နေပျဳတဝ် ၊ သိပ်တမ်ပါ ၁၉
နူကဵုကံၚ်သဳပၞာန် ပြံၚ်သၠာဲလဝ်ဗီုပြၚ် ကဝ်မယှေန်ပၞာန်ဂှ် နဒဒှ် ဂကောံပကီုပရာတ်သၟးဟွံက နဒဒှ် သၞနိဂီုဍုၚ်ကဵု ညးဍုၚ်ကွာန် တံရောၚ် အလဵုအသဳညဳသၟဟ်ကောန်ဂကူ NUG၊ CRPH ၊NUG ကဵု NUCC တံ ပ္ဍဲသိပ်တမ်ပါ ၁၈ ဂှ် ပံၚ်တောဲလလောၚ်တြးဏာရ။
စပ်ကဵုကဝ်မယှေန် ပရေၚ်ဂီုကၠီုဍုၚ်ကေုာံ ပရေၚ်သာယာၜိုဟ်သြိုဟ် ဂကောံပၞာန်ဂှ်တုဲ အလဵုအသဳညဳသၟဟ်ကောန်ဂကူ NUG၊ ကမ်မတဳ သ္ပစၞးစၠတ်ထဝ်ကၟိန်ဍုၚ် CRPH ကဵု ကံၚ်သဳဒုၚ်ချပ်ဗ္စာ ပရေၚ်ညဳသၟဟ် ဂကူ NUCC တံ ပတိတ်လဝ်လိက်လလောၚ်တြး မဒှ်ရ။
နူကဵု ကံၚ်သဳစဳမာန် ပရေၚ်အုပ်ဓုပ်ဍုၚ် ကော်ခဴစလဝ် ကံၚ်သဳပၞာန်ဂှ် နဒဒှ် ကဝ်မယှန်ပၞာန် ပြံၚ်သၠာဲပံက်ဏာ ကဝ်မယှေန်ပရေၚ်ဂီုကၠီုဍုၚ် ကေုာံ ပရေၚ်သာယာၜိုဟ်သြိုဟ်ဂှ်တုဲ ဂကောံသၟဝ်တဲတံဂှ်လေဝ် ဒှ်ဂကောံပကီုပရာတ်ကီုရောၚ် သ္ဂးရ။
ဂကောံပၞာန်ဝွံ ပြဟ်ဟ်ဏံ နူကဵုပေါဲရုဲမာဲ ညံၚ်သ္ဂောံလုပ် ဗဗွဲသၞောဝ်မာန် လ္တူဂိုတ်ဂစာန်မံၚ်တံဂှ် ညံၚ်ဍုၚ်ကွာန်တံ ဟွံထံက်ဂလာန်တုဲ လုပ်ဗဗွဲသၞောဝ်ဟွံသေၚ် ထပ်လလောၚ်တြးလဝ်နွံရဂှ် ညးပါလုပ်ဂကောံ NUCC “ဒေါ်နှင်းနှင်းမွှေး” ဟီုကဵုဌာန်ပရိုၚ် သြၚ်လောန်တိုၚ်မ်ရ။
“အခိၚ်လၟုဟ် နူကဵုဂကောံပၞာန်တံဂှ် ပရေၚ်ရာဇဝတ်ဇၞော်ဇၞော်တံပဵုတုဲကၠောန်ကၠုၚ် ပွမဂစိုတ်ကဠက်ဂကူမၞိဟ်တံ ကၠောန်သ္ပမံၚ်ဂှ် ဂွံဆဵုရ။ တုဲပၠန် အဝဵုဍေံတံ ညံၚ်ဂွံလုပ်ဗဗွဲသၞောဝ် မွဲနဲမွဲဗီု ရန်တၟံတုဲ သွက်ဂွံကၠောန်အာ ပေါဲရုဲမာဲအလီဂှ် ဂိုတ်ဂစာန်မံၚ် ဂွံဆဵုရ။ ဍေံတံ ၜိုတ်လဵုဂိုတ်ဂစာန်ရေၚ်တၠုၚ်မံၚ်ဟဍေံ ဂကောံပၞာန် ညးဍုၚ်ကွာန် ဟွံထံက်ဂလာန်တံဂှ် ဒှ်မံၚ်ဂကောံပကီုပရာတ်ရ။ ဍေံတံဟွံလုပ်ဗဗွဲသၞောဝ်ဟီုဂှ် ပိုဲတံလလောၚ်တြးကဵုလဝ် ကၠးကၠး တုဲမံၚ်ရ” သာ်ဝွံ သ္ဂးရ။
æ
