လ္ဂုၚ် ၊ သိပ်တမ်ပါ ၂၄
ပ္ဍဲကဵုကၞောတ်ဂိတုဒဳဇြမ်ပါ သွက်ဂွံကၠောန်အာပေါဲရုဲမာဲဏံ လၟေၚ်ကမၠောန် ညံၚ်ဂွံလီုလာ်အာဂှ် ထ္ၜးဆန္ဒ၊ ချဳဒရာၚ်လဝ်ဂးတုဲ နကဵုဥပဒေ ပွမစဵုဒၞာပေါဲရုဲမာဲကဝ်မယှေန်ပၞာန် ရပ်ကေတ်လဝ်အရေဝ် မၞိဟ်မွဲဒါဇြေန်ပြၚ် ဒှ်ကၠုၚ်ယျ။
နကဵုကဝ်မယှေန်ပၞာန် ကၠောန်ပေါဲရုဲမာဲဏံ ညံၚ်ဂွံလီုလာ်အာ ရန်တၟံတုဲ အပ္ဍဲကဵုမုက်လိက်ပရေၚ်မၞိဟ်နာနာကီု ဒၞာဲမၞိဟ်အာကၠုၚ်ဂၠိုၚ် ဒၞာဲဆေၚ်စပ်ကဵုညးဂမၠိုၚ်တံဂှ် တွံဟီုဂးကီု စန်ဒက်ချဳဒရာၚ် ထ္ၜးဆန္ဒ ချူလိက် ဗက်ဗာန်လဝ် ရုပ်ပဝ်သတာ နာနာတံကီု ကၠောန်ပလာတ်ပထုဲမံၚ်နာနာသာ်တံဂှ် ကေတ်မံၚ်အရေဝ်ပိုတ်တ်ရ။
လောန်ကၠုၚ်မွဲသတ္တဟပြၚ်တေံ ပ္ဍဲကဵုရးဒေသဇၞော်လ္ဂုၚ်ကဵု တွဵုရးကရေၚ်ဍာဲတံ ညးတြုံ ၉ တၠတံဝွံ ပေါဲရုဲမာဲဗော်ဇဳ ညံၚ်ဂွံလီုလာ်အာ ဟိုတ်နူပလာတ်ပထုဲဗဒေါအ်ပလီုမံၚ်ဂှ်ရ ကေတ်လဝ်အရေဝ်နွံရောၚ် ပ္ဍဲသိပ်တမ်ပါ ၂၂ ဂှ် နူကဵုကဝ်မယှေန်ပၞာန် လလောၚ်ပတိတ်လဝ်ပရိုၚ်ရ။
လောန်ကၠုၚ်သိပ်တမ်ပါ ၁၆ တေံဂှ်လေဝ် ပ္ဍဲရးဒေသဇၞော်လ္ဂုၚ် ပွိုၚ်ဍုၚ်ယှိုဲပျဳတာဂှ် လၟေၚ်ကမၠောန်ပေါဲရုဲမာဲ ညံၚ်ဂွံလီုလာ်အာ ညးတြုံ ၄ တၠတံ ကၠောန်လဝ်ပရေၚ်ဆဝ်ဗ္ၚုဟ်တံဂှ် ရပ်ဏာတုဲ ပံက်လဝ်အမှု နကဵုဥပဒေ ပွမစဵုဒၞာပေါဲရုဲမာဲ ၝောံပိုဒ် ၂၃(က) ကေတ်လဝ်အရေဝ်ရ။
တုဲပၠန် ပ္ဍဲတွဵုရးကရေၚ်ဍာဲ ညးတြုံ ၅ တၠ နူကဵုဍုၚ်လွိုၚ်ကဝ်ဂှ်ကီု ပ္ဍဲသိပ်တမ်ပါ ၁၄ ဂှ် ဒပ်ဗၠာဲသၟိၚ်ၝောံဍုၚ် မဆေၚ်စပ်တံရပ်ဏာတုဲ နကဵုဥပဒေပွမစဵုဒၞာပေါဲရုဲမာဲ အတိုၚ်ၝောံပိုဒ်တုပ်တေံကေတ်လဝ်အရေဝ်ရ။
ယြဴပူဂဵုလဵုဟွံဟီု နကဵုဥပဒေ ပွမစဵုဒၞာပေါဲရုဲမာဲ ၝောံပိုဒ် ၂၃(က) ဂှ်ဖံက်ပကဝ်မ္ဂး ဒဏ်ထံၚ်အောန်အိုတ်နူကဵု ၃ သၞာံ ဒဵုကဵု ၇ သၞာံဖျေံမာန်တုဲ သီုကဵုဒဏ်သြန်လေဝ်ဖျေံဏာမာန်ရောၚ် ပ္ဍဲဥပဒေထမံက်ထ္ၜးလဝ်ရ။
