မတ်မလီု ၊ သိပ်တမ်ပါ ၂၂
သွက်ဂွံဗတိုက်သရိုဟ် သၞောတ်တၠအဝဵုပၞာန် ပြဟ်ဟ်မာန် ဒပ်ပၞာန်ဗၠးၜးမန်(MLF) ကဵု ဗော်ဍုၚ်မန်တၟိ AD/ ဒပ်မန်ရာမညတံ ပံၚ်ကောံအာယျရောၚ် ပ္ဍဲကဵုဂိတုသိပ်တမ်ပါ ၁၉ ဂှ် ဂကောံသီုၜါလပါ်တံပံၚ်တောဲပတိတ် လိက်လလောၚ်တြးရ။
သွက်ဂွံဒက်ပတန်ဍုၚ်မန် အခေါၚ်ကံကုသဵုဇကု ဇကုဖန်ဖက် ကေတ်မာန် ရန်တၟံတုဲ ပ္ဍဲကဵုဂိတုသိပ်တမ်ပါ ၁၈ ဂှ် ပံၚ်ကောံအာ မဒှ်တုဲ ဂကောံကမ်မတဳအာက္ဍိုပ် ကေုာံ ဂကောံဒပ် ဒပ်ပၞာန်ဗၠးၜးမန်(MLF) တံဝွံ လုပ်ကေတ်တာလျိုၚ် ပ္ဍဲကမၠောန်ပရေၚ်ဍုၚ်ကွာန်ကဵု ပရေၚ်ပၞာန် ပ္ဍဲဗော်ဍုၚ်မန်တၟိ AD/ ဒပ်မန်ရာမည တံရောၚ် သ္ဂးရ။
ပရေၚ်ပံၚ်ကောံအာ ဗီုဏံဂှ်တှ်ေ ပ္ဍဲကဵု ပရေၚ်ဗတိုက်သရိုဟ်မံၚ် သၞောတ်တၠအဝဵုပၞာန်တုပ်ပ်ဂှ် ပဵုတုဲစိုပ်တရဴပြဟ်ဟ်မာန် ဒှ်အာဇြဟတ်ရောၚ် ညးအခေါၚ်ဟီုဂးနွံ ဒပ်မန်ရာမည RMA နာဲဂံၚ်သ္ကာ ဟီုရ။
တုဲပၠန် ဒပ်မန်မွဲဟေၚ် ညံၚ်ဂွံမံက်ဂတဝ်အာမာန် သွက်လဂါံဂတ မွဲဂါံ ဆက်ထမံက်မံၚ်ရုပ်ရဴ မဒှ်တုဲ ဒပ်ကောန်ဂကူမန်သီုဖအိုတ် ညံၚ်ဂွံဒှ်မွဲ သွက်ဂွံပံၚ်ဗစပ်အာမန်ဂှ်လေဝ် ဆက်တုဲဂစာန်အာရောၚ် ညး ဆက်ဟီုရ။
“ပံၚ်ကောံအာကဵု ဒပ်ဗၠးၜးမန် MLF ဂှ် သွက်ဒပ်မန်မွဲဟေၚ် ညံၚ်ဂွံမံက်ဂတဝ်အာ သီုကဵုၜါ်လပါ် ထမံက်အာလဂါံဇိုၚ်ဂတမွဲလဂါံ မိက်ဂွံဟီုရ။ တုဲပၠန် ဒပ်မန်ပိုဲသီဖအိုတ် ညံၚ်ဂွံပံၚ်ဗစပ်အာမာန်ဂှ်လေဝ် နကဵုနဲကဲစုၚ်ၚ် ပိုဲဆက်ဂစာန်အာဏောၚ် မိက်ဂွံဟီု” သာ်ဝွံ သ္ဂးရ။
နကဵု ဗော်ဍုၚ်မန်တၟိ(ဗ္တိုက်သရိုဟ်တၠအဝဵုပၞာန်)/ဒပ်မန်ရာမည (RMA) ဝွံ သွက်ဒပ်ပၞာန်မန်မွဲဒပ်ဟေၚ် ညံၚ်ဂွံမံက်ဂတဝ်အာမာန် ဆက်တုဲဂိုတ်ဂစာန်အာရောၚ် ပ္ဍဲကဵုလိက်လလောၚ်တြးဂှ် ကဵုလဝ်သမ္တီရ။
