နေပျဳတဝ်၊ သိပ်တမ်ပါ ၂၃
ပေါဲရုဲမာဲဗော်ဇဳပြိုၚ်အာဏံ သွက်ဗော်ပရေၚ်ဍုၚ်ကွာန် မလုပ်စန်ဒက် ပြိုၚ်အာ အလုံကၟိန်ဍုၚ်တံ ညံၚ်ဟွံဂွံဒုၚ်ပလီုဂှ် စပ်ကဵုဒၞာဲလၟိဟ်ဒေသဆန္ဒမာဲကီု သီုကဵုလၟိဟ်အလံၚ်ညးစၞးတံဂှ် နူကဵု ကံၚ်သဳစဵုဒၞာကောန်ဂကူကဵု ပရေၚ်ဂီုကၠီု ယှအ်ဖျေံကဵုဏာ ပ္ဍဲသိပ်တမ်ပါ ၂၁ ဂှ်ရ။
ပ္ဍဲဇရေၚ်ဒၞာဲဆန္ဒမာဲ မဆေၚ်စပ်တံ သွက်ဂွံပတိုန်စရၚ်ယၟု အလံၚ်အမာတ်ညးစၞး စၟတ်တ္ၚဲလက်ကရဴအိုတ် သိပ်တမ်ပါ ၂၂ ကၠာဟွံစိုပ်မွဲတ္ၚဲဂှ် သွက်ဗော်ပရေၚ်ဍုၚ်ကွာန်ဇၞော်ဇၞော်တံ ဂွံဆက် တန်တဴအာမာန် ကလေၚ်ပလေဝ်ကဵုဏာ ဥပဒေ ပွမစၟတ်သမ္တီ ဗော်ပရေၚ်ဍုၚ်ကွာန်ဂမၠိုၚ်ဂှ် မဒှ်ရ။
နူကဵု ကံၚ်သဳစဵုဒၞာကောန်ဂကူကဵု ပရေၚ်ဂီုကၠီုကဝ်မယှေန်ပၞာန် နကဵုသ္ဇိုၚ်သၞောဝ်ဥပဒေ ပရေၚ်အုပ်ဓုပ်ဍုၚ် ၝောံပိုဒ် ၄၁၇ ချူခၞံလဝ်တုဲ သမ္မတယာယဳ ညးမကေတ်လဝ်တာလျိုၚ် ဂအုပ်သ္ကိုပ်ပၞာန်မေန်အံၚ်လှိုၚ် ထပက်လဝ်စၟတ်တဲရ။
နကဵုဥပဒေ သွက်ဗော်စန်ဒက်ပြိုၚ်အာ အလုံကၟိန်ဍုၚ်ဒှ်မ္ဂး ပၞောဝ်ကဵု အလုံဒၞာဲဆန္ဒမာဲသီုဖအိုတ်တုဲ ဘိုအ်ဂွံမ္ဒးပြိုၚ်အာကဝက် စၞးတၚ်နၚ် ဏံဂှ် ချူခၞံပလေဝ်ကဵုဏာ မ္ဒးပြိုၚ်အာ ပန်ဂအုံ မွဲဂအုံမာန်ရောၚ် သ္ဂးရ။
ဟိုတ်ဂှ်ရ အပ္ဍဲကဵု ပေါဲရုဲမာဲဗော်ဇဳဏံ သွက်ဗော်ပရေၚ်ဍုၚ်ကွာန် လုပ်စန်ဒက်ပြိုၚ်အာ အလုံကၟိန်ဍုၚ်တံဂှ် ပၞောဝ်ကဵု အလုံဒၞာဲဆန္ဒမာဲ သီုဖအိုတ်တုဲ ပန်ဂအုံ မွဲဂအုံပြိုၚ်အာမာန်မ္ဂး နကဵု ဗော်ပရေၚ်ဍုၚ်ကွာန် ဂွံအခေါၚ် ဆက်တန်တဴအာမာန်ရောၚ်။
ပၞောဝ်ကဵုဒၞာဲဆန္ဒမာဲ ဟွံလုပ်ဟွံဂွံတံ ယှအ်ဖျေံကဵုဏာ လၟိဟ်ဗီုဏံ ဂှ်တှ်ေ သွက်ဗော် ဒှ်မံၚ်အခက်အခုဲကဵု ဂၠာဲအလံၚ်ညးစၞးတံ ဒှ်အာလကျှ်န် အပံၚ်ရဂှ် ညးတာလျိုၚ် တွဵုရးမန် ဗော်ညးဍုၚ်ကွာန် ဥူအံၚ်ကိုဝေန်တာန် ဟီုလဴဏာ လညာတ်ညးရ။
