ဗြဝတဳ၊ သိပ်တမ်ပါ ၁၉
လ္တူကဝ်မယှေန်ပၞာန် ကၠောန်အာပေါဲရုဲမာဲဂှ် ဒုၚ်တၠုၚ်ထံက်ဂလာန်တုဲ ပေါဲရုဲမာဲညံၚ်ဂွံအံၚ်ဇၞး ဆက်ပံၚ်တောဲကဵု ဒပ်ပၞာန်ရောၚ် ဒပ်ပၞာန် ကောန်ဂကူကရေၚ် ဗုဒ္ဓဘာသာတဴတက် DKBA ဗိုလ်ဗိတံ လလောၚ်တြးလဝ် ပ္ဍဲကဵု သိပ်တမ်ပါ ၁၇ ရ။
ပ္ဍဲဂိတုဒဳဇြမ်ပါဏံ ပရေၚ်ကၠောန်အာ ပေါဲရုဲမာဲတံဂှ် နူကဵုဒေသ ပရေၚ်ၜိုဟ်လလမ် “ကြာအင်းပေါ်တော်မူ” နကဵုဂအုပ်နာယက အစာတၠ ဘဒ္ဒန္တ နန္ဒသာရ သ္ကိုပ်သ္က ဒက်ပတန်လဝ် သ္ကိုပ်က္ဍိုက်ပ်ပၞာန် သ္ကိုပ်ပၞာန်ဇၞော် ဗိုလ်ဗိ နူကဵုဒေသတၟေၚ် ပရေၚ်ၜိုဟ်လလမ် “ကြာအင်းပေါ်တော်မူ”ဂှ် ဒုၚ်တၠုၚ် ထံက်ဂလာန်အာရောၚ် လလောၚ်တြးလဝ်ရ။
အပ္ဍဲကဵုပရေၚ်ပဋိပက္ခအပ္ဍဲဍုၚ်ဏံ ဇၟာပ်ဂကောံထမံက်မံၚ်ရုပ်ရဴ ပေါဲဗတိုက်ရပ်လွဟ်တံဂှ် ဒေါအ်ထောံတုဲ နကဵုပွမဆဵုဂဗ တက်ကျာကု ကဝ်မယှေန်ပၞာန်ဂှ် သွက်အလုံဍုၚ်မွဲ ဂွံၜိုဟ်လလမ် အာကီု နူကဵုပေါဲရုဲမာဲ ဒဳမဝ်ကရေသဳဗော်ဇဳ သၠးပွးဓရ်ယာဏံ အလဵုအသဳဒဳမဝ်ကရေသဳ ညးဍုၚ်ကွာန်ရုဲစှ်ပတိုန် မံက်ကၠုၚ်တုဲ ကောန်ဍုၚ်အရၚ်သီုဖအိုတ် ဂွံအခေါၚ်တုပ်သၟဟ်ဂှ် ဒက်ပတန်အာ ကၟိန်ဍုၚ်ဖိတ်ဒရေဝ် ဒဳမဝ်ကရေသဳမာန်ရောၚ် ပ္တေဟ်ကေတ်ရ သာ်ဝွံ DKBA သ္ဂးရ။
ဟိုတ်နူ ဂလာန်ပတှ် နွံကၠုၚ်သာ်ဏံတုဲ ဒုၚ်ဒဝ်ပရေၚ်အခက်အခုဲ နာနာသာ်တံမာန်ကၠုၚ်တုဲ နူလပါ် ဒပ်ကဝ်မယှေန်ပၞာန်တံ နကဵုဂကောံ ခိုၚ်ၚ်ကၠိုက်က် ဒတူလိုၚ်ကဵုလဝ်ရောၚ် DKBA လလောၚ်တြးလဝ် တၚ်ဒတူလိုၚ်ညးတံရ။
ပ္ဍဲဂိတုဒဳဇြမ်ပါဏံ ကၠောန်အာပေါဲရုဲမာဲဂှ် ဒုၚ်တၠုၚ်ထံက်ဂလာန် ပေၚ်ၚ်တုဲ အပ္ဍဲကဵုတွဵုရးကရေၚ် ပူဂဵု/ဗော်ပရေၚ်ဍုၚ်ကွာန် လုပ်ပြိုၚ်ပေါဲရုဲမာဲတံဂှ် ပရေၚ်ဓရ်ယာနွံနွံ ညံၚ်ဂွံပြိုၚ်ပကာန်အာမာန် ၜိုတ်အစောန်နွံ ရီုဗၚ်စဵုဒၞာအာကဵုရောၚ် DKBA သ္ဂးရ။
တုဲပၠန် ပေါဲရုဲမာဲညံၚ်ဂွံအံၚ်ဇၞးအာဂှ် ဆက်ပံၚ်တောဲအာကဵု ဒပ်ပၞာန်တုဲ ရေၚ်တၠုၚ်အာရောၚ် က္ဍိုပ်ဗိုလ်ဗိ သ္ကိုပ်သ္က ဒေသတၟေၚ် ပရေၚ်ၜိုဟ်လလမ် “ကြာအင်းပေါ်တော်မူ” DKBA ဂှ် လလောၚ်တြးလဝ်ရ။
က္ဍိုပ် DKBA ဗိုလ်ဗိ သ္ကိုပ်သ္ကလဝ် ဒေသတၟေၚ် ပရေၚ်ၜိုဟ်လလမ် “ကြာအင်းပေါ်တော်မူ” ဝွံ ပံၚ်တောဲလဝ်ကဵု ဒပ်ကဝ်မယှေန်ပၞာန်တုဲ ပေါဲဗတိုက်ဍုၚ်ကအ်ကြိက်၊ ပေါဲဗတိုက်ကအ်ကြိက်-ကြုၚ်ဒဵု ကဵု ပ္ဍဲပေါဲဗတိုက် ဂၠံၚ်ဇၞော်အာယှတံ ပါလုပ်မံၚ် နကဵုဂကောံရပ်လွဟ်မွဲရ။
ညံၚ်ရဴ ဗိုလ်ဗိ သ္ကိုပ်သ္ကလဝ် ဒပ်ဒေသတၟေၚ် ပရေၚ်ၜိုဟ်လလမ် “ကြာအင်းပေါ်တော်မူ” DKBA ဏံကီု ဒပ်မၚ်ပယျဵုကရေၚ် BGF ကီု၊ ဒပ်ပၞာန်ကရၚ် ပတုဲဖဵုဒဳမဝ်ကရေသဳ DKBA ကီု ထံက်ဂလာန် ပေါဲရုဲမာဲ ကဝ်မယှေန်ပၞာန်တုဲ ဘိုင်ရီုဗၚ်စဵုဒၞာကဵုရောၚ်ဂှ် ပတိတ်လဝ် လိက်လလောၚ်တြးနွံရ။
ဌာန်ပရိုၚ်-သြၚ်လောန်တိုၚ်မ်
Photo – CJ