ဒပ်မန်ရာမည (RMA) ဝွံ ဗော်ဍုၚ်မန်တၟိ AD- ဒပ်ပၞာန်ဗၠးၜး ကောန်ဂကူမန် MNLA ကဵု ဒပ်ပၞာန်ဗၠးၜးဍုၚ်မန်တံ ပံၚ်ကောံတုဲ ပ္ဍဲဂိတုမေ ၄ ဂှ် ဒက်ပတန်လဝ်ရ။
ကမ်မတဳက္ဍိုက်ပ်ပရေၚ်ဍုၚ်ကွာန်၊ ပရေၚ်ပၞာန်ဂှ် ညးအာက္ဍိုပ်သီုၜါ်လပါ်တံ နကဵုယၟု ဗော်ဍုၚ်မန်တၟိ (ဗ္တိုက်သရိုဟ်တၠအဝဵုပၞာန်) NMSP-AD တုဲ ဒၞာဲတာလျိုၚ် ဥက္ကဌကဵု အဆံၚ်လ္တူတံဂှ် ဗော်ဍုၚ်မန်တၟိ AD ကေတ်လဝ်တာလျိုၚ်ရ။
ပြဟ်ဟ်ဏံ ဒပ်မန်ပိဒပ်ပါလုပ်မံၚ် အပ္ဍဲကဵု ဒပ်မန်ရာမည (RMA) ဏံဝွံ နနဲဗီုပြၚ်ညးကဵုညး ၜိုန်ရ ဝင်ဒက်ပတန်ကၠုၚ်လဝ် ဒပ်ညးတံ ဗီုပြၚ် ဟွံတုပ်သၟဟ်ကီုလေဝ် ပ္ဍဲအရာဗတိုက်သၞောတ်တၠအဝဵုပၞာန်ဂှ် တိုၚ်ပ္ကဴရန်တၟံတုပ်မွဲ ဒှ်တုဲ ပံၚ်ဗစပ်မာန်ကၠုၚ်လဝ်ရ။
ဒပ်မန်ရာမည (RMA) ဝွံ ပ္ဍဲပရေၚ်ပၞာန်ဗလးတိမ္ဂး တွဵုရးမန်ကဵု ဒၞာဲဒေသဆက်စပ် ဒဵုကဵုပွိုၚ်ဍုၚ်ကအ်ကြိက် တွဵုရးကရေၚ်ကဵု ပွိုၚ်ဍုၚ်ဍာ်ဗု ရးတနၚ်သဳတံ လုပ်မံၚ်ပေါဲဗတိုက်တုဲ နကဵုလၟိဟ် ဇြဟတ်ပၞာန်တံဂှ် ဗွဲတြးလဴကလးကဵုလဝ် ဟၟဲဏီ။
ဍုၚ်မန် နွံကဵုအခေါၚ်ပိုၚ်ပြဳ ကံကုသဵုကုဇကုမာန် ညံၚ်ဂွံမံက်ဂတဝ်အာကေုာံ သၞောတ်တၠအဝဵုပၞာန်ဗွဲမပြဟ် ညံၚ်ဂွံ ပြဟ်ဖတုံ အိုတ်ကၠက်အာမာန်ဂှ် မွဲကရောံကု ညးဍုၚ်ကွာန်မန်တံကီု သီုကဵုဂကောံမဟာမိတ် ကောန်ဍုၚ်အရၚ်တံ ကဵု ဒပ်ပၞာန်စဵုဒၞာ ညးဍုၚ်ကွာန်တံ ပံၚ်တောဲမွဲစွံ လုပ်အာပေါဲဗတိုက်ရောၚ် လလောၚ်တြးကဵုလဝ် သမ္တီနွံရ။
ပရိုၚ်-သြၚ်လောန်တိုၚ်မ်
Photo – RMA