ပြဟ်ဟ်ဏံ သၟဝ်တဲကဝ်မယှေန်ပၞာန် နကဵုကဝ်မယှေန်ပေါဲရုဲမာဲ ကၟိန်ဍုၚ်ဝွံ သွက်ဂွံကၠောန်အာပေါဲရုဲမာဲ ပ္ဍဲကဵုကၞောတ်ဂိတုဒဳဇြမ်ပါဂှ် ပလေဝ်ပလေတ်လဝ်တုဲ စဳဇန်လဝ် သွက်ဂွံကော်ဘိက် ဂကောံမၚ်ရံၚ် နူကဵုဍုၚ်ဂၠးကဝ်ဂမၠိုၚ်ကီုရ။
ကဝ်မယှန်ပၞာန် ပြံၚ်သၠာဲပံက်ဏာ ကဝ်မယှေန် ပရေၚ်ဂီုကၠီုဍုၚ် ကေုာံ ပရေၚ်သာယာၜိုဟ်သြိုဟ်ဂှ်ကီု ဂကောံသၟဝ်တဲတံ ပရေၚ်ကမၠောန် ကၠောန်သ္ပ ရေၚ်တၠုၚ်မံၚ် အိုဿီုတံဂှ် ဟွံလုပ်ဗဗွဲသၞောဝ်ရောၚ် ပ္ဍဲကဵုလိက်လလောၚ်တြးဏံ ချူလဝ်ရ။
ဟိုတ်ဂှ်ရ အတိုၚ်သၞောဝ်ဥပဒေ ပရေၚ်ပကီုပရာတ် အလဵုအသဳညဳသၟဟ်ဂကူ NUG ဂှ် သွက်ဂွံကေတ်အာအရေဝ် ကၠောန်သ္ပအာရောၚ် ပ္ဍဲကဵုလိက်လလောၚ်တြး ပံၚ်တောဲဏံ ကဵုလဝ်သမ္တီရ။
နကဵုသၞောဝ် အပ္ဍဲဍုၚ်သၟးဟွံက ပ္ဍဲကဵု ပရေၚ်စဳရေၚ်အမှု ဍုၚ်ဂၠးကဝ်တံကီု စပ်ကဵုပရေၚ်အမှုအရာ ဂကောံပၞာန်တံ လောန်ၜက်လဝ်ဂှ် ကေတ်လဝ်စၟတ်သမ္တီတုဲ ညံၚ်ဂွံစောဲအာအမှု ဖန်ဖက်မံၚ်ရောၚ် ညးအခေါၚ်ဟီုဂး NUG ဥူနေဘုၚ်လာတ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“နကဵုဥပဒေအပ္ဍဲဍုၚ် ကိစ္စမ္ဒးရေၚ်တၠုၚ်အာ အတိုၚ်အမှုအရာ စဳရေၚ်ပရေၚ်သၞောဝ်ဓရ်ရ။ နကဵုပရေၚ်စဳရေၚ်သၞောဝ်ဂၠးကဝ်မ္ဂး လ္တူလပါ်ဂကောံပၞာန် လောန်ၜက်လဝ် မပ္တံ ပရေၚ်အခေါၚ်အရာမၞိဟ်တံ အမှုရာဇဝတ်ပၞာန်တံ ပရေၚ်ဂစိုတ်လဝ်မၞိဟ်နကဵုဂအုံကလောအ်တံ စပ်ကဵုအမှုတံဏံတုဲ သ္ပလဝ်စၟတ်သမ္တီလၟိုန် ပကောံတင်နၚ် နကဵုသက်သဳချိုတ်ပၠိုတ်တုဲ ညံၚ်ဂွံပလံၚ်ဗစိုပ်ကဵု ဂကောံစဳရေၚ်သၞောဝ်ဓရ်ဂၠးကဝ်တံကီု မွဲအလန်ဓဝ် ကိစ္စညံၚ်ဂွံစောဲဏာအမှုဂှ်လေဝ် ဖန်ဖက်ရေၚ်တၠုၚ်မံၚ်ရ” သာ်ဝွံ သ္ဂးရ။
မွဲလပါ်တေံ လ္တူဂကောံပၠန်ဂတး ကောန်ဍုၚ်အရၚ်တံကီု ဂကောံဇြဟတ်ပၠန်ဂတးတံ နဒဒှ် ဂကောံပကီုပရာတ် နူကဵု ကဝ်မယှေန်ပၞာန် လလောၚ်တြးလဝ်တံဂှ်လေဝ် ဟွံလုပ်သၞောဝ် လာဲလေၚ်အာရဂှ် ပ္ဍဲကဵုလိက်ပံၚ်တောဲ လလောၚ်တြးဏံ ချူလဝ်ရ။