“ခယျကေတ် ဒှ်အာလကျှ်န်မဂၞန်အပံၚ်ရ။ ဗီုလဵုဒှ်ကီုလေဝ် နကဵုဗော်ပိုဲဂှ် လၟိဟ်မၞိဟ်ပေၚ်မၚ်တုဲတုဲ ဟီုကီုလေဝ် သွက်ဗော်တၞဟ်ဟ် ဒှ်မံၚ်အခက်အခုဲနွံမံၚ်ကီုဟာ သာ်ဂှ်ဟွံသေၚ် ဟိုတ်မွဲမွဲသာ်ဂှ် ဒးနွံမာန်။ ဆဂး ဗီုလဵုဟီုဟီု နကဵုစၞးဗော်ပိုဲဟွံသေၚ် နကဵုလညာတ်အဲမွဲဟီုတှ်ေလေဝ် မိပ်မံၚ်စိုတ်ရ၊ တၠုၚ်လအာ ဒှ်အာလကျှ်န်မဂၞန်အပံၚ် အဲခယျကေတ်” သာ်ဝွံ သ္ဂးရ။
နဒဒှ်ဗော်ပရေၚ်ဍုၚ်ကွာန် လုပ်စန်ဒက်ပြိုၚ်အာ အလုံကၟိန်ဍုၚ် ဗော်ညးဍုၚ်ကွာန်ဝွံ ပ္ဍဲကဵုပွိုၚ်ဍုၚ်ဗွဲမဂၠိုၚ်တံဂှ် ပတိုန်လဝ်စရၚ် ယၟုအလံၚ်ညးစၞးအမာတ်တံ တုဲဒှ်အာရဂှ် ညးဆက်ဟီုရ။ ဆဂး လၟိဟ်ဒၞာဲဆန္ဒမာဲကဵု ညးစၞးအလံၚ်အမာတ်တံဂှ်တှ်ေ ပြဟ်ဟ်ဏံ ညးဟွံဟီုပတိတ်လဝ်ဏီ။
နကဵု ဥပဒေ ပွမစၟတ်သမ္တီ ဗော်ပရေၚ်ဍုၚ်ကွာန်ဂမၠိုၚ် ခၞံချူလဝ် ကိုပ်ကၠာတေံမ္ဂး ဗော်သွက်ဂွံစန်ဒက်ပြိုၚ်အာ အလုံကၟိန်ဍုၚ်တံဝွံ ပၞောဝ်ကဵု အလုံဒၞာဲဆန္ဒမာဲ သီုဖအိုတ်တံဂှ် မ္ဒးလုပ်ပြိုၚ်အာ ကဝက်ရောၚ်၊ ယဝ်ရ တၚ်နၚ်ဏံ ယုတ်ဒေက်အာမ္ဂး နကဵုဗော်ပရေၚ်ဍုၚ်ကွာန်ဂှ် အခေါၚ်ဆက် ဂွံတန်တဴဟၟဲရောၚ် ချူထမံက်ထ္ၜးလဝ်ရ။
အပ္ဍဲဒၞာဲဆန္ဒမာဲ သီုဖအိုတ်တံဟီုဂှ် သွက်စၠတ်ထဝ်ညးဍုၚ်ကွာန်၊ စၠတ်ထဝ်ကောန်ဂကူ ကဵု စၠတ်ထဝ်ရးဒေသဇၞော် တွဵုရးတံသၟးဟွံက ဒၞာဲဆန္ဒမာဲ ညးစၞးကောန်အရၚ်တံလေဝ် ပါလုပ်မံၚ်ရောၚ်။
ဟိုတ်ဂှ်ရ ပြဟ်ဟ်ဏံ နကဵုကလေၚ်ပလေဝ်ဏာ ဥပဒေဏံမ္ဂး ပၞောဝ်ကဵု အလုံဒၞာဲဆန္ဒမာဲသီုဖအိုတ်တုဲ ပန်ဂအုံမွဲဂအုံဂှ် လုပ်ပြိုၚ်အာမာန်မ္ဂး နကဵုဗော်ပရေၚ်ဍုၚ်ကွာန် သဘဴဂွံအခေါၚ် ဆက်တန်တဴအာမာန် မဒှ်ကီုရ။
ဒၟာနူယှအ်ဖျေံကဵုဏာ လၟိဟ်ဗီုဏံဂှ်တှ်ေ ဆၜိုတ်အလံၚ်ညးစၞး ၁၀၀ ပြၚ်ၚ်ဟေၚ် ဗော်ဇၞော်ဇၞော်တံ လုပ်ပြိုၚ်အာမာန်တုဲ ဂွံအခေါၚ် လမျီု ဂွံဆက်ဂျိုၚ်အာရဂှ် ဗော်လုပ်စန်ဒက် နူကဵုတွဵုရးကရေၚ် က္ဍိုပ်သ္ကိုပ် ဗော်မန်တဴတက်မွဲတၠ ဟီုရ။
