မတ်မလီု၊ သိပ်တမ်ပါ ၁၈
ဗော်ပရေၚ်ဍုၚ်ကွာန် လုပ်ပြိုၚ်မာဲ ပေါဲရုဲမာဲ ကဝ်မယှေန်ပၞာန်သီအဝဵု ကၠောန်အာဏံ ပ္ဍဲကဵုတွဵုရးမန်ဂှ် ပါဲနူကဵု ဗော်ပျဳခိုၚ်ဖျိုဝ်ကဵု ဗော်ညဳသၟတ်မန်တံတုဲ ဗော်တၞဟ်ဟ်တံ ဗက်ဂၠာဲမံၚ်အလံၚ်အမာတ် ဟွံဂွံဏီရောၚ် ညးတာလျိုၚ်ဗော်တံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
သွက်ပေါဲရုဲမာဲ ဗော်ပရေၚ်ဍုၚ်ကွာန်တံ တ္ၚဲစ ဂွံပတိုန်စရၚ်ပၠုပ်ယၟု အလံၚ်အမာတ်ညးစၞးတံဂှ် နူကဵု ကဝ်မယှေန်ပေါဲရုဲမာဲ ကဝ်မယှေန်ပၞာန် ခုတ်စၟတ်ကဵုလဝ် ဂိတုသိပ်တမ်ပါ ၈ ဂှ်ရ။
တ္ၚဲဒးပတိုန်စရၚ်ပၠုပ်ယၟု အလံၚ်အမာတ်ညးစၞး လက်ကရဴအိုတ်ဂှ် ခုတ်စၟတ်လဝ် သိပ်တမ်ပါ ၂၂ ကီုလေဝ် ဒဵုကဵု သိပ်တမ်ပါ ၁၇ ဂှ် ဗော်လ္ၚဵု ပတိုန်စရၚ်ယၟု အလံၚ်အမာတ်ညးစၞးတံ ဟွံမာန်ဏီရ။
ဂၠာဲမံၚ်အလံၚ်အမာတ် မွဲဒမြိပ်ဆက်က်ကီုလေဝ် ဟိုတ်နူ ကုတ်ပိုၚ်ခြာလဝ်ကဵု ပရေၚ်ပညာကေုာံ အယုက်အခြာတံတုဲ ဒှ်မံၚ်အခက်အခုဲရဂှ်လေဝ် ညးတာလျိုၚ် တွဵုရးဍုၚ်မန် ဗော်ကၠဗု(ရှမ်းနှင့်တိုင်းရင်းသားများ ဒီမိုကရက်တစ်ပါတီ) ဟီုရ။
“အခက်အခုဲဂှ်တှ်ေ ဆက်ဂၠာဲမံၚ်ဆက်က်ဖိုအ်ရ၊ သွက်တွဵုရးမန်ဂှ် မၞိဟ်ပိုဲ ဟွံဍိုက်ပေၚ်ဏီ၊ မုဟိုတ်သာ်လဵု ဂၠာဲဟွံဂွံရောဟီုတှ်ေ ၁၀ တန် ဒးအံၚ်ဏောၚ် ပိုၚ်ခြာလဝ်ဗီုဏံဂှ် ခက်မံၚ်။ တုဲပၠန် အယုက်အပိုၚ်အခြာလေဝ် နွံမံၚ်ဏီ၊ ကောန်ၚာ်သှ်လဝ် ၁၀ တန်အံၚ်တံ ဒှ်မံၚ်သၟတ် အယုက်ဟွံပေၚ်ဏီပုဟ်။ အယုက်ဟွံပေၚ်တှ်ေ ဟွံဂွံပုဟ် ဒးဂစာန်ဂၠာဲမံၚ်ဖိုအ်” သာ်ဝွံ သ္ဂးရ။
ဆဂး အတိုၚ်စၟတ်လဝ် လၟိဟ်ညးစၞးအလံၚ်အမာတ် ညံၚ်သ္ဂောံ ဍိုက်ပေၚ်အာမာန် ဒဵုကဵုလပါ်ပွိုၚ်ဍုၚ် စှ်ေဗက်ဂၠာဲမံၚ်ကီုတုဲ အတိုၚ်တ္ၚဲစၟတ်လဝ်တေံ ညံၚ်ဂွံထပေၚ်အာမာန်ဂှ် ဆက်ဂစာန် မံၚ်ဖိုအ်ရောၚ် ညးဆက်ဟီုရ။
