မတ်မလီု၊ သိပ်တမ်ပါ ၁၉
ကံၚ်သဳဖိတ်ဒရေဝ်ဍုၚ်မန် MSFC ကဵု ကံၚ်သဳဒုၚ်ချပ်ဂၞန် တွဵုရးမန် MSCC တံဝွံ သ္ပစၞးတွဵုရးမန်တုဲ လ္တူကဝ်မယှေန်ပၞာန် ကၠောန်အာ ပေါဲရုဲမာဲဏံ ပံၚ်တောဲဒစဵုဒစးအာမွဲစွံရောၚ် ကဵုလဝ်သမ္တီ ပ္ဍဲဂိတုသိပ်တမ်ပါ ၁၈ ရ။
သဘာပတိ နာဲကောရတ် သ္ကိုပ်သ္ကလဝ် ကံၚ်သဳဖိတ်ဒရေဝ်ဍုၚ်မန် MSFC ကဵု ဥက္ကဌ ဒံက်တာခေန်သံၚ် က္ဍိုက်လဝ်က္ဍိုပ် ကံၚ်သဳဒုၚ်ချပ်ဂၞန် တွဵုရးမန် MSCC တံ ပ္ဍဲဂိတုသိပ်တမ်ပါ ၁၆ ဂှ် ကၠောန်သ္ပလဝ် ကောံဓရီုအန်လာၚ် ပထမအလန်တုဲ ဂကောံၜါလပါ် ပံၚ်တောဲလလောၚ်တြးလဝ် မဒှ်ရ။
အပ္ဍဲကဵု ပရေၚ်ကောံဓရီုလဝ်ဏံဝွံ လ္တူလၟေၚ်ဒဒှ် ပရေၚ်ဍုၚ်ကွာန် ပရေၚ်ပၞာန်တံဂှ် သ္ၚဳဂၠိပ်သဳကၠဳလဝ်ရေၚ်သ္ကံကီု ပေါဲရုဲမာဲဟၟဲကဵုဗဗွဲဓဝ် ကဝ်မယှေန်ပၞာန်ကၠောန်အာဏံ ကေုာံ လၟေၚ်ကမၠောန် ပံၚ်တောဲရေၚ်တၠုၚ် ကၠောန်အာမွဲစွံမာန်တံဂှ် သၠာဲဂတးလညာတ် သဳကၠဳလဝ် သ္ဂးရ။
တုဲပၠန် ကဝ်မယှေန်ပၞာန်ကၠောန်အာ ပေါဲရုဲမာဲဟၟဲကဵု ဗဗွဲဓဝ်ဏံဂှ် နကဵုဂကောံ သ္ပလဝ်စၞးတွဵုရးမန် ၜါလပါ်ဏံ ပံၚ်တောဲဒစဵုဒစးအာ မွဲစွံရောၚ် ပ္ဍဲကဵုလိက်လလောၚ်တြး ပံၚ်တောဲဏံ ကဵုဏာလဝ် သမ္တီနွံရ။
အပ္ဍဲပရေၚ်ဆဵုဂဗၜါလပါ်ဏံ စပ်ကဵုပေါဲရုဲမာဲအလီတုဲ နကဵု ပရေၚ်ဍုၚ်ကွာန် ညံၚ်ဂွံပံၚ်တောဲဒစဵုဒစးအာ ဂွံကၠုၚ်လဝ် တင်တုပ်စိုတ်နွံမၚ်ရောၚ် ညးပါလုပ်ဂကောံ ကံၚ်သဳဖိတ်ဒရေဝ် ဍုၚ်မန် နာဲဖုၚ်မျာတ် ဟီုရ။
ဟိုတ်ဂှ်ရ အကြာဂကောံပၠန်ဂတးတံဏံ နကဵုပရေၚ်ဍုၚ်ကွာန် ပံၚ်တောဲရေၚ်တၠုၚ်အာမာန်ဂှ်မ္ဂး သွက်ပရေၚ်ဍုၚ်ကွာန် တွဵုရး ပွမတဴတက်မွဲရောၚ် ညးဟီုဏာ လညာတ်ရ။
“ဂကောံပိုဲၜါဂကောံဏံဂှ် တၠအဝဵုပၞာန်ကီု သီတၠအဝဵုဖအိုတ် ပံၚ်တောဲဗတိုက်အာမွဲစွံကီု မွဲအခိၚ်ဓဝ် ဂါံကွာ်အာမံၚ် သွက်ဂွံဒက်ပတန် ကၟိန်ဍုၚ်ဖိတ်ဒရေဝ်ဒဳမဝ်ကရေသဳ မွဲစွံဏောၚ်။ အကြာ ဂကောံဇြဟတ်ပၠန်ဂတးၜါဏံ နကဵုပရေၚ်ဍုၚ်ကွာန်ဆဵုဂဗညးသ္ကံမာန်ဗီုဏံဂှ်တှ်ေ သွက်တွဵုရး ဒှ်ကၠုၚ်ပရေၚ်တဴတက်မွဲသာ်ဏောၚ် အဲမိက်ဂွံသ္ၚဳဂၠိပ်ရ” သာ်ဝွံ သ္ဂးရ။
ကံၚ်သဳဒုၚ်ချပ်ဂၞန်တွဵုရးမန် MSCC ဂှ် ဒက်ပတန်လဝ်ကဵု ဂကောံဇြဟတ် ညးစၞးစၠတ်ထဝ် ဂွံဇၞးလဝ်မာဲ ပေါဲရုဲမာဲ ၂၀၂၀ တံတုဲ ကံၚ်သဳဖိတ်ဒရေဝ်ဍုၚ်မန် MSFC ဂှ် ဒက်ပတန်လဝ်ကဵု ဂကူမန် နွံမံၚ်တွဵုရး ဒစဵုဒစးသၠောတ်တၠအဝဵုပၞာန်တံ ပကောံတုဲ ပံက်လဝ် မဒှ်ရ။
ဂကောံ သ္ပလဝ်စၞးတွဵုရးမန် အကြာၜါဂကောံဏံ ပ္ဍဲကၞောတ်သၞာံ ၂၀၂၂ တေံ ကေၚ်ဆဵုဂဗလဝ် ဗီုလၟုဟ်ဏံကီုလေဝ် နကဵု ပရေၚ်ပံၚ်တောဲ ပရေၚ်ဍုၚ်ကွာန်ဂှ် တၚ်တုပ်စိုတ်လေဝ်ဟၟဲကၠုၚ်တုဲ ပရေၚ်ဆဵုဂဗဂှ်လေဝ် လလောၚ်တြးလဝ်ဟၟဲကၠုၚ်ရ။
ဗွဲကြဴ စပ်ကဵုပရေၚ် ကဝ်မယှေန်ပၞာန် ကၠောန်အာပေါဲရုဲမာဲဂှ် အလန်ပထမ ကလေၚ်ဆဵုဂဗညးသ္ကံတုဲ ပ္ဍဲကဵုလၟေၚ်ကမၠောန် ပံၚ်တောဲဒစဵုဒစးအာ ပေါဲရုဲမာဲဂှ် ပံၚ်တောဲရေၚ်တၠုၚ်အာ မွဲစွံရောၚ် ဂွံကၠုၚ် တၚ်တုပ်စိုတ်ညးသ္ကံ မဒှ်ရ။
ဌာန်ပရိုၚ်-သြၚ်လောန်တိုၚ်မ်
Photo – MSFC