“ယှအ်ဖျေံကဵုဏာ ဥပဒေသာ်ဏံဂှ်တှ်ေ သွက်ဗော်ဇၞော်ဇၞော်လုပ်ပြိုၚ်အလုံကၟိန်ဍုၚ်တံ ဂွံအာခေါၚ်အရာရ။ သွက်ဗော်လ္ၚဵုအလံၚ်ညးစၞးဟွံပေၚ်တံ ပရေၚ်အာကၠုၚ်ဝါတ်ခါဲမံၚ်တံဂှ်တှ်ေ ပရိုၚ်မ္ၚဵုမွဲရ။ ဗော်လ္ၚဵု အလံၚ်ညးစၞးပေၚ်မံၚ်တုဲတုဲရဂှ် ပြဿနာဟွံသေၚ်ကီုလေဝ် ဗော်ညးစၞးအလံၚ်အမာတ်ဟွံပေၚ်တံ မ္ဒးလုပ်ပြိုၚ်အာကဝက်ဟီုတှ်ေ ၄၀၀ (ညးစၞးအလံၚ်အမာတ်) ပြၚ် ဒးလုပ်ပြိုၚ်အာရောၚ်လေဝ်။ လၟုဟ် ၁၀၀ ပြၚ်ရ ဒးလုပ်ပြိုၚ်အာဟီုတှ်ေ သွက်ဗော်ဇၞော်ဇၞော်တံဂှ် ဆက်ဂျိုၚ်တဴမာန်။ ဥပဒေဏံဂှ် သွက်ဗော်ဍောတ်တ်တံဂှ် ဟွံဆေၚ်ပုဟ်” သာ်ဝွံ သ္ဂးရ။
ကိုပ်ကၠာတေံ အလုံဍုၚ်မွဲ ပ္ဍဲကဵုပွိုၚ်ဍုၚ် ၃၃၀ ဂှ် ဒၞာဲဆန္ဒမာဲ ၈၃၃ နေဝ် ကၠောန်အာပေါဲရုဲမာဲရောၚ် ခုတ်စၟတ်လဝ်ကီုလေဝ် ဗွဲကြဴ ပ္ဍဲကဵု ၅၆ ပွိုၚ်ဍုၚ် ဒၞာဲဆန္ဒမာဲ ၁၂၁ နေဝ်ဂှ် အကာဲအရာ သွက်ဂွံကၠောန်အာ ပေါဲရုဲမာဲဟၟဲပုဟ်ဂှ် နူကဵုကဝ်မယှေန် ပေါဲရုဲမာဲကၟိန်ဍုၚ် ဒုၚ်လဝ်ဝန်နွံရ။
ဟိုတ်ဂှ်ရ စိုပ်ကၠုၚ်ဂိတုဒဳဇြမ်ပါ ၂၈ ဏံ ဘိုအ်ဂွံစကၠောန်အာ နကဵု ပေါဲရုဲမာဲ သ္ကုတ်ကဵုသ္ကုတ်တံဂှ် အရၚ်ဒၞာဲစၠတ်ထဝ် ပိတန်ဝွံ ပ္ဍဲကဵုဒၞာဲ ဆန္ဒမာဲ ၇၁၂ နေဝ် သွက်ဂွံကၠောန်အာမဒှ်ရောၚ်ဂှ် လလောၚ်တြးလဝ်ရ။
သွက်ဗော်ဇၞော်ဇၞော် လုပ်ပြိုၚ်အာအလုံကၟိန်ဍုၚ်တံမ္ဂး ပၞောဝ်ကဵု ဒၞာဲဆန္ဒမာဲ ၇၁၂ နေဝ် ကဝက်ဂှ် ဟွံဒးပတိုန်ယၟု အလံၚ်ညးစၞးတုဲ သွက်ပန်ဂအုံမွဲဂအုံ ဒၞာဲဆန္ဒမာဲ ၁၇၈ နေဝ်ဂှ်ရ အောန်အိုတ်မ္ဒးပတိုန်အာ ယၟုအလံၚ်ညးစၞးအမာတ်တံရောၚ် မဒှ်ကီုရ။
ပြဟ်ဟ်ဏံ ပ္ဍဲကဵုပေါဲရုဲမာဲ ကဝ်မယှေန်ပၞာန် သ္ကိုပ်သ္ကကၠောန်အာဏံ ဗော်ဂွံလဝ်အခေါၚ်စၟတ်သမ္တီ တန်ကြန်မံၚ်လၟုဟ်တံဟီုမ္ဂး ဗော်လုပ်ပြိုၚ်အာ အလုံကၟိန်ဍုၚ် ၆ ဗော်ကဵု ဗော်စန်ဒက် ရးဒေသဇၞော်၊ တွဵုရးတံဂှ် နွံမံၚ် ၅၁ ဗော်ရ။
မွဲလပါ်ပၠန် အတိုၚ်ခုတ်စၟတ်လဝ် လၟိဟ် ရုၚ်ဗော်ကဵု ကောန်ဗော် ဟွံဍိုက်ပေၚ်ဂးတုဲ ဗော်လုပ်ပြိုၚ်အာ အလုံကၟိန်ဍုၚ် ၃ ဗော်တံဂှ် နူကဵုကဝ်မယှေန် ပေါဲရုဲမာဲကၟိန်ဍုၚ် လလောၚ်တြးပလီုထောံဗော် ပ္ဍဲကဵုသိပ်တမ်ပါ ၉ တေံရ။
ပရိုၚ်-သြၚ်လောန်တိုၚ်မ်
Photo – Social Media