လန်ဒန်၊ သိပ်တမ်ပါ ၁၉
လၟိဟ်မၞိဟ်နကဵုလ္ၚီ ကောံဒၞာဲဗလးစၠတ်ထဝ်ဍုၚ်အဂႅလိက်တုဲ နဒဒှ်လၟေၚ်တရဴနိဂီုဍုၚ် ထရ အာဝေင် ဍုၚ်အဂႅလိက် အလန်ဒုတိယဂှ် ဒစဵုဒစးထ္ၜးလဝ်ဆန္ဒရ။
ဂကောံသမဂ္ဂ ပရဟိတ ၅၀ ပြၚ် မပါလုပ်လဝ် ညးမဒှ်ကောန်ဂကောံ Stop Trump Coalition တံ စနူကဵုလဒေါဝ်ဍုၚ် လန်ဒန် ဇက်တိုန်ကၠုၚ်လဝ်ရ။
နကဵုညးထ္ၜးဆန္ဒလ္ၚဵုတံဂှ် လ္ပပါ်ခြာပရေၚ်ဂကူ၊ ဒစဵုဒစး ထရညိ၊ ကဵုမံၚ်အထံက်ပၚ် အေတ်သရေဂှ် ဒေါအ်ထောံ မပ္တံ လိက်ပၞောန်တံဂှ် ရပ်လဝ်တုဲ ဇက်တိုန်ကၠုၚ် မဒှ်ရ။
တၞဟ်န ညးထ္ၜးဆန္ဒလ္ၚဵုတံပၠန် အတိုၚ်လၟေၚ်တရဴနိဂီုဍုၚ် ထရ အာဝေင် ဍုၚ်အဂႅလိက် ၂၀၁၉ တေံပၠန် ဗီုစကာလဝ် ကောန်ရုပ်ထရ ဍောတ်တ် ထပက်လဝ်ကျာတံ ကေတ်နၚ်လဝ်ဂှ် ဂွံဆဵုရ။
အပ္ဍဲကဵုပေါဲထ္ၜးဆန္ဒဏံ မၞိဟ် ၅၀၀၀ ပြၚ် ပါလုပ်ရောၚ် ဒပ်ဗၠာဲသၟိၚ်ဍုၚ်ဇၞော် လန်ဒန် တော်ခယျလဝ်ရ။
ဖျေံလဝ်ဂီုကၠီု ဒပ်ဗၠာဲသၟိၚ် ၁၆၀၀ ပြၚ်တုဲ ကောန်ဒပ်တၞဟ်ခြာ ၅၀၀ ဂှ်လေဝ် ကော်ထပေၚ်လဝ်ဇြဟတ်ကီု ဒပ်ဗၠာဲသၟိၚ် လန်ဒန် သ္ဂးရ။
လစှ်ေသ္ကိုပ်ဒပ်ဗၠာဲသၟိၚ်လန်ဒန် လွိုက်သာ် ပူဒဳဖုဒ်ဝွံ တ္ၚဲကမၠောန် ထပ်ယှုက်မွဲတ္ၚဲ ဒးကလေၚ်ဂဗပၠန်ရေၚ် ဟီုလဝ် ပ္ဍဲသိပ်တမ်ပါ ၁၇ ဂှ်ရ။
ပေါဲထ္ၜးဆန္ဒ Unite the Kingdom ဒှ်တုဲ ဗွဲကြဴဏံ ပေါဲထ္ၜးဆန္ဒထရ မံက်တိုန်ပၠန် မဒှ်ရ။
ကော်ခဴစလဝ် Stop Trump Coalition ဂကောံပံၚ်ကောံပွမစဵုဒၞာ ထရ ဝွံ စနူကဵုညးချဳဒရာၚ် ပွမက္တိုၚ်ကၟိုဟ် စပ်ကဵုပရေၚ်ဥတုရာသဳတံဂှ် ဒဵုကဵု ဂကောံဒစဵုဒစး ပွမပါ်ခြာ ပရေၚ်ကောန်ဂကူတံကေုာံ သီုဂကောံနွံပၟိက်ကဵု ပါလက်သတိုၚ်တံ ပံၚ်ကောံပါလုပ်မံၚ်ရ။
ဂကောံအလဵုအသဳ ထရ ရှ်ေသှ်ေပရေၚ်ပါ်ခြာ ကောန်ဂကူတံဝွံ ဒှ်အလဵုအသဳပံက်ကဵုပါၚ်တြၚ် သွက်ဝါဒဖိတ်သေတ်ရောၚ် ကၠာဟွံကၠောန် ပေါဲထ္ၜးဆန္ဒဇက်တိုန်ဏံ ညးအခေါင်ဟီုဂးနွံ ဂကောံပံၚ်ကောံဏံ ဟီုဂးလဝ်ရ။
အပ္ဍဲကဵုမၞိဟ်ထ္ၜးဆန္ဒဂမၠိုၚ် ကောံဓရီု ပေါဲဟီုတွံတံဂှ် အမာတ်စၠတ်ထဝ် လေဗါ နူကဵုစၠတ်ထဝ် အဂႅလာန်တံလေဝ် ပါလုပ်ကီုရ။
အပ္ဍဲကဵု ပေါဲထ္ၜးဆန္ဒဏံ ဂကောံတၞဟ်ခြာဟွံတုပ်သၟဟ်တံ ပါလုပ်ကီုလေဝ် သီုဖအိုတ်ဂှ် က္ဍုဟ်မံၚ် ထရ မဒှ်ရ။
Ref:BBC