သရက်၊ သိပ်တမ်ပါ ၂၀
ရးဒေသဇၞော်မဂွေ ပ္ဍဲကဵုထံၚ်သရက် ဟိုတ်နူတရဴ သ္ကိုပ်စၞောန်ပ္ညုၚ်နွံမံၚ်တုဲ ကောန်ထံၚ် သၟာပရေၚ်ဍုၚ်ကွာန်မွဲတၠ အကာဲအရာယဲက္ဍၚ် က္တဵုဒှ်မံၚ်ဂှ် ဗွဲဂတာပ်အခိၚ်ဟွံဂွံအခေါၚ်လွဳယဲတုဲ ဒးချိုတ်အာလဝ်ရဂှ် ဂွံတီကေတ် နူကဵုဂကောံဇာဖိုၚ်ကောန်ထံၚ်ပရေၚ်ဍုၚ်ကွာန် အလုံဍုၚ်ဗမာ PPNM ရ။
တုဲကၠုၚ် ဂိတုသိပ်တမ်ပါ ၁၃ တေံ နူကဵုထံၚ်သရက် ကောန်ထံၚ် သၟာပရေၚ်ဍုၚ်ကွာန် “ကိုကျော်လင်းအောင်” ဝွံ နကဵုဝေဒနာ ယီုဝါတ် ဒးဒုၚ်စသိုၚ်မံၚ်ဂှ် ပ္ဍဲကဵုရုၚ်ဂဥုဲထံၚ် ကပေါတ်အံက်သဳဂျေင် ရုံရုံဂပ်ပ် ဟွံဍိုက်ပေၚ်တုဲ ညံၚ်ဂွံဆုဲပြံၚ်လွဳအာ ရုၚ်ဂဥုဲမ္ၚးဂှ် ကဵုလဝ်စၞောန်ရ။
ဟိုတ်ဂှ်တုဲ ပ္ဍဲသိပ်တမ်ပါ ၁၄ ဂှ် သွက်ဂွံဆုဲပြံၚ်လွဳအာ ရုၚ်ဂဥုဲမ္ၚးဂှ် ပတိုန်ထ္ၜး သ္ကိုပ်ပိုၚ်ထံၚ် “စိုးနောၚ်” ကီုလေဝ် ဟိုတ်နူတရဴ သ္ကိုပ်စၞောန်ပ္ညုၚ်နွံမံၚ်တုဲ အာရုၚ်ဂဥုဲမ္ၚးဂှ် ဟွံကဵုအခေါၚ်သ္ဂးရ။
မွဲလပါ်ပၠန် အကာဲအရာဲပရေၚ်ထတ်ယုက် “ကိုကျော်လင်းအောင်” ပရေအ်တိုန်အိုတ်အစောန်ဂှ်ရ ပ္ဍဲဂိတုသိပ်တမ်ပါ ၁၅ ဂှ် ဂွံအခေါၚ်ပဆုဲပြံၚ်လွဳအာ ရုၚ်ဂဥုဲမ္ၚးကီုလေဝ် ဟွံဂတာပ်အခိၚ်ဒှ်အာတုဲ ပ္ဍဲသိပ်တမ်ပါ ၁၄ ဂှ် ဒးချိုတ်အာလဝ် PPNM သ္ဂးရ။
ညးတာလျိုၚ် ထံၚ်သရက် သ္ကိုပ်ပိုၚ်ထံၚ် “စိုးနောၚ်” ဝွံ ဖန်ဗဂေတ်မံၚ် ဥပဒေထံၚ် နကဵုလပှ်တဲမွဲတၞုၚ်တုဲ နကဵုစေဝ်ပၞောန် သၞောတ်စှ်ေစှ်ေ ဍဵုဍိုက်မံၚ် လ္တူကောန်ထံၚ် သၟာပရေၚ်ဍုၚ်ကွာန်တံရောၚ် ဂွံတီရ။
ထံၚ်မၞုံမံၚ် အလုံဍုၚ်ဗမာမွဲဂှ် အပ္ဍဲသၞာံဏံ အခေါၚ်ဝဳယဲကဵု စပ်ကဵု ပွမရံၚ်စံၚ် ပရေၚ်ထုတ်ယုက်ဟွံဍိုက်ပေၚ်တုဲ ကောန်ထံၚ်သၟာပရေၚ်ဍုၚ်ကွာန် အောန်အိုတ် ၂၀ တၠ ချိုတ်အာလဝ်နွံရောၚ် ဂွံတီလဝ် နူကဵုဂကောံ PPNM ရ။
ဌာန်ပရိုၚ်-သြၚ်လောန်တိုၚ်မ်
Photo – MOI