန်ဂှ် မွဲအဆံၚ် ကရောၚ်ပၞာန်သၟဝ်တဲ ဒပ်ကဝ်မယှန် မွဲကရောၚ်ပၞာန် ပတဝ်လဝ်ဍိုပ်ကဵု လပါ်တွဵုရးကရေၚ် ဍုၚ်လှာဒကှ်တုဲ ဟိုတ်နူပန်မံၚ်ကဵုလွဟ်ဇၞော်တံဂှ် ညးဍုၚ်ကွာန် ကွာန်သာန်ပယျာ(သံပုရာ) ကဵု ကွာန်ကရပ်ဗဒါဲဗဒါဲတံ ဒၞာဲဗၠးဘဲဒဏ်မာန် ဒးဂြိပ်ပါဲဒဴမံၚ်အိုတ်ရ။
တုဲပၠန် ကရောၚ်ပၞာန်ဒပ်ကဝ်မယှန်ပၞာန် နူဍုၚ်လှာဒကှ် မွဲကရောၚ်ပၞာန်ဂှ်လေဝ် ပတဝ်ဍိုပ်ကဵု ကွာန်သာန်ပယျာတုဲ ထပက်ကၠုၚ်မံၚ် ကရောၚ်ပၞာန်ကီု၊ လပါ်သ္ကုတ်ဂၠံၚ် လှာဒကှ်-ကြုၚ်ဒဵုဂှ်လေဝ် ကရောၚ်ပၞာန် ဘိုအ်ဂွံထပက်အာနွံမံၚ် ဂွံမိၚ်လဝ်ကီု တမ်ရိုဟ်ကၞက်ပရိုၚ်ဒေသတံဟီုတုဲ ဂွံတီလဝ်ရ။
သ္ကုတ်ဂၠံၚ် လှာဒကှ်-ကအ်ကြိက် မဆက်စၠောံလဝ် ကအ်ကြိက်-၉ တိုၚ်- လှာဒကှ်သၟဝ်ကျာ- လှာဒကှ်သၠုၚ်ကျာ-ဝင်က- ထဳဟူတာန်- သ္ကုတ်ဂၠံၚ် လှာဒကှ်ဂှ်လေဝ် အကြာမွဲၜါတ္ၚဲဏံ ကရောၚ်ပၞာန် ဒပ်ကဝ်မယှန်ပၞာန် ထပက်ကၠုၚ်မံၚ်ဂှ် စိုပ်ကၠုၚ် ဒဵုကဵု ကွာန်လှာဒကှ် သၟဝ်ကျာတုဲ လှာဒကှ်သၟဝ်ကျာ- လှာဒကှ်သၠုၚ်ကျာ-လှိုၚ်ဂွါ ကွာန်ဟွံအောန်နူကဵု ၁၀ တံ ဒၞာဲဗၠးဘဲဒဏ်မာန်ဂှ် ဒးဂြိပ်ပါဲဒဴမံၚ် ညးဒေသမွဲတၠ သ္ဂးရ။
အခိၚ်ကၠောန်ပေါဲရုဲမာဲ ဂိတုဒဳဇြမ်ပါတေံ ကၠာဟွံစိုပ်က္ဍၚ် နကဵု ဒပ်ကဝ်မယှန်ပၞာန်ဝွံ ပ္ဍဲဂၠံၚ်မဆက်စၠောံလဝ်ကဵု ဍုၚ်လှာဒကှ် သီုဖအိုတ်ဂှ် ကၠောန်အာ ပရေၚ်ပသောၚ်သ္အးတိဍာ်ရောၚ်ဒှ်တုဲ နူကဵုဍုၚ်လှာဒကှ် မွဲအဆံၚ် ဒဵုကဵုဍုၚ်ကျာ်ပိကဵု ဍုၚ်ကျိုက်ဍုၚ်တေံ ဘိုအ်ဂွံထပက်အာ ကရောၚ်ပၞာန် ပရေၚ်ပသောၚ်သ္အးတိဍာ် နွံမံၚ်ရောၚ် ပရိုၚ်တိတ်မံၚ်ရ။
ဒပ်ကဝ်မယှန်ပၞာန် ကလေၚ်ထိၚ်ချုက်ဂွံအာ သ္ကုတ်ဂၠံၚ် ဗြဝတဳ-တေန်ဂါန်ညဳနံၚ်-ကအ်ကြိက်-ကြုၚ်ဒဵု ဂၠံၚ်အာယှ တုဲ ပလေဝ်ပလေတ်စမံၚ် သွက်ဂွံ ထပက်ကရောၚ်ပၞာန် လပါ်ဍုၚ် လှာဒကှ်ဂှ်ကီု သၠုၚ်ကျာဗြဝတဳ လပါ် လေဝ်ကေကဝ် ကေုာံ လပါ်သ္ကုတ် ဂၠံၚ် ကြုၚ်ဒဵု-နဗူတံ ကီုတုဲ ပေါဲဗတိုက်ဒှ်မံၚ်ရောၚ် ညးဒေသတံ ဟီုရ။
ပရိုၚ်-သြၚ်လောန်တိုၚ်မ်
Photo – CJ