လ္တူဒူတာတေ နကဵုအမှုရာဇဝတ် တၞောဝ်ဂကူမၞိဟ် ပိတၚ် ICC ပတိုန်အမှု

ဒဳဟုက်၊ သိပ်တမ်ပါ ၂၄

လ္တူသမ္မတတြေံ ဖိလေတ်ပိုၚ် ရိုဒရဳဂို ဒူတာတေဂှ် နူကဵု ရုၚ်သၞောဝ်ဓရ် ဂၠးကဝ် ICC ဝွံ နကဵုအမှုရာဇဝတ် တၞောဝ်ဂကူမၞိဟ် ပိတၚ် ICC ပတိုန်အမှုစောဲဏာ ဂဗုတ်ရ။

ပ္ဍဲအရာစဵုဒၞာပတိုဟ်သရိုဟ်လဝ် ပရေၚ်ဂဥုဲၜူမာဲတုဲ အယုက်မၞုံ ၈၀ ဒူတာတေဝွံ လ္တူညးသွံရာန်ဂဥုဲၜူမာဲတံကီု ညးစကာသုၚ်စောဲလဝ်တံကီု ညးတၞဟ်ဟ်တံကီု ပရေၚ်ပတိုန်ရုၚ် စၟဳစၟတ်ဟၟဲမွဲသာ် စပ်ကဵု ဖျေံလဝ်အမိၚ်ဂစိုတ်ကု လၟိဟ်မၞိဟ်ဂၠိုၚ်ကဵုလ္ၚီနွံတုဲ စပ်ကဵုပရေၚ်ရာဇဝတ် တာလျိုၚ်နွံမံၚ်ရောၚ် ဒးဒုၚ်စောဲစပ်လဝ်ရ။

ညးဂမၠိုၚ် သွက်ဂွံတီအာ နူတမ်ဝါဒိ ပလေဝ်ပလေတ်ဒါန်စွံလဝ် တၚ်နင်စောဲစပ် စရၚ် ICC တံဂှ် နူကဵုဂိတုဂျူလိုၚ်တေံရ ချူလဝ်ကီုလေဝ် စိုပ်ဂိတုသိပ်တမ် ၂၂ ဂှ်မှ ဂွံလလောၚ်တြးဏာရ။

ဒပ်ဗၠာဲသၟိၚ်တံကီု ညးလ္ၚဵုလ္ၚဵုတံကီု ပါလုပ်လဝ်ကီု နူရုၚ်သၞောဝ်ဓရ် ပ္ဍဲကဵုစောစပ်လဝ်အမှုဂစိုတ်မၞိဟ်တံဂှ် နကဵုတိုက်ရိုက်ဟွံသေၚ် ဒူတာတေ ပါလုပ်လဝ်ကီုရောၚ် လစှ်သၟာဂဗုတ်အလဵုအသဳ ICC မာမဳ မာန်ဒဳယာယဳနဳအာန် ဟီုလဝ်ရ။

နကဵုဝန်သ္ကိုပ်ဍုၚ် ဒါဗံၚ်သဳတဳ အခိၚ် ဒူတာတေ ယိုက်ဂၠေၚ်တာလျိုၚ် အကြာသၞာံ ၂၀၁၃ ကဵု ၂၀၁၆ တေံ စပ်ကဵုပရေၚ်ဂစိုတ်လဝ် ၁၉ တၠဂှ် ပါလုပ်လဝ်ရောၚ် ပ္ဍဲကဵုတၚ်စောဲစပ် ပထမကိုပ်ကၠာအိုတ် ချူထမံက်လဝ်ရ။

ဗွဲကြဴတင်စောဲစပ်ၜါတၚ်ပၠန်ဂှ် ပ္ဍဲအကြာသၞာံ ၂၀၁၆ ကဵု သၞာံ ၂၀၂၂ တေံ အခိၚ်ညးတေံကေတ်လဝ်တာလျိုၚ် နဒဒှ်သမ္မတ ဍုၚ်ဖိလေတ်ပိုၚ်ဂှ် ဆက်စပ်မံၚ်ကဵု အခိၚ်စရပ်စပ်ပရေၚ်ဂဥုဲၜူမာဲတံ ပါလုပ်ရ။

