မတ်မလီု ၊ သိပ်တမ်ပါ ၂၂
ပ္ဍဲကဵုတွဵုရးဍုၚ်မန် ဍုၚ်မတ်မလီု နူကဵုဒပ်ပၞာန်သီလဝ်အဝဵု ပွိုၚ်ကရပ် ၅ သၞာံဏံဂှ် နကဵုဗီုပြၚ်နာနာ ညးအာတ်ဟရၚ်စတံ ပဵုတုဲဂၠိုၚ်တိုန်မံၚ်ရောၚ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
အပ္ဍဲကဵု ညးအာတ်ဟရၚ်စတံဂှ် ကောန်ၚာ်အယုက်ဟွံပေၚ်ဏီတံ ဗွဲမဂၠိုၚ်ပါလုပ်တုဲ ညးအယုက်ဇၞော် ညးပၠိုၚ်ၚ်တံလေဝ် ပွမ အာတ်ဟရၚ်စ နွံကၠုၚ်မံၚ်ကီုရ။
ညးအာတ်ဟရၚ်စဗွဲမဂၠိုၚ်တံဂှ် ပ္ဍဲကဵုဒၞာဲဂၠံၚ်ပန်သွာၚ်၊ ဒၞာဲတိုၚ်ပၟတ် ပ္ညုၚ်ဂၠံၚ်၊ ပ္ဍဲဖျာ၊ ဒၞာဲမၞိဟ်အာကၠုၚ်ဂၠိုၚ် သၟးဟွံက အကြာအရာပ် အကြာကွာန်တံ လုပ်စိုပ်တုဲ အာတ်ဟရၚ်စမံၚ်ဂှ် ဂွံဆဵုကေတ်ရ။
ရဲအာတ်ဟရၚ်စတံ ပဵုတုဲဂၠိုၚ်တိုန်မံၚ် နူကၠာတေံတုဲ ရဲဟွံကေၚ်ဆဵုညာတ်မွဲလှ်ေတံကီု မၞိဟ်ဟွံထေၚ်ခယျလဝ်တံလေဝ် ဗက်အာတ်ဟရၚ်စဂှ်နွံမံၚ်ရောၚ် ညးဒေသလ္တူဍုၚ်မွဲတၠ ဟီုရ။
“ပရေၚ် အာတ်ဟရၚ်စတံ ပဵုဂၠိုၚ် ဂၠိုၚ်တိုန်ဟဍၚ်။ ရဲဟွံကေၚ်ဆဵုညာတ်လဝ်မွဲလှ်ေတံကီု မၞိဟ်ဇကု ဟွံထေၚ်ခယျလဝ်တံလေဝ် ဗက်အာတ်ဟရၚ်စမံၚ် ဗီုညးကဵုညး သ္ၚိတ်တ်လေဝ်နွံ၊ မုက်ဂွလေဝ်စွံဟွံမာန် မၞိဟ်ရုပ်သ္အးသ္အးတံလေဝ် ဗက်အာတ်ဟရၚ်စမံၚ်ဂွံဆဵု၊ လ္ၚဵုဗီုဟရၚ်စဟွံသေၚ် ဗီုပြၚ်အာတ်အရီုဗၚ်သ္ကံမွဲမွဲနဲ အာတ်စဂှ်လေဝ် ဂွံဆဵုညာတ်မံၚ်” သာ်ဝွံ သ္ဂးရ။
ပရေၚ် မၞိဟ်တံ ဒးဗက်အာတ်ဟရၚ်စ ဂၠိုၚ်တိုန်ဟီုဂှ် အခိၚ်ကာလသီအဝဵုဏံ ၚုဟ်ကပေါတ်သၠုၚ်တိုန်အာ ဟွံဆဟွံတန်ကီု၊ ရဲကမၠောန်ဟၟဲ ဂၠိုၚ်တိုန်၊ အခေါၚ်အရာကမၠောန် အောန်စှ်ေအာတုဲ ပရေၚ်စသုၚ်နာနာတံ ဝါတ်ခဲ ကြေပ်ဂြတ်တိုန်အာ ဗွဲမဂၠိုၚ် ဒှ်အာရ။
မွဲလပါ်ပၠန် နူလပါ်ကဝ်မယှေန်ပၞာန် သွက်ညးဍုၚ်ကွာန်တံဂှ် ဖန်ဗဒှ်ကဵု ကမၠောန်ဟွံမာန်ကီု ပရေၚ်ထလိုက်တမ်ရိုဟ် ဍုၚ်သအာၚ် အောန်စှ်ေအာကီု ပရေၚ်ဘဏ္ဍာဍုၚ်ကွာန်ဂှ်လေဝ် သွက်ညးဍုၚ်ကွာန် ဂွံသက်သာဂှ်ဟွံဖန်၊ သွက်ဒပ်ပၞာန်ဟေၚ် စကာ ဖန်ဖက်ကဵုဟပဵုမံၚ် ပ္ဍဲကဵုအရာပရေၚ်ပၞာန်ဖအိုတ်တုဲ ညးဍုၚ်ကွာန်တံ မွဲတ္ၚဲတုဲမွဲတ္ၚဲ ဂြုဲစှ်ေအာရဂှ် ညးတၠပရေၚ်ပိုန်ဒြပ်တံ ထံက်ထ္ၜးမံၚ်ရ။
အပ္ဍဲကဵုဍုၚ်ဗမာ အပ္ဍဲမၞိဟ် ၃ တၠမ္ဂး မၞိဟ် ၁ တၠဂှ် ဒးဆဵုဂဗမံၚ်ကဵု ပရေၚ်ဗုၚ်ဂၞဴ ဟွံဍိုက်ပေၚ်ရောၚ် စပ်ကဵု ပရေၚ်ဗျဵုတဟၚ် ပံၚ်တောဲကၠောန်အာလဝ် အစဳဇန် REACH ဍုၚ်ကိုရဳယာကဵု အစဳဇန်ပရေၚ်ဇွောံမ ဂၠးကဝ် WFP ပတိတ်လိက်ဒုၚ်စဳရေၚ် ဂိတုသိပ်တမ်ပါ ၅ ဂှ် လလောၚ်တြးလဝ်နွံရ။
တုဲပၠန် ပၞောဝ်ကဵုလၟိဟ်မၞိဟ် ဍုၚ်ဗမာ ၁၆ ဒဿမ ၇ ပြကောတိကိုတ်မ္ဂး ဒးဆဵုဂဗမံၚ်ကဵု ပရေၚ်ဗုၚ်ဂၞဴဟွံရုမ်ဂပ်တံတုဲ နူကဵုအခိၚ်ကၠာကၠာတေံ သၞာံ ၂၀၂၄ တေံရ ထပ်ပဵုဂၠိုၚ်တိုန်ပၠန်ဂှ်တှ်ေ မၞိဟ်ၜိုတ် ၃ ပြကောဋိကိုတ်တံ အပ္ဍဲပွိုၚ်မွဲသၞာံဂှ် ဟွံဂွံစလဝ်စၞဖဲဖဲ ပဵုတုဲဂၠိုၚ်တိုန်မံၚ်ရောၚ် ကဵုလဝ်သတိနွံရ။
ပရိုၚ်-သြၚ်လောန်တိုၚ်မ်
Photo – Social Media