လေဝ်ကေကဝ်၊ သိပ်တမ်ပါ ၂၃
ပ္ဍဲကဵုတွဵုရးကရေၚ် လပါ်သၠုၚ်ကျာ ဍုၚ်ဗြဝတဳ သွက်ဂွံ ကလေၚ်သီကေတ် ဍုၚ်လေဝ်ကေကဝ်မာန်ဂှ် ဒပ်ကဝ်မယှေန်ပၞာန် စကာဇြဟတ်လၟိဟ်ကၠမ် ဍိုက်ဗတိုက်မံၚ်တုဲ ပန်မံၚ်လွဟ်ဇၞော် ဆက်က်ရဂှ် တမ်ရိုဟ်ကၞက်ပရိုၚ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ဍုၚ်လေဝ်ကေကဝ် KUN သီဂွံလဝ်ဂှ် ဒပ်ကဝ်မယှေန်ပၞာန် သွက်ဂွံကလေၚ်သီကေတ်မာန်ဂှ် နူတမ်ဒပ် ၂၇၅ ဖျေံလဝ်သ္ဇိၚ် ဍုၚ်ဗြဝတဳ မွဲအဆံၚ် ပလံၚ်ဗစိုပ်ကဵုမံၚ်ဇြဟတ်ဒပ်ပၞာန် လပါ်ဒေသ မေတ္တာလေင်မျာၚ်တုဲ သီုကဵုပၞာန်ကျာ၊ လွဟ်ဇၞော်ကဵု ဒရုၚ်တံ ပန်ဖျေံမံၚ် ဍုၚ်လေဝ်ကေကဝ်ကဵု ဒၞာဲဒေသပွဳပွူတံ မဒှ်ရ။
ပ္ဍဲကဵုဂိတုသိပ်တမ်ပါ ၂၁ ဂှ် ကရောၚ်ပၞာန် ဒပ်ကဝ်မယှေန်ပၞာန် မွဲကရောၚ် နူကဵုမေတ္တာလေင်မျာၚ် မွဲအဆံၚ် စိုပ်ကၠုၚ်ကရပ် ဍုၚ်လေဝ်ကေကဝ်ရ။
ပ္ဍဲကဵုသိပ်တမ်ပါ ၂၂ ဂှ်ပၠန် နူတမ်ဒပ် ၂၇၅ ဖျေံလဝ်သ္ဇိုၚ်ဍုၚ်ဗြဝတဳဂှ် ပန်ပလံၚ်မံၚ်လွဟ်ဇၞော်ကဵု ဍုၚ်လေဝ်ကေကဝ် ဟွံပိုတ်ဆက်က်ဂှ်ကီု လပါ်ဗလးတိပၠန် ကရောၚ်ပၞာန် ထပက်တိုန်ကၠုၚ်မံၚ်ရဂှ် တမ်ရိုဟ်ကၞက်ပရိုၚ် ညးဒေသတံ သ္ဂးရ။
ပ္ဍဲကရောၚ်ပၞာန် ထပက်တိုန်ကၠုၚ်မံၚ် မွဲကရောၚ်မ္ဂး နူကဵု ၝောံဒပ် ၂၂ ကဵုၝောံဒပ် ၅၅ တံ မွဲကရောၚ်ပၞာန် ဇြဟတ်ဟွံအောန်နူ ၅၀၀ ထပက်ကၠုၚ်မံၚ် ပ္ဍဲကဵုသိပ်တမ်ပါ ၂၂ စိုပ်ကၠုၚ် အကြာ မေတ္တာလေင်မျာၚ်ကဵု ဍုၚ်လေဝ်ကေကဝ်တံတုဲ ၜၚ်ကျာ ဒပ်ကဝ်မယှေန်ပၞာန်တံလေဝ် ဂေတ်ပဝ်ယာန်မံၚ်ရဂှ် ဂွံလဝ်ပရိုၚ် နူ တမ်ရိုဟ်ကၞက်ပရိုၚ် ညးဒေသတံရ။
