ၜံၚ်ကံက်၊ သိပ်တမ်ပါ ၂၂
နကဵု ဍုၚ်ဇိုၚ်ဝုတ်ဒိုဟ် ခမေန်ဂှ် ဖန်ဗ္ဒျ်ကဵုကၠုၚ်အန္တရာဲဍုၚ်ဟွံမာန်ရ ဒဵုကဵုအခိၚ်ထေၚ်ခယျမာန်တေံ အခိၚ်ပိုၚ်ခြာဟၟဲ ညံၚ်ဂွံမာတ်လဝ် ဒေသပယျဵုအကြာၜါဍုၚ်ဏံ နကဵုသ္ကိုပ်ဒပ်သေံတံ ဗွဲမညဳသၟဟ်ဖျေံသ္ဂုတ်သွာတ်တုဲ သွက်ဂွံစဵုဒၞာအာ ကၟာၚ်ဍုၚ် ပ္ဍဲဒေသပယျဵုတံဂှ်လေဝ် ပတိုန်ပၠုပ်လဝ်ဂလာန်ရ။
ပ္ဍဲကဵုဒၞာဲ ဌာန်ဂအုပ်ရာဇဌာနဳဒပ်ပၞာန် ဍုၚ်ၜံၚ်ကံက် ကၠောန်ဗ္ဒျ်လဝ် ကောံဓရီုသ္ကိုပ်ဇၞော် ဒပ်ပၞာန်သေံ အလန်ပဥ္စမဂှ် ဖျေံလဝ်သ္ဂုတ်သွာတ် အတိုၚ်ဏံရ။
ဒၞာဲဂိက်သၞေဟ်ကၚ် သေံ-ခမေန် အကြာဒေသပယျဵုဍုၚ်ၜါဏံ သီုဖအိုတ်တံ အခိၚ်ပိုၚ်ခြာဟၟဲ ညံၚ်ဂွံမာတ်စွံလဝ် ညးတာလျိုၚ်ပၞာန်သေံတံ ဗွဲမညဳသၟဟ် ဖျေံဏာသ္ဂုတ်သွာတ်ရ။
ပ္ဍဲကာလပေါဲဗတိုက် က္တဵုဒှ်လဝ် ဒၞာဲဒေသပယျဵုတံဂှ် ကောန်ပၞာန်ကဵု ကောန်ကွာန်သေံ ၁၅ တၠ ချိုတ်အာလဝ်တုဲ စကာသုၚ်စောဲလဝ် ၜၚ်ကျာပၞာန်ကဵု ကွဳစက်ခြပ်ပၞာန်တံရ။
ပ္ဍဲကဵုကရပ်ဒၞာဲ သၞေဟ်ကၚ်ဂိက်အဓိက ခမေန်တံပၠန် အကြာဏံ ညးတာလျိုၚ်သေံတံဂှ် ဗဂပ်စုတ်ထောံ ကေန်မရာဂီုကၠီု အလန်ပထမရ။
ပ္ဍဲကဵု ဒၞာဲသၞေဟ်ကၚ်ဂိက်စၟဳစၟတ်ပယျဵု အကြာၜါဍုၚ်ဏံ သွက်ဂွံထပ်ဂ္ဇံက်စုတ်အာ ကေန်မရာဂီုကၠီု ၂၉ ပၠန်ဂှ် သေံတံ စဳဇန်လဝ်ရ။
နကဵုသေံဂှ် ညံၚ်ဂွံမာတ်စွံလဝ် ပယျဵုၜါဍုၚ်ဏံဟွံက အလုံမွဲဒမြိပ်ပၞောန်ပယျဵုတံ ညံၚ်ဂွံဒၞာစဵုအာကၟာၚ်ဍုၚ်ကီု စပ်ကဵုဥပဒေ ပွမပညဳပညပ်ဆက်စၠောံလဝ်ကဵု ဍုၚ်ခမေန်တံဂှ် ညံၚ်ဂွံကလေၚ်သ္ၚဳဂၠိပ်အာ ညးတာလျိုၚ်ပၞာန်သေံ အဆံၚ်လ္တူတံ ဗတိုက်ဖအောဝ်လဝ်ရ။
သေံတံ ဒၞာစဵုကၟာၚ်ဍုၚ် အလုံမွဲဒမြိပ်ပၞောန်ပယျဵုတံတုဲဒှ်အာမ္ဂး ဆက်ကၠောန်အာ ပရေၚ်ဂေတ်ကၚ်မၚ်ရံၚ်တံရောၚ် ညးတာလျိုၚ်တံ ဟီုရ။
လ္တူဒးဒုၚ်ဖံက်ပကဝ်လဝ် ပွမအုပ်ဓုပ်ပိုၚ်ပြဳသေံတံဂှ် ညံၚ်ဂွံကလေၚ်ပၠန်အာမာန် မူပၞောန်မွဲတၚ်ဂှ်လေဝ် နူကဵုကဝ်မတဳဏံ သ္ပဏာဒတန်ရ။
နကဵုဗီုပြၚ်သၞတၚ် အကာဲအရာဒှ်ကၠုၚ် ဟွံသေၚ်မ္ဂး ပရေၚ်ဇီုကပါ်တဝ်ဝ် အကာဲအရာနွံမ္ဂး သွက်ပရေၚ်စဵုစၞာကုဇကု အတိုၚ်ဥပဒေဂၠးကဝ်တံ ဗွဲမဂတာပ်တဲ ဖန်ဖက်ရေၚ်တၠုၚ်အာရောၚ် ညးတာလျိုၚ်ပၞာန်သေံ အဆံၚ်လ္တူတံ ဟီုရ။
တၚ်သ္ဂုတ်သွာတ်တံဂှ် သွက်ဂွံသ္ပဒတန်မာန် ပတိုန်ထ္ၜးလဝ် ကုဇရေၚ်ဌာနဝန်ဇၞော်ပရေၚ်ကာစဵုဒၞာသေံရောၚ် ဂွံတီရ။
Ref:BangkokPost