လံၚ်လုၚ်၊ သိပ်တမ်ပါ ၂၃
ရးတနၚ်သဳ ပ္ဍဲကဵုပွိုၚ်ဍုၚ်လံၚ်လုၚ် ဒၞာဲကရပ်ဗ္ဒာဲကွာန် ယာဟံၚ်ဝဂှ် ကရောၚ်ပၞာန် ဒပ်ကဝ်မယှေန်ပၞာန် ဟိုတ်နူဒးဒုၚ်ဗတိုက်တုဲ ၄ တၠ ချိုတ်တုဲ ၃ တၠဒးဝပ်နွံမံၚ် ဂွံတီကေတ် နူကဵုဒပ်စဵုဒၞာညးဍုၚ်ကွာန် ပွိုၚ်ဍုၚ်လံၚ်လုၚ်တံရ။
နူကဵုဍုၚ်ထဝါဲ နကဵုဇြဟတ် ပွဳပွူ ၁၀၀ ကရောၚ်ပၞာန် ထပက်ကၠုၚ် ပ္ဍဲကဵုပွိုၚ်ဍုၚ်လံၚ်လုၚ် လပါ်ကွာန်ယာဟံၚ်ဝဂှ် အကြာ ဒပ်ကဝ်မယှေန်ပၞာန်ကဵု ဒပ်ပံၚ်တောဲ ဒပ်စဵုဒၞာညးဍုၚ်ကွာန်တံ ပ္ဍဲကဵု သိပ်တမ်ပါ ၁၇ အခိၚ်နူဂယးဂှ် ပေါဲဗတိုက်စုက်လုက် ဒှ်အာရ။
ပေါဲဗတိုက်ၜါလပါ် အကြာဒပ်ကဝ်မယှေန်ပၞာန်ကဵု ဒပ်ပံၚ်တောဲ ဒပ်စဵုဒၞာညးဍုၚ်ကွာန်တံဂှ် အခိၚ်လအ်အာ ၜိုတ်ကဝက်နာဍဳဒှ်အာတုဲ ကောန်ပၞာန်ဒပ်ကဝ်မယှေန်ပၞာန်ဂှ် ၄ တၠ၊ ချိုတ်အာတုဲ၊ ၃ တၠ ဒးဝပ်နွံမံၚ်ရဂှ် ညးတာလျိုၚ် ဒပ်စဵုဒၞာညးဍုၚ်ကွာန် ပွိုၚ်ဍုၚ်လံၚ်လုၚ် ဟီုကဵုဌာန်ပရိုၚ် သြၚ်လောန်တိုၚ်မ်ရ။
တုဲပၠန် ဒၞာဲပေါဲဗတိုက်ဒှ်လဝ် ကရပ်ဗ္ဒာဲကွာန် ယာဟံၚ်ဝဂှ် ကရောၚ်ပၞာန် ဒပ်ကဝ်မယှေန်ပၞာန်မွဲလေဝ် အခိၚ်ထပက်ကၠုၚ် လပါ်ဂၠံၚ်ဂြိုပ်ဂှ် နူကဵုဒပ်ပၞာန်ပၠန်ဂတးတံ ထပ်တုဲဖံက်ဗတိုက်ကဵုဏာ မါၚ်ဗအ်ဂၠဴ ပိမပၠန် သ္ဂးရ။
ပ္ဍဲကဵုပေါဲဗတိုက် ကွာန်ယာဟံၚ်ဝဂှ် ညးဗြဴအယုက်ဇၞော်ဇၞော်မွဲတၠ ဒးလွဟ်မကမ်တုဲ ချိုတ်အာလဝ်နွံရဂှ် ညးဒေသတံ ဟီုရ။
ပရေၚ်ပေါဲဗတိုက်ဏံဝွံ ဒပ်စဵုဒၞာညးဍုၚ်ကွာန် ပွိုၚ်ဍုၚ်လံၚ်လုၚ်၊ ကရောၚ်ပၞာန် ဒဝ်န- ၃ (KBDF)၊ ဒပ်ပါ်ဒဝ်န ၇ (LPF)၊ မုက်ဒပ်စဵုဒၞာ ညးဍုၚ်ကွာန် ခရိုၚ်ထဝါဲ(DDPDF)၊ ဒပ်သၞံၚ်စမ္ပါဖိတ်ဒရေဝ်တံ ပံၚ်တောဲဗတိုက်လဝ်ရ။
လောန်ကၠုၚ် ဂိတုဂျောန် ၁၂ တေံဂှ်လေဝ် ပ္ဍဲပွိုၚ်ဍုၚ်လံၚ်လုၚ်၊ ဇရေၚ်ကွာန် ကအ်ကညုၚ်ဂှ် အတိုၚ်ဗလးၜဳထဝါဲ နကဵုဂၠုၚ်စက် ဒပ်ကဝ်မယှေန်ပၞာန် ကရောၚ်ပၞာန်ထပက်တိုန်ကၠုၚ်တုဲ ဟိုတ်နူ ဒးဒုၚ်ပန်လဝ်ဂှ် ချိုတ်အာလဝ် ပိတၠရောၚ် ဂွံလဝ်ပရိုၚ်ရ။
ပရိုၚ်-သြၚ်လောန်တိုၚ်မ်
ရုပ်ဗီု – LLPDF