ရေဝ်၊ သိပ်တမ်ပါ ၂၀
ပ္ဍဲကဵုဒေသမန်သၠုၚ်ကျာ ဗ္ဒိုပ်သၞေဟ်ကင် ဒပ်ပၞာန်တံဖျေံလဝ်ဂှ်ကီု ဒၞာဲကၚ်ဒမၠုက်တံဂှ် ဂကောံပၠန်ဂတးရပ်လွဟ်မန်တံကဵု မဟာမိတ်တံ ဗတိုက်ကၠုၚ်မံၚ် အဆက်က်ဒှ်မံၚ်ရ။
ပ္ဍဲဂိတုသိပ်တမ်ပါ ၁၈ ပွိုၚ်မွဲတ္ၚဲဓဝ်ဂှ် ပ္ဍဲကဵုပွိုၚ်ဍုၚ်ဇြပ်ဗု ကွာန်အနေၚ်ကဵု ကွာန်ပြဳတံ ဒပ်ပၞာန်ဗၟာ ဖျေံလဝ်ကၚ်ဒမၠုက် ဒၞာဲသၞေဟ်ကွဳပၟတ်ကဵုကရပ်ပ်ဗ္ဒာဲတံဂှ် ဂကောံမဟာမိတ်ပၠန်ဂတးတံ လုပ်စိုပ်အာဗတိုက် ကြဳဖျေံဗုၚ်နကဵုဒရုၚ်တံရ။
ကရပ်ဗ္ဒာဲ သၞေဟ်ကွဳပၟတ် ကွာန်အနေၚ်ကဵု ဒပ်ပၞာန်ဗမာ ဖျေံလဝ်ကၚ်ဒမၠုက်ဂှ် ပ္ဍဲအခိၚ်နူဂယး ၁၀ နာဍဳ ဒပ်ဂကောံမဟာမိတ်တံ နကဵုပၞာန်ဒမၠုက် လုပ်ဗတိုက် တုဲ ကောန်ပၞာန်ဗမာ ၄ တၠ ချိုတ်အာလဝ်ရောၚ် ညးဆဵုနမတ်တံ သ္ပလဝ်ဒတန် မာန်လဝ်ဂှ် လလောၚ်တြးလဝ်ရ။
အပ္ဍဲမွဲတ္ၚဲဓဝ်ရ ၜိုတ်အခိၚ်တ္ၚဲစေၚ် ၁ နာဍဳဂှ် ဒပ်ပၞာန်ဗမာ ဖျေံလဝ်ကၚ်ဒမၠုက် နွံမံၚ်ကရပ်သၞေဟ်ကွဳပၟတ် ကွာန်ပြဳဂှ်လေဝ် ကြဳဖျေံဗုၚ် ၂ မ နကဵုဒရုၚ်တုဲ လပါ်ဂကောံမဟာမိတ်ပၠန်ဂတးတံ ပရေၚ်ဒးဘဲဝပ်ဟၟဲမွဲသာ် ကလေၚ်တိတ်ကၠုၚ် ဗွဲမအံၚ်ဇၞး သ္ဂးရ။
ပရေၚ်ကြဳဖျေံဗုၚ် နကဵုဒရုၚ်ဗတိုက်လဝ်ဏံ လပါ်ဒပ်ပၞာန်ဗမာတံ အကာဲအရာ ပွမချိုတ်၊ ဒးအာဘဲဝပ်နွံၜိုတ်လဵု ဆက်တုဲလ္ၚတ်အာမံၚ်ဖိုအ်ရောၚ် ပ္ဍဲကရောံ မဟာမိတ်ပၠန်ဂတးဏံ မွဲဟာန်ကေုာံ ပါလုပ်ကၠုၚ်လဝ် ဒပ်ပၠန်ဂတးဍုၚ်မန် MSRF လလောၚ်ပတိတ်လဝ်ပရိုၚ်ရ။
မွဲလပါ်ပၠန် နူကဵုဒပ်ကဝ်မယှေန်ပၞာန်သ္ကိုပ်သ္က သွက်ဂွံကၠောန်အာပေါဲရုဲမာဲ သှ်ေမံၚ်ပွိုၚ် ၁၀၀ တ္ၚဲဓဝ်ရ အခိၚ်နွံမံၚ်ဏံ ဂကောံပၠန်ဂတးရပ်လွဟ်မန်ကဵု မဟာမိတ်ဒေသမန်သၠုၚ်ကျာတံ နကဵုပရေၚ်ပၞာန် ချဳဒရာၚ်ဗတိုက်ကၠုၚ်မံၚ်စေအ်အ် ဒှ်ကၠုၚ်ရ။
ပေါဲရုဲမာဲအလီ ဂကောံပၞာန်တံကၠောန်အာဏံဂှ် ဒစဵုဒစးအာတုဲ ပရေၚ်လဝေင်ပၞာန်တံဂှ် ဆက်ကၠောန်ထမံက်အာရုပ်ရဴရောၚ် ညးအခေါၚ်ဟီုဂးနွံ ဒပ်ပၠန်ဂတးဍုၚ်မန် MSRF မိတလဥာဏ် ဟီုကဵုဌာန်ပရိုၚ် သြၚ်လောန်တိုၚ်မ်ရ။