သွက်သ္ဂောံ ညးစၞးအလံၚ်အမာတ်ဂှ် ဒးဆက်ရုန်ဂစာန်မံၚ်ဖိုအ်တုဲ ပ္ဍဲကဵုဂၠာဲညးစၞး အလံၚ်အမာတ်ပၠန်လေဝ် မွဲဗော်ကဵု မွဲဗော် ညံၚ်ဟွံဂွံတုပ်သၟဟ်မာန် ညံၚ်သ္ဂောံဂွံ ဆက်ဂၠာဲအာရောၚ်ဂှ် ညးတာလျိုၚ် တွဵုရးဍုၚ်မန် ဗော်ညးဍုၚ်ကွာန် (ပြည်သူ့ပါတီ) ဥူအံၚ်ကိုဝေန် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“အခက်အခုဲ အလံၚ်အမာတ်ညးစၞးဂှ် ပ္ဍဲကာလဏံ ဒးရုန်ဂစာန်အာ ဗီုဏံရ။ ပ္ဍဲကာလဏံ ပရေၚ်ဒးဂၠာဲ အလံၚ်အမာတ်ညးစၞးဟီုဂှ် အခက်အခုဲ ဗော်မွဲကဵုမွဲ ဆလတုပ်မှတုပ်။ မူဝါဒဗော်မွဲကဵုမွဲ တၞဟ်ခြာဟွံတုပ်တုဲ တန်တဴကဵု မူဝါဒဗော်ညးတံတုဲ ပ္ဍဲအရာ ဗက်ဂၠာဲ အလံၚ်အမာတ်ညးစၞးဂှ်လေဝ် တုပ်ညးသ္ကံဟွံမာန်ပုဟ် အဲခယျကေတ်ရ။ ဗီုလဵုလေဝ် ဂၠာဲအလံၚ်အမာတ်ညးစၞး ဝါတ်ဂါတ်မံၚ်ဟဍေံ အတိုၚ်ဂၠံၚ်တရဴပရေၚ်ဍုၚ်ကွာန်ဗော် ဂလာန်ပ္တေဟ် စိတ်မိက်ဂွံပြံၚ်လှာဲမွဲကဵုမွဲ နကဵုပိုဲ ညံၚ်သ္ဂောံဂွံ အလံၚ်အမာတ်ညးစၞးဂှ် ဂၠာဲအာဏောၚ်” သာ်ဝွံသ္ဂးရ။
ပြဟ်ဟ်ဏံ ပ္ဍဲဒေသဝွံ ဗော်လ္ၚဵု ညးတံညံၚ်သ္ဂောံဂွံ အလံၚ်အမာတ် ညးစၞးမာန် အတိုၚ်အစောန်စရာဲ ခုတ်စၟတ်လဝ်တံဂှ် ဗက်စန်ဒက်မံၚ် ညးဍုၚ်ကွာန်တံကီုလေဝ် မၞိဟ်ဗွဲမဂၠိုၚ်တံ ဟွံဒုၚ်တဲ မၞိဟ်ဗွဲမအောန် ဆညိညဟေၚ် ဒုၚ်လဝ်တဲနွံ ညးကြပ်ကဵု ဗော်တံ ဟီုရ။
မွဲလပါ်ပၠန် နကဵုကဝ်မယှေန် ပေါဲရုဲမာဲကၟိန်ဍုၚ် ကဝ်မယှေန်ပၞာန် သီအဝဵုဂှ်တှ်ေ အပ္ဍဲကဵုတွဵုရးမန် ၁၀ ပွိုၚ်ဍုၚ်ဂှ် နဒဒှ် ဒၞာဲဆန္ဒမာဲ ခုတ်စၟတ်လဝ်တုဲ ပေါဲရုဲမာဲ သ္ကုတ် ၁ ဝွံ ပ္ဍဲကဵုပွိုၚ်ဍုၚ် ကျာ်ထဝ်၊ သဓီု၊ မတ်မလီု၊ ၜါသွာၚ်ကဵု ကျာ်မြဟ်တံ သွက်ဂွံကၠောန်ဗ္ဒျ်အာ စဳဇန်လဝ်ရ။
ပေါဲရုဲမာဲ အပ္ဍဲကဵုတွဵုရးမန်ဂှ်တှ်ေ ဗော်စန်ဒက်အလုံကၟိန်ဍုၚ်မွဲ မပ္တံ ဗော်ပျဳခိုၚ်ဖျိုဝ်၊ ဗော်တစည၊ ဗော် “ပြည်သူ့ရှေ့ဆောင်ပါတီ၊ ပြည်သူ့ပါတီ၊ ရှမ်းနှင့်တိုင်းရင်းသားများ ဒီမိုကရက်တစ် ပါတီ (ဗော်ကၠဗု)” ဗော် “မြန်မာနိုင်ငံ တောင်သူလယ်သမား ဖွံ့ဖြိုး တိုးတက်ရေး ပါတီ” တံ ဘိုအ်ဂွံလုပ်ပြိုၚ်အာ နွံမံၚ်ရ။
တုဲပၠန် ဗော်ဖျေံသ္ဇိုၚ်အပ္ဍဲတွဵုရး ဗော်ညဳသၟဟ်မန် MUP ကဵု ဗော်ဖောအ်ဗြဳတဴတက်ဂကူပအိုဝ်တံ လုပ်ပြိုၚ်အာကီုရောၚ် အတိုၚ် ကဝ်မယှေန် ပေါဲရုဲမာဲကၟိန်ဍုၚ် လလောၚ်တြးလဝ် ဂွံတီရ။
ပရိုၚ်-သြၚ်လောန်တိုၚ်မ်
Photo – Social Media