တၚ်စောဲစပ်ဒုတိယဂှ် ဆက်စပ်ကဵုပရေၚ်ဂစိုတ်မၞိဟ် ၁၄ တၠ အလုံမွဲဍုၚ် စွံလဝ်ပွန်တံဂှ်တုဲ တၚ်စောဲစပ်တတိဂှ် ပ္ဍဲကဵုလဝေၚ်ပၞာန်သ္အးဇ္ၚးတိဍာ် ပ္ဍဲကဵုကွာန်မွဲ ဂစိုတ်လဝ်မၞိဟ် ၄၅ တၠ၊ ဂစာန်ဂစိုတ်လဝ်တံရ။

မၞိဟ် ၆၀၀၀ ပြၚ်ဒးဒုၚ်ချိုတ်အာလဝ် ဟိုတ်နူကဵု ပွမကြာန်ဓဇန် ကၠောန်သ္ပလဝ် လ္တူပရေၚ်ဗတိုက်သရိုဟ်ဂဥုဲၜူမာဲဏံတုဲ နကဵုဒူတာတေ သွက်ဂွံကလေၚ်ဒုၚ်ဂုဏ် ကေၚ်ဟီုဂးလဝ်ဟၟဲပုဟ်။

ပ္ဍဲအရာညးတေံကၠောန်လဝ် ပရေၚ်ဗတိုက်သရိုဟ်ဂဥုဲၜူမာဲဝွံ မၞိဟ်ဒးဒုၚ်ချိုတ်လဝ်ဍာံဍာံတံဂှ် ဂၠိုၚ်နူကဵုလၟိဟ်ဟီုပတိတ်မံၚ်တံဏီရောၚ် ညးချဳဒရာၚ်အခေါၚ်အရာမၞိဟ်တံ ပ္တေဟ်ကေတ်လဝ်ရ။

အလုံဍုၚ်မွဲ လ္တူဂၠံၚ်ဍာန် ပရေၚ်ရာဇဝတ်က္တဵုဒှ်မံၚ်တံ ညံၚ်ဂွံသောၚ်အာ ကၠောန်လဝ်ပရေၚ်ဗတိုက်သရိုဟ်ဂဥုဲၜူမာဲတံ ဒူတာတေ ဟီုဂးလဝ်ရ။

ဒူတာတေဒှ် ဒှ်ညးဒးဒုၚ်စောဲအမှု ICC က္ဍိုပ်သ္ကိုပ်တြေံ ဍုၚ်အာယှ အလန်ပထမကၠာအိုတ်တုဲ ဒးပလံၚ်ဗစိုပ်လဝ် ဍုၚ်ဒဳဟုက် ဍုၚ်နေဝ်တာလန် ရ။

လောန်ကၠုၚ် နူဂိတုမာတ်ချ်တေံ ရပ်ထိၚ်လဝ်ညးတေံတုဲ ဟိုတ်နူပရေၚ်ထတ်ယုက် ဟွံခိုဟ်ဂှ် ဆေၚ်ဂဗုတ်မာန်ဟွံသေၚ်ဏီ သၟာဂဗုတ်ညးတေံ ဟီုလဝ်ရ။

ဒူတာတေ ၜိုန်ရဒးဒုၚ်ရပ်ထိၚ်လဝ်ကီုလေဝ် ပ္ဍဲဂိတုမေတုဲကၠုၚ်ဂှ် နဒဒှ် ဝန်သ္ကိုပ်ဍုၚ် ဒါဗံၚ်သဳတဳ ဒးဒုၚ်ကလေၚ်ရုဲစှ်ပတိုန်လဝ်ပၠန်ရ။

နူကဵုသၞာံ ၂၀၂၂ တေံရ နဒဒှ်ဝန်သ္ကိုပ်ဍုၚ် ကောန်ဗၠာဲညးတေံ သဳဗာတ်သတဳယာန် ကေတ်ကၠုၚ်လဝ် တာလျိုၚ်ဂှ် စၞးအပါညးတေံပၠန် နဒဒှ် ယာယဳဝန်သ္ကိုပ်ဍုၚ် ဒါဗံၚ်သဳတဳဂှ် ပြဟ်ဟ်ဏံ ဆက်ကေတ်လဝ် တာလျိုၚ်ရ။

ICC ဂှ် နဒဒှ် ယန္တရာ ပရေၚ်ဍုၚ်ကွာန်မွဲ သမ္မတဖိလေတ်ပိုၚ်လၟုဟ် မာကိုသ် စကာသုၚ်စောဲမံၚ်ရောၚ် ညးထံက်ဂလာန် ဒူတာတေတံ စောဲစပ်လဝ်ရ။

Ref:BBC