“နကဵုပိုဲဂှ် ပေါဲရုဲမာဲအလီ ဂကောံပၞာန်ကၠောန်အာဂှ် နကဵုပရေၚ်ဍုၚ်ကွာန်ကီု ပရေၚ်ပၞာန်ကီု ပိုဲဒစဵုဒစးအာဏောၚ်။ လ္တူဏံ နကဵု ဒပ်ပၠန်ဂတးဍုၚ်မန် MSRF ပိုဲဂှ် ဒၞာဲဒေသပိုဲချဳဒရာၚ်မံၚ်တံဏံ ဆက်ထမံက်အာ ပရေၚ်ပၞာန်တုဲ လုပ်အာပေါဲဗတိုက်ဏောၚ်” သာ်ဝွံ သ္ဂးရ။
ပ္ဍဲဂိတုဒဳဇြမ်ပါ ၂၈ ကၠောန်အာပေါဲရုဲမာဲ သ္ကုတ် ၁ ဏံ ဒေသမန်သၠုၚ်ကျာ ဟွံပါလုပ်ဏီကၠာလေဝ် အလုံတွဵုရးမန်မွဲဂှ် ခုတ်စၟတ်လဝ် နဒဒှ် ဒၞာဲတိဍာ် သွက်ဂွံကၠောန်အာပေါဲရုဲမာဲရ။
ဟိုတ်ဂှ်ရ နူကဵု ဒပ်ပၠန်ဂတးဍုၚ်မန် MSRF ဂှ် ပံၚ်တောဲကဵု ဒပ်မဟာမိတ်တံတုဲ နကဵုသၞာဲဒါ Non CDM တံ ညံၚ်ဟွံဂွံပါလုပ်ပံၚ်တောဲ ပရေၚ်ပေါဲရုဲမာဲ ကဝ်မယှေန်ပၞာန်ဂှ် ကဵုလဝ်သတိနွံတုဲ ယဝ်ရ ဟွံဒဂေတ်ဗက်မ္ဂး ကေတ်အာ အရေဝ်ရောၚ် ကဵုလဝ်သမ္တီနွံရ။
နကဵု ဒပ်ပၞာန်မန်ရာမည ဗော်ဍုၚ်မန်တၟိ AD ဂှ်လေဝ် ဒစဵုဒစးပတိုက်သရိုဟ်အာ ပေါဲရုဲမာဲအလီဏံတုဲ ပရေၚ်ရုဲမာဲကၠောန်အာ ဒၞာဲဒေသညးတံ ထိၚ်ချုက်ချဳဒရာၚ်မံၚ်တံဂှ် ဒုၚ်တဲဟွံမာန်ပုဟ် လလောၚ်ပတိတ်လဝ် သဘဴလစွံစိုတ်တံ ညးတံရ။
အတိုၚ်ပတိတ်လဝ် လိက်လလောၚ်တြးတံဂှ် ဂကောံပၠန်ဂတးရပ်လွဟ် ဂကူမန်တံကဵု ဂကောံမဟာမိတ်နွံပ္ဍဲဒေသ သီုကဵု ဒပ်ပၞာန်စဵုဒၞာညးဍုၚ်ကွာန် PDF တံ ပံၚ်တောဲတုဲ အာလုပ်ဗတိုက်မံၚ် ဗ္ဒိုပ်သၞေဟ်ကင် ဒပ်ပၞာန်တံဖျေံတံဂှ် ပေါဲဗတိုက်ဒှ်ကၠုၚ်မံၚ် အဆက်က်ရ။
ပ္ဍဲသိပ်တမ်ပါ ၁၃ ဂှ်လေဝ် ပ္ဍဲပွိုၚ်ဍုၚ်ရေဝ် ဒၞာဲဂၠံၚ်သွာၚ် ကွာန်သၞေဟ်ခြေၚ် နွံကရပ်ဂၠံၚ်ကွဳပၟတ် ဒပ်ပၞာန်ဗမာဖျေံလဝ် ကၚ်ဒမၠုက်ဂှ် ဖျေံဗုမ် ၂ မတုဲ ဗတိုက်ကၠုၚ်လဝ်ကီု ဒၞာဲဂိက်သၞေဟ်ကၚ် ကွာန်ကျာ် နွံမံၚ်ကရပ်ကွာန် တၟံကၞေၚ်ဂှ်လေဝ် ပ္ဍဲသိပ်တမ်ပါ ၇ ဂှ် လုပ်ဗတိုက်လဝ်ကီုရ။
ပရေၚ်ပေါဲဗတိုက်ဏံအိုဿီုဂှ် နူကဵုသၟဝ်တဲ ဌာပရေၚ်စဵုဒၞာ ကံၚ်သဳဖိတ်ဒရေဝ် ဍုၚ်မန် MSFC ဒပ်ပၠန်ဂတးဍုၚ်မန် MSRF ကဵု ဒပ်စဵုဒၞာညးဍုၚ်ကွာန်ရေဝ် YPDF ကီု ဒပ်ပၞာန်မန်ရာမည RMA၊ ဒပ်ကရေၚ် KNLA တမ်ဒပ် (၂၇) ဒပ်ပါ် (၁) ဗျူဟာ ၃၃ ဒပ်ပါ်ဒဝ်နတံကဵု ဒပ်တပေန်ယှိုဲထဳတံ ပံၚ်တောဲပါလုပ်လဝ် ဂွံတီရ။
ဌာန်ပရိုၚ်-သြၚ်လောန်တိုၚ်မ်
Photo – Social Media