ထဝါဲ၊ သိပ်တမ်ပါ ၁၉
သွက်လၟေၚ်တရဴ က္ဍိုပ်သ္ကိုပ်ပၞာန် ဂအုပ်သ္ကိုပ်ပၞာန်ဇၞော် မေန်အံၚ်လှိုၚ် စိုပ်မံၚ် ဍုၚ်ထဝါဲ ရးတနၚ်သဳဂှ် စကာဇြဟတ်ပရေၚ်ဂီုကၠီု လၟိဟ် နကဵုလ္ၚီ နွံရောၚ် ညးဒေသတံ ဟီုကဵုသြၚ်လောန်တိုၚ်မ်ရ။
ပ္ဍဲကဵုဂိတုသိပ်တမ်ပါ ၁၈ အခိၚ်နူဂယး က္ဍိုပ်သ္ကိုပ်ပၞာန် စိုပ်ကၠုၚ် ဍုၚ်ထဝါဲတုဲ သွက်လၟေၚ်တရဴဏံ စကာလဝ် ဇြဟတ် ပရေၚ်ဂီုကၠီု လၟိဟ်ဗွဲမဂၠိုၚ်ရ။
ပ္ဍဲကဵု လၟေၚ်တရဴ က္ဍိုပ်သ္ကိုပ်ပၞာန် စိုပ်မံၚ်ဍုၚ်ထဝါဲဏံ ဒပ်ကဝ်မယှေန်ပၞာန်၊ ဒပ်ဗၠာဲသၟိၚ်ကဵု ဇြဟတ်ဒပ်မၚ်ကွာန် ဗွဲမဂၠိုၚ် ကေတ်လဝ်ဂီုကၠီု အပ္ဍဲဍုၚ် မ္ၚးဍုၚ်ကီု ဂၠံၚ်ပန်သွာၚ်ကဵု ဇျှော်ဟရော်တံ ညံၚ်ဟွံဂွံသှ်ေဇး ပ္ဍဲဇၟာပ်ပ်ဒၞာဲတံဂှ် ဖျေံလဝ် ပရေၚ်ဂီုကၠီုနွံ ညးဒေသတံ ဟီုရ။
ဒပ်ကဝ်မယှေန်ပၞာန်ကဵု ဒပ်ဗၠာဲသၟိၚ်တံဂှ် နကဵုဇြဟတ်ဗွဲမဂၠိုၚ် ဂေတ်ဂေၚ်အာကၠုၚ်မံၚ် အပ္ဍဲဍုၚ်ကီု ဒၞာဲဂၠံၚ် က္ဍိုပ်သ္ကိုပ်ပၞာန်ဂွံအာ သ္ကုတ်ဂၠံၚ်လ္ၚဵုတံဂှ် မာတ်လဝ် ယာယဳမွဲခဏလေဝ် နွံရ။
တုဲပၠန် ဂၠံၚ်ဇၞော်ကၟိန်ဍုၚ် ဍာ်ဗု-ထဝါဲ၊ လံၚ်လုၚ်-ထဝါဲ တံဂှ်လေဝ် မာတ်လဝ်တုဲ ကွဳစက်လၟိဟ်ကဵုလ္ၚီ မာတ်ဆိုအ်မံၚ် ဒှ်အာလဝ်ကီုရ။
ပ္ဍဲကဵုလၟေၚ်တရဴ က္ဍိုပ်သ္ကိုပ်ပၞာန် စိုပ်မံၚ်ဍုၚ်ထဝါဲဏံ အာပံက်ခဒမ် ၝောံခန်ဍုၚ်၊ တိုန်လဝ် ကျာ်ဒဵုထဝ် ဍုၚ်ထဝါဲ၊ အာစိုပ်လဝ် တက္ကသိုလ် ကန်ပျူတာ ထဝါဲ ကဵု ဒၞာဲဌာန်ဒပ်ပၞာန်တံကီု ဂွံတီလဝ်ရ။
ကၠာက္ဍိုပ်သ္ကိုပ်ပၞာန် ဟွံစိုပ်ဍုၚ်ထဝါဲဏီ ပ္ဍဲကဵုသိပ်တမ်ပါ ၁၇ ဂှ် ပ္ဍဲပွိုၚ်ဍုၚ်ထဝါဲ၊ လံၚ်လုၚ် ကဵု တယိတ်ချံၚ်တံဂှ် ၜၚ်ကျာဒပ်ပၞာန်တံ မွဲအခိၚ်ဓဝ် ဒစးဒုၚ် ကြဳဖျေံလဝ်ဗုမ်နွံရ။
ဌာန်ပရိုၚ်-သြၚ်လောန်တိုၚ်မ်
Photo – MOI