ဒပ်ပၞာန် သီကေတ်လဝ်အဝဵုဍုၚ်တုဲ ဗွဲကြဴဏံ အပ္ဍဲကဵုပေါဲဗတိုက် ဒစဵုဒစးသၞောတ်တၠအဝဵုပၞာန်တံ ညးပါလုပ်မံၚ် မပ္တံကဵု ဂကောံကောန်ဍုၚ်အရၚ်ပၠန်ဂတးရပ်လွဟ်တံကီု ဂကောံဇြဟတ်ပၠန်ဂတးတံဂှ် နဒဒှ် ဂကောံပကီုပရာတ်ဟေၚ် လလောၚ်တြးလဝ်ရ။
အပ္ဍဲဏံ ဒပ်ကဝ်က MNDAA၊ ဒပ်တအာၚ် TNLA၊ ဒပ်ပၞာန်အာရက္ခ AA ဂကောံမဟာမိတ်ကောဒေံပိတံကီု လ္တူဗော်သွးကောန်ဂကူ ကရေၚ်ဂှ် ပ္ဍဲကဵုသိပ်တမ်ပါမံက်ဏံ နဒဒှ် ဂကောံပကီုပရာတ်ဟေၚ် လလောၚ်တြးလဝ်ကီုရ။
တုဲပၠန် မုက်ဒပ်တမ်ကညၚ် နကဵုဂကောံအလဵုအသဳညဳသၟဟ်ဂကူ NUG ကဵု ကမ်မတဳညးစၞးစၠတ်ထဝ်ကၟိန်ဍုၚ် CRPH တံကီု နူကဵုလက်ထက်ကံၚ်သဳပၞာန်တေံရ နကဵု ဂကောံပကီုပရာတ် ကဝ်မယှေန်ပၞာန် လလောၚ်တြးလဝ်ရ။
ပ္ဍဲသၞာံ ၂၀၂၁ ဂိတုဖေဖဝ်ဝါရဳ ၁ ဂှ် က္ဍိုပ်သ္ကိုပ်ပၞာန် ဂအုပ်သ္ကိုပ်ပၞာန်ဇၞော် မေန်အံၚ်လှိုၚ် သ္ကိုပ်သ္ကတုဲ ဂကောံပၞာန်သီအဝဵုတံ ဟၟဲကဵုဗဗွဲဓဝ် ရပ်ကေတ်က္ဍိုပ်သ္ကိုပ်ဍုၚ် ကေုာံ ဂကောံအလဵုအသဳ ညးဍုၚ်ကွာန်တံတုဲ သီကေတ်လဝ်အဝဵုဍုၚ် ပွမပုန်လဝ်အဝဵုဍုၚ်ရောၚ် NUG ကဵု CRPH တံ သ္ဂးလဝ်ရ။
ဟိုတ်ဂှ်ရ စနူ သၞာံ ၂၀၂၁ ဂိတုမာတ်ချ် ၁ ဂှ်တုဲ လ္တူကံၚ်သဳပၞာန် ၜက်ၜေတ်လဝ် ပရေၚ်ပကီုပရာတ်တံဂှ်တုဲ CRPH လလောၚ်တြးလဝ် နဒဒှ်ဂကောံပကီုပရာတ်ရ။
ပ္ဍဲသၞာံ ၂၀၂၄ သိပ်တမ်ပါ ၅ ဂှ်လေဝ် အတိုၚ်လလောၚ်တြးလဝ် ကု ဒပ်ပၞာန်သီအဝဵု နဒဒှ်ဂကောံပကီုပရာတ်ဂှ်ကီု အရာမခုတ်စၟတ်လဝ် နကဵုသၞနိဂီုဍုၚ်ကဵု သၞညးဍုၚ်ကွာန်တံကီု ပွမပြံၚ်သၠာဲဏာ ကဝ်မယှေန်ပၞာန်ဂှ်လေဝ် နဒဒှ် ဂကောံပကီုပရာတ်တုပ်ပ်ကီု NUG ခုတ်စၟတ် လလောၚ်တြးလဝ်ကီုရ။
ဌာန်ပရိုၚ်-သြၚ်လောန်တိုၚ်မ်
Photo – MOI