အပ္ဍဲဥပဒေဏံ ၝောံပိုဒ် ၁၆ ဂှ်မ္ဂး စပ်ကဵုပေါဲရုဲမာဲတုဲ လၟေၚ်ကမၠောန်ဒှ်ဒှ် ဟွံသေၚ်မ္ဂးလၟေၚ်ကမၠောန် မွဲသ္ကုတ်မွဲသ္ကူဒှ်ဒှ် ညံၚ်ဂွံလီုလာ် ဟီုတွံ ဟီုဂးကီု စန်ဒက်ကီု ဆဝ်ဗ္ၚုဟ်ကီု ထ္ၜးဆန္ဒကီု သာ်ဂှ်ဟွံသေၚ် ပွမချူဆန်တြးပတိတ်တံ နဲလဵုမှကၠောန်သ္ပ ဟွံဂွံရောၚ် တာဒၞာလဝ်ရ။
နကဵု ကဝ်မယှေန်ပၞာန်ပၠန် သွက်ဂွံကၠောန်အာပေါဲရုဲမာဲမာန် နူကၠာဟွံဂွံပလီု ကံၚ်သဳပၞာန်ဂှ် ဇိုတ်ပလီုထောံ အကာဲအရာကာမံက်တိုန်အပ္ဍဲဍုၚ်တုဲ သွက်ဂွံစဵုဒၞာအာပရေၚ်ပလာတ်ပထုဲ ပေါဲရုဲမာဲဗော်ဇဳဂှ်ချူခၞံလဝ်ဥပဒေ ပွမစဵုဒၞာပေါဲရုဲမာဲ ပ္ဍဲကဵုကၞောတ်ဂိတု ဂျူလိုၚ်တေံရ။
တုဲပၠန် သွက်ဂွံကၠောန်အာပေါဲရုဲမာဲဗွဲမအံၚ်ဇၞးမာန် ထ္ၜးလဝ်ဟိုတ်ကဵုပရေၚ်ဒၞာတာ ချူခၞံလဝ်ဥပဒေ ပွမစဵုဒၞာပေါဲရုဲမာဲတုဲ လ္တူညးဖန်ဖက်ၜက်ၜေတ်လဝ်သၞောဝ်တံဂှ် ဗက်ဂၠိုက်ဂၠာဲရပ်စပ်ကေတ်မံၚ်အရေဝ်တံ ကၠောန်ကၠုၚ်မံၚ်ဆက်က်ရ။
ပ္ဍဲသိပ်တမ်ပါ ၁၈ ဂှ်လေဝ် ပ္ဍဲကဵုရးဒေသလ္ဂုၚ် ပွိုၚ်ဍုၚ်လှိုၚ်သာယာသ္ကုတ်ဗၟံက်တေံ သွက်ပေါဲရုဲမာဲဂွံလီုလာ်အာ လိက်ပရေၚ်ဆဝ်ဗ္ၚုဟ်လဝ်တံကဵု စတေကာတံဂှ် ညးတြုံၜါတၠဗက်ဗာန်မံၚ် ပ္ဍဲကဵုဒၞာဲညးအာကၠုၚ်ဂၠိုၚ်တံတုဲ ကဝ်မယှေန်ပၞာန်တံရပ်ဏာလဝ်နွံရ။
လောန်ကၠုၚ် ပ္ဍဲဂိတုအဝ်ဂတ်တေံလေဝ် စပ်ကဵုကိစ္စပရေၚ်ကဵုမာဲတုဲ လ္တူအန်လာၚ် ညးတြုံမွဲတၠဟီုဂးပါ်ပါဲလဝ်ဂှ် နကဵုဥပဒေ ပွမစဵုဒၞာပေါဲရုဲမာဲ ၝောံပိုဒ် ၂၃(က) ကဝ်မယှေန်ပၞာန်ဖျေံအမိၚ်ဒဏ်ထံၚ် ၇ သၞာံ နကဵုကမၠောန် ပ္ဍဲဂိတုသိပ်တမ်ပါ ၉ ဏံ မဒှ်ရ။
ပရိုၚ်-သြၚ်လောန်တိုၚ်မ်
Photo – MOI