ဟိုတ်နူ ပရေၚ်ထပက်ပၞာန် ဒပ်ကဝ်မယှေန်ပၞာန်ဂှ်ရ ဍုၚ်လေဝ်ကေကဝ် သၟးဟွံက ညးဒေသ ကွာန်မေဝ်ဝါခဳ၊ ဖလူ၊ ဖဟဳကလဝ်တံကီု ဒးဂြိပ်ပါဲမံၚ်ပၞာန်အိုတ်တုဲ သွက်ရဲဒဴပၞာန် ဂွံမံၚ်တန်တဴအာဂှ်နွံမံၚ်ပၟိက်ကဵု ကၟဳယာတ်စဵုဒၞာ၊ ဇွောံ၊ ဍာ်သုၚ်ကဵု ဂဥုဲဇဗတံရဂှ် ညးကဵုအရီုဗၚ်တံ ဟီုရ။
ဍုၚ်လေဝ်ကေကဝ်ဝွံ ပ္ဍဲကဵုသၞာံ ၂၀၂၄ ဂိတုအံက်တဝ်ပါဂှ် ကရောၚ်ပၞာန် KNLA PDF တံ သီဂွံလဝ်တုဲ လအ်အကြာပွိုၚ်မွဲသၞာံဏံ ဒပ်ကဝ်မယှေန်ပၞာန် သွက်ဂွံကလေၚ်သီကေတ်ဍုၚ်ဏံပၠန်တုဲ လၟုဟ်ထပက်ကၠုၚ်ပၞာန် ဗီုဏံရ။
ဗ္ဒိုပ်ဗျူဟာပၞာန်ဗမာ တေန်ဂါန်ညဳနံၚ် ပွိုၚ်ဍုၚ်ဗြဝတဳဂှ် ပ္ဍဲဂိတုသိပ်တဝ်ပါ ၆ တုဲကၠုၚ်ဏံ ဒပ်ကဝ်မယှေန်ပၞာန် ကလေၚ်သီဂွံတုဲ ဗွဲကြဴ ကရောၚ်ပၞာန်ဆက်ထပက်အာ ထပ်သီဂွံဏာ ဗဒိုပ်ဒဵုလက်ဟိုတ် ကရပ် ဍုၚ်ဗြဝတဳရ။
တုဲပၠန် ဍုၚ်လေဝ်ကေကဝ်ဂှ် ယဝ်ရ ဒပ်ကဝ်မယှေန်ပၞာန် ကလေၚ်သီအာမ္ဂး နူကဵု လေဝ်ကေကဝ်-ဗြဝတဳ မွဲအဆံၚ် သွက်ဂွံ ကလေၚ်သီကေတ်အာ မွဲဒမြိပ်ဂၠံၚ် ဗ္ဒိုပ် ဗြဝတဳ-ဝဝ်လေဝ် မာန်ပၠန်ဂှ် ဆက်ထပက်အာ ကရောၚ်ပၞာန်ဒှ်မာန်ရောၚ် တမ်ရိုဟ်ကၞက်ပရိုၚ် ညးဒေသတံသ္ၚဳဂၠိပ်မံၚ်ရ။
ဗီုဒပ်ကဝ်မယှေန်ပၞာန် ထပက်မံၚ်ပၞာန် ဍုၚ်လေဝ်ကေကဝ်ဂှ်ကီု အပ္ဍဲ ခရိုၚ်ဒူပလာယာ KNU မဟာဒပ် ၆ သ္ကုတ်ဂၠံၚ် ကျာ်မြဟ်-လှာကှ်ကဵု ကအ်ကြိက်-လှာဒကှ်တံကီု ဟိုတ်နူထပက်မံၚ်ပၞာန်ဂှ်ရ အကြာ ဂကောံဇြဟတ်ပၠန်ဂတး KNLA တံ ပေါဲဗတိုက် ဆက်ဒှ်မံၚ်ဖိုအ်ရ။
ပရိုၚ်-သြၚ်လောန်တိုၚ်မ်
Photo – Social Media