မတ်မလီု၊ သိပ်တမ်ပါ ၂၀
ပ္ဍဲတွဵုရးမန် ဖ္ဍိုက်လဝ် ကပေါတ်ဗၞိက်သေံမ္ဂး ကွဳစက်ဇၞော်ကီု ကွဳစက်ဍောတ်တ် တံကီု နူကဵုကဝ်မယှေန်ပၞာန် မွဲအလန်ဓဝ် သီရပ်ကတ်ဏာကပေါတ် သီုဖအိုတ်တံရောၚ်ဂှ် သၟာဗၞိက်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
နူကဵုကဝ်မယှေန်ပၞာန်တံဂှ် မၚ်ရံၚ်မံၚ် ပ္ဍဲကဵုဂိက်သၞေဟ်ကၚ် ပၞော်လုပ်တိတ်ဍုၚ်တံသၟးဟွံက ယဝ်ရဆဵုညာတ်အာ ကပေါတ်ဗၞိက်သေံမ္ဂး လုပ်သၞောဝ်ကီု ဟွံလုပ်သၞောဝ်ကီုကဵုဒှ် ကရေပ်ဓရတ်တုဲ ရပ်သီကေတ်မံၚ်အိုတ်ရ။
ယဝ်ရ ဖဍိုက်နၚ်လဝ် ကပေါတ်ဗၞိက်သေံ ဟွံလုပ်သၞောဝ်မ္ဂး ကပေါတ်သၟးဟွံက သီုကဵုကွဳစက် သီကေတ်ဏာတုဲ ယဝ်ရ ဖဍိုက်နၚ်ကပေါတ်ဗၞိက်သေံ လုပ်သၞောဝ်မ္ဂး ရပ်ထိၚ်အာတ်ကေတ်သြန် ဟွံဆဟွံတန်ဂှ် ကလေၚ်ဗလးကဵုဏာလဝ် နွံရ။
ကပေါတ်နူဍုၚ်သေံဟီုတှ်ေ ဒၞာဲလဵုလေဝ်ဟွံကဵုတတ် ရပ်သီကေတ်မံၚ်အိုတ်တုဲ အပ္ဍဲကဵုဗွဝ်ဖျာနာနာ ကပေါတ်ဗၞိက်သေံတံဂှ် ပဵုတုဲပိုတ်မံၚ်အိုတ်ရ သၟာဗၞိက်မွဲတၠ ဟီုရ။
“ပြဟ်ဟ်ဏံ ပ္ဍဲကဵုဒဒန်ၜဳဗတာၚ် မုလေဝ် ဟွံကဵုတတ်အာပုဟ်၊ ပ္ဍဲဒေသတံ သှ်ေဇးနွံမံၚ်ညိညိဏီ၊ သွက်ဒေသရ၊ အရၚ်ဂွံစအာရ သှ်ေမံၚ်ပ္ဍဲမတ်မလီု၊ မုလေဝ် ရာန်ဟွံဂွံရ။ ပ္ဍဲကဵုဗွဝ်ဖျာတံ မုလေဝ်ဟၟဲရပုဟ်၊ ကပေါတ်လဝ် ဂၠာဲဟွံဂွံရ” သာ်ဝွံ သ္ဂးရ။
ဟိုတ်နူကဝ်မယှေန်ပၞာန် ဗက်ရပ်မံၚ်တုဲ ပ္ဍဲကဵုဗွဝ်ဖျာ ကပေါတ်သေံခြိုၚ်စွံလဝ် သှ်ေဇးမံၚ်တံဂှ်ရ တန်တဴကဵုဂကူကပေါတ် လၟိဟ်တံတုဲ ပတိုန်ၚုဟ်မး သွံရာန်မံၚ် နွံကီုလေဝ် ပ္ဍဲအကြာသၟာဗၞိက်တံဂှ် ကပေါတ်ပိုတ်မံၚ်အိုတ်ရ။
ကပေါတ်နူဍုၚ်သေံ ဟွံဒုၚ်လုပ်၊ ဗက်ရပ်သီကေတ်မံၚ်ဆက်က်ဂှ်တုဲ ကပေါတ်ပိုတ်အိုတ်ၚုဟ်မးက္ဍၚ်တိုန်အာဂှ်ရ သၟာကမၠောန်သ္ဇိုၚ်တံသၟးဟွံက စနူသၞာဲဒါကဝ်မယှေန်တံလေဝ် စိုပ်မံၚ်ဒဒိုက်ကီုရ သမ္ဘာပါၚ်ဖဴမွဲတၠဟီုရ။
“ကပေါတ်သေံပိုတ်အာဂှ် ပ္ဍဲပိုဲ သၟာဗၞိက်တံ ပဵုတုဲကျာတ်အာ၊ မၞိဟ်ရာန်တုဲသွံ မွဲအဆံၚ်တံ မိၚ်ဟဍၚ် ၚုဟ်ကပေါတ် တိုန်ဟဍၚ်။ သၟာကမၠောန်သ္ဇိုၚ်တံ ရဲကၠောန်မွဲတ္ၚဲစမွဲတ္ၚဲတံ ဒှ်ဒဒိုက်အိုတ်၊ သၞာဲဒါတံလေဝ် စိုပ်မံၚ်ဒဒိုက်ကီုရ” သာ်ဝွံ သ္ဂးရ။
နူကဵုကဝ်မယှေန်ပၞာန် ရပ်သီကေတ်မံၚ် ကပေါတ်ဗၞိက်သေံတံဂှ်ရ ကပေါတ်သေံသှ်ေမံၚ် ပ္ဍဲဗွဝ်ဖျာတံဂှ် တန်တဴကဵုဂကူကပေါတ်တံတုဲ အောန်အိုတ် နူ ၃၀% ဒဵုကဵု ၇၀% ၚုဟ်မးကပေါတ်တံ သၠုၚ်တိုန်မံၚ်ရောၚ် ဂွံတီရ။
မွဲလပါ်ပၠန် ကပေါတ်သေံ ကဝ်မယှေန်ပၞာန်တံရပ်ဂွံလဝ်ဂှ် သွက်တမ်ဒပ်၊ ဇွောံမဒပ်ပၞာန် စကာအာတုဲ ကၟိန်အိန်ထံၚ် ရဲဒပ်ပၞာန်တံလေဝ် ကလေၚ်သွံပတိတ်မံၚ် ဒၞာဲဆေၚ်ဖျာမ္ၚးမ္ၚးတံဂှ် ကောန်ဍုၚ်ကွာန်တံ ဂွံဆဵုညာတ်မံၚ်ရောၚ်သ္ဂးရ။
ဌာန်ပရိုၚ်-သြၚ်လောန်တိုၚ်မ်
Photo – MOI